ໜວ່ຍພັກ ທົ່ວເຂດພັດທະນາ ທີ 4 ໄດ້ສໍາເລັດການດຳເນີນຊີວິດການເມືອງປັບປຸງປົວແປງພັກ ໃນທ້າຍເດືອນ ກໍລະກົດ 2017 ຜ່ານມານີ້ ຢູ່ທີ່ເຂດພັດທະນາທີ 4 ເມືອງທ່າແຕງ, ແຂວງ ເຊກອງ, ໂດຍເປັນປະທານຂອງ ທ່ານ ພູວົງ ກອງຊັບ ກໍາມະການພັກເມືອງ, ຫົວໜ້າເຂດພັດທະນາທີ 4, ເປັນກຽດເຂົ້າຮ່ວມຂອງ ທ່ານ ແສງມະນີ ດາລາສິນ ຄະນະປະຈໍາພັກເມືອງ, ຫົວໜ້າກອງບັນຊາການທະຫານເມືອງທ່າແຕງ, ມີບັນດາຄະນະພັກຮາກຖານ, ເລຂາໜ່ວຍພັກ ພ້ອມດ້ວຍສະມາຊິກພັກສົມບູນ ແລະ ສະມາຊິກພັກສໍາຮອງ ໃນທົ່ວເຂດພັດທະນາທີ 4 ເຂົ້າຮ່ວມ.
ທ່ານ ພູວົງ ກອງຊັບ ກໍາມະການພັກເມືອງ ຫົວໜ້າເຂດພັດທະນາທີ 4 ກ່າວວ່າ: ການດໍາເນີນຊີວິດການເມືອງ ປັບປຸງປົວແປງພັກໃຫ້ປອດໃສ່ເຂັ້ມແຂງ ແລະ ໜັກແໜ້ນ ຂອງໜ່ວຍພັກ ໃນທົ່ວເຂດ 4 ປະກອບມີ 15 ໜ່ວຍພັກ, ມີສະມາຊິກພັກທັງໝົດ 255 ສະຫາຍ, ຍິງ 39 ສະຫາຍ ໃນຄັ້ງນີ້ ມີຜົນສໍາເລັດດ້ວຍຄຸນນະພາບໂດຍລວມ ສະມາຊິກພັກທຸກສະຫາຍ ໄດ້ເອົາໃຈ ໃສ່ເຊື່ອມຊືມບັນດາເນື້ອໃນເອກະສານ ເດັດດ່ຽວປັບປຸງປົວແປງພັກ ໃຫ້ປອດໃສ່, ເຂັ້ມແຂງ ແລະ ໜັກແໜ້ນ ເຊິ່ງເຮັດໃຫ້ສະມາຊິກພັກຮັບຮູ້ ແລະ ເຂົ້າໃຈຢ່າງເລິກເຊິ່ງ, ສາມາດເຮັດໃຫ້ສະມາຊິກພັກໃນທົ່ວເຂດມີຄວາມເຂົ້າໃຈ 80 ກວ່າສ່ວນຮ້ອຍ, ນອກນີ້ ສະມາຊິກພັກໄດ້ເອົາໃຈໃສ່ຕໍານິສົ່ງຂ່າວ,ກໍ່ສ້າງຊ່ວຍເຫຼືອເຊິ່ງກັນ ແລະ ກັນ ດ້ວຍຄວາມຈິງໃຈ, ມີຄວາມຮັບຜິດຊອບສູງ, ສົງຜົນເຮັດໃຫ້ສະມາຊິກພັກແຂງ ມີ 138 ສະຫາຍ, ສະມາຊິກພັກກາງ ມີ 65 ສະຫາຍ, ສະມາຊິກພັກ ອ່ອນມີ 3 ສະຫາຍ, ນອກຈາກນີ້ ການລົງຄະແນນສຽງຄວາມເຊື່ອໝັ້ນໄວ້ວາງໃຈ ຕໍ່ຄະນະພັກຮາກຖານບ້ານ, ຄະນະໜ່ວຍພັກ,ຫົວໜ້າໜ່ວຍງານຂັ້ນບ້ານໃນທົ່ວເຂດ ມີຄວາມເຊື່ອໝັ້ນໄວ້ວາງໃຈ 100 ສ່ວນຮ້ອຍ ຂອງຈໍານວນສະມາຊິກພັກທີ່ທາບທາມທັງໝົດ ມີ 206 ສະຫາຍ, ຍິງ 38 ສະຫາຍ.
