ທ້າຍເດືອນກໍລະກົດ 2017 ຜ່ານມານີ້, ຢູ່ທີ່ ສະໂມສອນຂອງ ເມືອງວັງວຽງ ແຂວງວຽງຈັນ. ໄດ້ມີພິທີປະຖະກະຖາ ວັນສ້າງຕັ້ງສະຫະພັນນັກຮົບເກົ່າ ຄົບຮອບ 15 ປີ ຂຶ້ນ ໂດຍພາຍໃຕ້ການເປັນປະທານຂອງ ທ່ານ ຄຳຜອງ ດວງວິໄລ ກຳມະການພັກແຂວງ,ເລຂາພັກເມືອງ-ເຈົ້າເມືອງໆວັງວຽງ. ມີບັນດາທ່ານຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການ, ທະຫານ, ຕຳຫລວດ, ພະນັກງານອາວຸໂສບຳນານ ແລະ ພະນັກງານວິຊາການເຂົ້າຮ່ວມ.
ທ່ານ ຄຳຜອງ ດວງວິໄລ ກຳມະການພັກແຂວງ ເລຂາພັກເມືອງ-ເຈົ້າເມືອງໆ ວັງວຽງ. ໄດ້ໃຫ້ກຽດປະຖະກະຖາ ວັນສ້າງຕັ້ງສະຫະພັນນັກຮົບເກົ່າ ຄົບຮອບ 15 ປີ: ນັບແຕ່ວັນທີ 9 ກັນຍາ 2002 ເປັນວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ໂດຍວັນດັ່ງກ່າວ ແມ່ນມີຄວາມໝາຍຄວາມສຳຄັນຢ່າງຍິ່ງ ຕໍ່ກຳລັງຖັນແຖວນັກຮົບເກົ່າທົ່ວປະເທດ ເພື່ອແນໃສ່ໃຫ້ຄົນລຸ້ນຫຼັງກຳໄດ້ມູນເຊື້ອອັນພິລະອາດຫານຂອງນັກຮົບ ມີຄວາມເອກອ້າງທະນົງໃຈຕໍ່ຜົນງານ ການຕໍ່ສູ້ກອບກູ້ເອກະລາດຂອງຊາດລາວເຮົາ ພ້ອມນີ້ ທ່ານຍັງຍົກໃຫ້ເຫັນເຖິງປະຫວັດມູນເຊື້ອການຕໍ່ສູ້ອັນຍາວນານ ແລະ ມີໄຊຍິ່ງໃຫຍ່ໃນແຕ່ລະໄລຍະ ການປະກອບສ່ວນ ແລະ ຜົນງານການເຄື່ອນໄຫວຂອງນັກຮົບເກົ່າ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ສະພາບຄວາມຈຳເປັນທີ່ພາໃຫ້ກຳເນີດພາລະບົດບາດສິດ ແລະ ໜ້າທີ່ ຂອງອົງການຈັດຕັ້ງສະຫະພັນນັກຮົບເກົ່າແຫ່ງຊາດ ລວມທັງແຜນການທິດທາງເຄື່ອນໄຫວລວມຂອງສະຫະພັນນັກຮົບເກົ່າ ໃນການປະກອບສ່ວນສ້າງສາພັດທະນາເສດຖະກິດ-ສັງຄົມ ໃຫ້ຈະເລີນຮຸ່ງເຮືອງ ຕາມແນວທາງນະໂຍບາຍປ່ຽນແປງໃໝ່ ຂອງພັກ-ລັດຖະບານ ວາງໄວ້. ພ້ອມນີ້ຍັງໄດ້ຮັບຟັງ ວັນເຊັນສົນທິສັນຍາມິດຕະພາບ-ການຮ່ວມມື ແລະ ວັນສ້າງສາຍພົວພັນການທູດລະຫວ່າງລາວ-ຫວຽດນາມ ຕື່ມອີກ.
ໃນຕອນທ້າຍພິທີ ຍັງໄດ້ມີການມອບຂອງຂວັນໃຫ້ກັບພະນັກງານອາວຸໂສບຳນານຜູ້ທີ່ມີຜົນງານ ຈຳນວນ 4 ທ່ານ. ໃຫ້ກຽດມອບໂດຍ ທ່ານ ຄຳຜອງ ດວງວິໄລ ກຳມະການພັກແຂວງ ເລຂາພັກເມືອງເຈົ້າເມືອງໆວັງວຽງ
ຂອບໃຈ ພາບ ແລະ ບົດ ທີມຂ່າວ ຈາກເມືອງວັງວຽງ
Editor: ກຳປານາດ ລັດຖະເຮົ້າ
