ກອງປະຊຸມບັ້ນດຳເນີນຊີວິການເມືອງ ປັບປຸງປົວແປງພັກ ຂອງຄະນະພັກຮາກຖານ ພະແນກໂຍທາທິການ ແລະ ຂົນສົ່ງ ນະຄອນຫລວງວຽງຈັນ ໄດ້ໄຂຂື້ນ ໃນວັນທີ 31 ກໍລະກົດ ເຖິງ ວັນທີ 4 ສິງຫາ 2017 ທີ່ສູນການຄ້າ ລາວ-ໄອເຕັກ ນະຄອນຫລວງວຽງຈັນ ໂດຍເປັນປະທານໃນກອງປະຊຸມຄັ້ງນີ້ ຂອງທ່ານ ເດດສົງຄາມ ທຳມະວົງ ຫົວຫນ້າພະແນກໂຍທາທິການ ແລະ ຂົນສົ່ງ ນະຄອນຫລວງວຽງຈັນ ມີບັນດາຄະນະພັກພະແນກ, ຮອງພະແນກ, ພະນັກງານວິຊາການ, ສະມາຊິກພັກຮາກຖານ ເຂົ້າຮ່ວມຢ່າງພ້ອມພຽງ.
ໃນພິທີ ທ່ານ ເດດສົງຄາມ ທຳມະວົງ ໄດ້ກ່າວວ່າ: ການດຳເນີນຊີວິດການເມືອງ ປັບປຸງປົວແປງພັກ ຄັ້ງນີ້ ມີຄວາມໝາຍຄວາມສຳຄັນ ທີ່ສຸດ ເພາະມັນ ແມ່ນມູນເຊື້ອ ແລະ ທັງແມ່ນຫຼັກການນຳພາຂອງພັກ ທີ່ຖືແນວທາງມະຫາຊົນເປັນກົກ ໂດຍມີການໝູນໃຊ້ລັດທິ ມາກ-ເລນິນ ເປັນທິດເຍືອງທາງ, ທັງແມ່ນຄວາມຮຽກຮ້ອງຕ້ອງການອັນຮີບດ່ວນເພື່ອປັບປຸງ, ປົວແປງ ແລະ ເຊີດຊູຄວາມຮັບຜິດຊອບຂອງຄະນະພັກແຕ່ລະຂັ້ນ, ສະມາຊິກພັກແຕ່ລະສະຫາຍ, ທັງແມ່ນຄວາມຈຳເປັນ ພາວະວິໄສ ໃນພາລະກິດປ່ຽນແປງໃໝ່ ໂດຍສະເພາະແມ່ນການເປີດປະຕູເພື່ອເຊື່ອມໂຍງກັບສາກົນ. ເຮັດໃຫ້ບັ້ນດຳເນີນຊີວິດການເມືອງປັບປຸງປົວແປງທົ່ວພັກ ຄັ້ງນີ້ເລິກເຊິ່ງເຖິງຖອງ, ແກ້ໄຂຈຸດອ່ອນ, ຂໍ້ບົກຜ່ອງ, ສິ່ງທ້າທາຍພາຍໃນພັກ, ສ້າງພັກເຮົາມີຄວາມປອດໃສ, ເຂັ້ມແຂງ, ໜັກແໜ້ນ, ສືບຕໍ່ນຳພາພາລະກິດປົກປັກຮັກສາ ແລະ ພັດທະນາ ຕາມທິດທີ່ກອງປະຊຸມໃຫຍ່ ຄັ້ງທີ 10 ຂອງພັກ ໄດ້ກຳນົດໄວ້.
ກອງປະຊຸມດຳເນີນຊີວິການເມືອງ ປັບປຸງປົວແປງພັກ ຂອງພະແນກໂຍທາທິການ ແລະ ຂົນສົ່ງ ຄັ້ງນີ້ ແມ່ນຈະໄດ້ດຳເນີນໄປຈົນເຖິງວັນທີ 4 ສິງຫາ 2017 ຈິ່ງຈະສຳເລັດ ແລະ ໄດ້ພ້ອມກັນເຊື່ອມຊຶມເອກະສານເດັດດ່ຽວປັບປຸງປົວແປງພັກໃຫ້ປອດໃສ, ເຂັ້ມແຂງ, ໜັກແໜ້ນ ຈາກນັ້ນຈະໄດ້ພ້ອມກັນສະຫຼຸບຕີລາຄາວຽກງານຮອບດ້ານຂອງຄະນະພັກພະຮາກຖານພະແນກ ທັງໝົດກໍເພື່ອເຮັດໃຫ້ ຄະນະພັກທຸກຂັ້ນ, ສະມາຊິກພັກທຸກສະຫາຍ ພ້ອມກັນຝຶກຝົນຫຼໍ່ຫຼອມ, ປັບປຸງຕົນເອງໃຫ້ສົມເປັນຄະນະພັກ, ຄະນະນໍາທີ່ດີ.
Editor: ກຳປານາດ ລັດຖະເຮົ້າ