ໂອກາດທີ່ມີຄວາມໝາຍສຳຄັນນີ້ ທ່ານ ແສງມະນີ ດາລາສິນ ຄະນະປະຈໍາພັກເມືອງ ຫົວໜ້າກອງບັນຊາການທະຫານເມືອງ ທ່າແຕງ ກໍ່ໄດ້ໃຫ້ກຽດໂອ້ລົມ ກ່ອນອື່ນສະຫາຍໄດ້ສະແດງຍ້ອງຍໍຊົມເຊີຍ ຕໍ່ຜົນງານທີ່ໜວ່ຍພັກໃນທົ່ວເຂດພັດທະນາທີ 4 ຍາດມາໄດ້ຫຼາຍດ້ານເປັນຕົ້ນ ສະມາຊິກພັກທຸກສະຫາຍໄດ້ເຂົ້າໃຈຢ່າງເລິກເຊິ່ງ ໃນການເຊື່ອມຊືມເອກະສານກ່ຽວກັບການປັບປຸງ ປົວແປງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ,ເອກະສານຕີລາຄາການຈັດຕັ້ງປະຕິບັດມະຕິ 10 ຂອງພັກ, ມະຕິ 9 ຂອງອົງຄະນະພັກແຂວງ ແລະ ມະຕິ 5 ຂອງອົງຄະນະພັກເມືອງທ່າແຕງ ກໍ່ຄື ມະຕິຂອງຄະນະພັກແຕ່ລະຂັ້ນ ໃນການຊີ້ນຳ-ນໍາພາ ຂອງຄະນະພັກ,ສະມາຊິກພັກທຸກສະຫາຍ ໄດ້ເພີ່ມທະວີສຶກສາອົບຮົມການເມືອງ-ແນວຄິດ, ຍົກສູງຄວາມຮັບຜິດຊອບທາງດ້ານຄຸນທາດການເມືອງ,ຄຸນສົມບັດສິນທຳປະຕິວັດ, ປັບປຸງແບບແຜນວິທີນຳພາ, ວິທີເຮັດວຽກ, ແບບແຜນການດໍາລົງຊີວິດ,ການກໍ່ສ້າງພັກ, ສ້າງພະນັກງານສືບທອດ, ນຳພາຄຸ້ມຄອງຕໍ່ການປະຕິບັດໜ້າທີ່ການເມືອງ, ເພີ່ມທະວີຄວາມຮັບຜິດຊອບ, ພ້ອມຂຽນໃບສໍາຫຼວດຕົນເອງ, ຍົກໃຫ້ເຫັນຈຸດດີ, ຈຸດອ່ອນ, ຂໍ້ຄົງຄ້າງ ລວມເຖິງຂໍ້ຂາດຕົກບົກຜ່ອງໃນການຈັດຕັ້ງປະຕິບັດໜ້າທີວຽກງານໃນໄລຍະຜ່ານມາ ພ້ອມກັນເຊີດຊູເສີມຂະຫຍາຍອັນຖືກຕ້ອງ, ອັນດີໃຫ້ແຂງແຮງ ແລະ ແກ້ໄຂພຶດຕິກຳ ທີ່ບໍ່ຖືກຕ້ອງສອດຄ່ອງກັບອຸດົມການຂອງພັກ, ແນ່ໃສ່ເຮັດໃຫ້ພັກເຮົາ ມີການຫັນປ່ຽນຢ່າງຕັ້ງໜ້າ ແລະ ກາຍເປັນແບບຢ່າງນຳໜ້າໃຫ້ຄະນະພັກຂັ້ນຕ່າງໆ ເພື່ອໃຫ້ພັກມີຄວາມປອດໃສ, ເຂັ້ມແຂງ ແລະ ໜັກແໜ້ນ ແລະ ເປັນຄັນທຸງເຕົ້າໂຮມຄວາມສາມັກຄີ, ກຳລັງແຮງສັງລວມໃນການຈັດຕັ້ງປະຕິບັດມະຕິ 10 ຂອງພັກ, ມະຕິ 9 ຂອງອົງຄະນະພັກແຂວງ ແລະ ມະຕິ 5 ຂອງອົງຄະນະພັກເມືອງທ່າແຕງ ໃຫ້ສຳເລັດຕາມຄາໝາຍທີ່ວາງໄວ້.
Editor: ກຳປານາດ ລັດຖະເຮົ້າ
