ໜ່ວຍພັກຫ້ອງວ່າການປົກຄອງເມືອງທ່າແຕງ ເປີດກອງປະຊຸມດຳເນີນຊີວິດການເມືອງປັບປຸງປົວແປງພັກຂື້ນ ໃນທ້າຍເດືອນກໍລະກົດ 2017 ທີ່ຜ່ານມານີ້ ຢູ່ທີ່ຫ້ອງປະຊຸມຫ້ອງວ່າການປົກຄອງເມືອງທ່າແຕງ, ແຂວງເຊກອງ, ໂດຍພາຍໃຕ້ການເປັນປະທານຂອງທ່ານ ສຸກັນ ຈັນສີປະເສີດ ເລຂາໜ່ວຍພັກຫ້ອງວ່າການປົກຄອງເມືອງ,ເປັນກຽດເຂົ້າຮ່ວມຂອງທ່ານ ຄໍາສອນ ກອນເຍີ ກໍາມະການພັກແຂວງ ເລຂາພັກເມືອງ ເຈົ້າເມືອງທ່າແຕງ, ມີບັນດາຄະນະພັກ ແລະ ສະມາຊິກພັກສົມບູນ ແລະ ສຳຮອງໃນໜ່ວຍເຂົ້າຮ່ວມ.
ກອງປະຊຸມດໍາເນີນຊີວິດການເມືອງປັບປຸງປົວແປງພັກ ທົ່ວໜ່ວຍພັກຫ້ອງວ່າການປົກຄອງເມືອງທ່າແຕງ ຄັ້ງນີ້ ບັນດາຄະນະໜ່ວຍພັກ, ສະມາຊິກພັກທຸກສະຫາຍທີ່ເຂົ້າຮ່ວມ ຈະໄດ້ຮັບຟັງເຊື່ອມຊຶມເອກະສານ ເດັດດ່ຽວ ປັບປຸງປົວແປງພັກ ໃຫ້ປອດໃສເຂັ້ມແຂງ ແລະ ໜັກແໜ້ນ ໂດຍແມ່ນ ທ່ານ ສຸກັນ ຈັນສີປະເສີດ ເລຂາໜ່ວຍພັກຫ້ອງວ່າການປົກຄອງເມືອງເປັນຜູ້ບັນຍາຍ ເຊິ່ງມີເນື້ອໃນເລັ່ງໃສ່ການເສີມຂະຫຍາຍມູນເຊື້ອ,ຜົນງານດ້ານດີຂອງຄະນະພັກ, ສະມາຊິກພັກທຸກສະຫາຍ ລວມໄປເຖິງການແກ້ໄຂ ດ້ານອ່ອນ, ຂໍ້ຄົງຄ້າງ ແລະ ສິ່ງທ້າທາຍ ໃນໄລຍະ 2 ປີ ຜ່ານມາ, ທີ່ຈະຕ້ອງພ້ອມກັນຫັນປ່ຽນໄປໃນທາງທີ່ຕັ້ງໜ້າໃຫ້ມີຜົນສຳເລັດດີຂຶ້ນກວ່າເກົ່າ, ດ້ວຍຈິດໃຈບຸກທະລຸທັງ 4 ດ້ານ ເພື່ອຍົກສູງຄວາມສາມາດ, ການນຳພາ ແລະ ລັກສະນະນຳໜ້າ ຂອງສະມາຊິກພັກ, ພະນັກງານນຳພາ-ຄຸ້ມຄອງ ໃນການຈັດຕັ້ງປະຕິບັດລະບຽບການກໍ່ສ້າງພັກ ໃຫ້ປອດໃສ່ເຂັ້ມແຂງໜັກແໜ້ນ, ມີຫລັກການລວມສູນປະຊາທິປະໄຕ, ຫລັກການຕຳນິຕິຊົມຕົນເອງ, ຕິຊົມກໍ່ສ້າງຊ່ວຍເຫຼືອເຊິ່ງກັນ ແລະກັນ ເພື່ອເສີມຂະຫຍາຍຈຸດດີ ພ້ອມກັນຊອກຊ່ອງທາງແກ້ໄຂຈຸດອ່ອນ ແລະ ຂໍ້ຄົງຄ້າງ ໃຫ້ໄປພ້ອມກັບການແກ້ໄຂປະກົດການຫຍໍ້ທໍ້ຕ່າງໆ ທີ່ອາດຈະເກີດຂື້ນຢູ່ຕາມທ້ອງຖິ່ນຂອງຕົນໃຫ້ຫຼຸດໜ້ອຍຖອຍລົງເທື່ອລະກ້າວ.
ທັງນີ້ ກໍ່ເພື່ອເຮັດໃຫ້ສະມາຊິກພັກທຸກສະຫາຍ ເປັນເຈົ້າການເຊີດຊູເສີມຂະຫຍາຍອັນຖືກຕ້ອງ,ອັນດີໃຫ້ແຂງແຮງ ແລະ ແກ້ໄຂພຶດຕິກຳ ທີ່ບໍ່ສອດຄ່ອງກັບອຸດົມການຂອງພັກ,ແນ່ໃສ່ເຮັດໃຫ້ພັກເຮົາ ມີການຫັນປ່ຽນຢ່າງຕັ້ງໜ້າ ແລະ ກາຍເປັນແບບຢ່າງນຳໜ້າໃຫ້ຄະນະພັກຂັ້ນຕ່າງໆ ເພື່ອໃຫ້ພັກມີຄວາມປອດໃສ, ເຂັ້ມແຂງ ແລະ ໜັກແໜ້ນ, ເປັນຄັນທຸງເຕົ້າໂຮມຄວາມສາມັກຄີ, ກຳລັງແຮງສັງລວມໃນການຈັດຕັ້ງປະຕິບັດມະຕິ 10 ຂອງພັກ, ມະຕິ 9 ຂອງອົງຄະນະພັກແຂວງ ແລະ ມະຕິ 5 ຂອງອົງຄະນະພັກເມືອງທ່າແຕງ ໃຫ້ສຳເລັດຕາມຄາດໝາຍທີ່ວາງໄວ້.
Editor: ກຳປານາດ ລັດຖະເຮົ້າ
