ກອງປະຊຸມ ບັ້ນດຳເນີນຊີວິດການເມືອງ ປັບປຸງປົວແປງພັກ ຫນ່ວຍພັກບ້ານດົງຫມ້ຽງ ແລະ ຫນ່ວຍພັກບ້ານທົ່ງຂັນຄຳ ໄດ້ດຳເນີນມາແຕ່ວັນທີ 26 ກໍລະກົດ ຈົນເຖິງວັນທີ 1 ສິງຫາ 2017 ແລະ ໄດ້ປິດລົງຢ່າງເປັນທາງການ. ໃນເຊົ້າວັນທີ 1 ສິງຫາ ນີ້, ໂດຍການເຂົ້າຮ່ວມເປັນປະທານ ມີ ທ່ານ ສຸລິວົງ ດວງປະເສີດ ກຳມະການພັກເມືອງ, ຫົວຫນ້າຫ້ອງການຊັບພະຍາກອນ ແລະ ສິ່ງແວດລ້ອມ ເມືອງຈັນທະບູລີ, ຜູ້ຊີ້ນຳ 2 ບ້ານ, ມີ ເລຂາຄະນະພັກ ບ້ານດົງຫມ້ຽງ ແລະ ບ້ານທົ່ງຂັນຄຳ, ພ້ອມດ້ວຍສະມາຊິກພັກບ້ານ ເຂົ້າຮ່ວມ ຢ່າງພ່້ອມພຽງ.
ຕະຫລອດໄລຍະ 5 ວັນ ຂອງການດຳເນີນຊີວິດການເມືອງປັບປຸງປົວແປງພັກ ຂອງຫນ່ວຍພັກບ້ານດົງຫມ້ຽງ ແລະ ບ້ານທົ່ງຂັນຄຳ ບັນດາສະມາຊິກພັກບ້ານ ທັງ 2 ບ້ານ ໄດ້ຮັບຟັງການເຜີຍແຜ່ເອກະສານ ເລກທີ 01 ວ່າດ້ວຍການດຳເນີນຊີວິດການເມືອງສູນກາງພັກ, ວ່າດ້ວຍການສ້າງຫນ່ວຍພັກເຂັ້ມແຂງ-ຮູ້ນຳພາຮອບດ້ານ, ຮັບຟັງບົດສະຫລຸບຂອງການຜັນຂະຫຍາຍ ແລະ ຈັດຕັ້ງປະຕິບັດ ກອງປະຊຸມໃຫຍ່ ຄັ້ງທີ 6 ອົງຄະນະພັກເມືອງ ແລະ ມະຕິກອງປະຊຸມໃຫຍ່ ຄັ້ງທີ 8 ຂອງອົງຄະນະພັກບ້ານ. ການປະກອບຄຳເຫັນເພື່ອຕຳນິສົ່ງຂ່າວຕໍ່ບຸກຄົນ, ຄະນະຫນ່ວຍພັກ ແລະ ອົງການປົກຄອງບ້ານ ເຊີ່ງໄດ້ແບ່ງອອກເປັນ 2 ຫນ່ວຍພັກ ບ້ານ ຄື: ຫນ່ວຍພັກບ້ານດົງຫມ້ຽງ ແລະ ຫນ່ວຍພັກ ບ້ານທົ່ງຂັນຄຳ. 2 ຫນ່ວຍພັກ ໄດ້ຜ່ານບົດສະຫລຸບ ໃນນັ້ນ ໄດ້ຍົກໃຫ້ເຫັນ ຈຸດດີ-ຈຸດອ່ອນ ແລະ ຂໍ້ຄົງຄ້າງໃນແຕ່ລະດ້ານ, ພ້ອມທັງວິທີຂອງການປັບປຸງແກ້ໄຂ, ພ້ອມກັນນັ້ນ, 2 ຫນ່ວຍພັກ ຍັງໄດ້ຮ່າງບົດສະຫລູບຕິລາຄາຄວາມຮັບຜິດຊອບ ໃນການຊີ້ນຳ-ນຳພາ ວຽກງານຮອບດ້ານ ຂອງຫນ່ວຍພັກຕົນ ໃນການຈັດຕັ້ງປະຕິບັດ.
ປະຈຸບັນ ຫນ່ວຍພັກບ້ານດົງຫມ້ຽງ ປະເພດແຂງ ມີ ຈຳນວນ 19 ສະຫາຍ, ຍິງ 10 ສະຫາຍ, ຫນ່ວຍພັກບ້ານທົ່ງຂັນຄຳ ປະເພດແຂງ ມີ ຈຳນວນ 17 ສະຫາຍ, ຍິງ 6 ສະຫາຍ. ຜ່ານການດຳເນີນຊີວິດການເມືອງປັບປຸງປົວແປງພັກ ຫນ່ວຍພັກ ທັງສອງບ້ານ ສາມາດສະຫລຸບຕິລາຄາຫນ່ວຍພັກ, ສະມາຊິກພັກພາຍໃນຫນ່ວຍ ໂດຍອິງໃສ່ບົດສຳຫລວດ ແລະ ການປະກອບຄຳເຫັນຕິລາຄາ ດ້ານແນວຄິດ, ການປະພຶດ ແລະ ຄວາມຮັບຜິດຊອບ, ແບບແຜນການຈັດຕັງວຽກງານ, ແບບແຜນການດຳເນີນຊີວິດ, ດ້ານດີ-ດ້ານອອນ, ຂໍ້ບົກຜ່ອງ ແລະ ວິທີການປັບປຸງແກ້ໄຂໃນຕໍ່ຫນ້າ. ເຊັ່ນ:ວ່າ: ດ້ານຄຸນທາດການເມືອງ ແລະ ຄຸນສົມບັດສິນທຳປະຕິວັດ, ດ້ານຄວາມຮັບຜິດຊອບຕໍ່ຫນ້າທີ່ການເມືອງ ທີ່ໄດ້ມອບຫມາຍ, ດ້ານແບບແຜນການນຳພາ ແລະ ວິທີການເຮັດວຽກ, ດ້ານແບບແຜນຂອງການດຳລົງຊີວິດ, ແລະ ຜົນງານດ້ານຕ່າງໆ ລວມທັງແຜນການວຽກງານຂອງບ້ານໃນຕໍ່ຫນ້າ.
Editor: ກຳປານາດ ລັດຖະເຮົ້າ
