ກອງປະຊຸມດຳເນີນຊີວິດການເມືອງປັບປຸງປົວແປງພັກ ຫນ່ວຍພັກ ອົງການຈັດຕັ້ງມະຫາຊົນ ເມືອງທ່າແຕງ ໄດ້ຈັດຂຶ້ນ ໃນລະຫວ່າງ ວັນທີ 24-27 ກໍລະກົດ 2017 ນີ້, ຢູ່ທີ່ຫ້ອງປະຊຸມຫ້ອງການແຜນການ ແລະ ການລົງທືນເມືອງ, ໂດຍພາຍໃຕ້ການເປັນປະທານຂອງ ທ່ານ ໄຫວປະເສີດ ກຽດສະຫງ່າ ປະທານກໍາມະບານເມືອງທ່າແຕງ, ມີບັນດາໜ່ວຍພັກ,ຄະນະໜ່ວຍພັກ ພ້ອມດ້ວຍສະມາຊິກພັກ ສົມບູນ ແລະ ສຳຮອງ ພາຍໃນໜ່ວຍເຂົ້າຮ່ວມຢ່າງພ້ອມພຽງ.
ໃນພິທີ ທ່ານ ໄຫວປະເສີດ ກຽດສະຫງ່າ ປະທານກໍາມະບານເມືອງທ່າແຕງ ກ່າວວ່າ: ບັ້ນດໍາເນີນຊີວິດການເມືອງປັບປຸງປົວແປງພັກໃຫ້ປອດໃສ່ເຂັ້ມແຂງ ແລະ ໜັກແໜ້ນ ທົ່ວໜ່ວຍພັກອົງການຈັດຕັ້ງມະຫາຊົນໃນຄັ້ງນີ້ ບັນດາຄະນະພັກ,ຄະນະໜ່ວຍພັກ ພ້ອມດ້ວຍສະມາຊິກພັກທຸກສະຫາຍ ຈະໄດ້ເຊື່ອມຊືມເອກະສານກ່ຽວກັບການປັບປຸງ ປົວແປງພັກໃຫ້ປອດໃສ,ເຂັ້ມແຂງ ແລະ ໜັກແໜ້ນ,ເອກະສານຕີລາຄາການຈັດຕັ້ງປະຕິບັດມະຕິ 10 ຂອງພັກ,ມະຕິ 9 ຂອງອົງຄະນະພັກແຂວງ ແລະ ມະຕິ 5 ຂອງອົງຄະນະພັກເມືອງທ່າແຕງ ກໍ່ຄື ມະຕິຂອງຄະນະພັກແຕ່ລະຂັ້ນ ໃນການຊີ້ນຳ-ນໍາພາຂອງຄະນະພັກ, ສະມາຊິກພັກທຸກສະຫາຍ, ເພີ່ມທະວີສຶກສາອົບຮົມການເມືອງ-ແນວຄິດ, ຍົກສູງຄວາມຮັບຜິດຊອບທາງດ້ານຄຸນທາດການເມືອງ, ຄຸນສົມບັດສິນທຳປະຕິວັດ, ປັບປຸງແບບແຜນວິທີນຳພາ, ວິທີເຮັດວຽກ, ແບບແຜນການດໍາລົງຊີວິດ, ການກໍ່ສ້າງພັກ, ສ້າງພະນັກງານສືບທອດປ່ຽນແທນ, ນຳພາຄຸ້ມຄອງຕໍ່ການປະຕິບັດໜ້າທີ່ການເມືອງ, ເພີ່ມທະວີຄວາມຮັບຜິດຊອບ, ພ້ອມຂຽນໃບສໍາຫຼວດຕົນເອງ, ຍົກໃຫ້ເຫັນຈຸດດີ, ຈຸດອ່ອນ, ຂໍ້ຄົງຄ້າງ ລວມເຖິງຂໍ້ຂາດຕົກບົກຜ່ອງໃນການຈັດຕັ້ງປະຕິບັດໜ້າທີວຽກງານໃນໄລຍະຜ່ານມາ ພ້ອມກັນເຊີດຊູເສີມຂະຫຍາຍອັນຖືກຕ້ອງ, ອັນດີໃຫ້ແຂງແຮງ ແລະ ແກ້ໄຂພຶດຕິກຳ ທີ່ບໍ່ຖືກຕ້ອງສອດຄ່ອງກັບອຸດົມການຂອງພັກ, ແນ່ໃສ່ເຮັດໃຫ້ພັກເຮົາ ມີການຫັນປ່ຽນຢ່າງຕັ້ງໜ້າ ແລະ ກາຍເປັນແບບຢ່າງນຳໜ້າໃຫ້ຄະນະພັກຂັ້ນຕ່າງໆ ເພື່ອໃຫ້ພັກມີຄວາມປອດໃສ, ເຂັ້ມແຂງ ແລະ ໜັກແໜ້ນ ແລະ ເປັນຄັນທຸງເຕົ້າໂຮມຄວາມສາມັກຄີ, ກຳລັງແຮງສັງລວມໃນການຈັດຕັ້ງປະຕິບັດມະຕິ 10 ຂອງພັກ, ມະຕິ 9 ຂອງອົງຄະນະພັກແຂວງ ແລະ ມະຕິ 5 ຂອງອົງຄະນະພັກເມືອງ ທ່າແຕງ ໃຫ້ບັນລຸຜົນສຳເລັດຕາມຄາດໝາຍທີ່ວາງໄວ້.
ທັງນີ້ ເພື່ອເປັນການຕ້ານການກົດໜ່ວງທ່ວງດຶງຕໍ່ການພັດທະນາ, ຄວາມຈະເລີນກ້າວໜ້າຂອງປະເທດຊາດ ໃຫ້ນັບມື້ນັບດີຂື້ນເທື່ອລະກ້າວ.
ກອງປະຊຸມຄັ້ງນີ້ ໄດ້ອັດລົງຢ່າງເປັນທາງການໃນວັນທີ 27 ກໍລະກົດ 2017 ນີ້.
Editor: ກຳປານາດ ລັດຖະເຮົ້າ
