ໃນທ້າຍເດືອນ ກໍລະກົດ ຜ່ານມານີ້ ທ່ານ ປະລິນຍາເອກ ລຽນ ທີແກ້ວ ກໍາມະການສູນກາງພັກ, ລັດຖະມົນຕິ ກະຊວງກະສິກໍາ-ປ່າໄມ້ ພ້ອມດ້ວຍຄະນະ ໄດ້ລົງພົບປະຢ້ຽມຢາມ ພະນັກງານຫຼັກແຫ່ງຫ້ອງການກະສິກໍາ-ປ່າໄມ້ເມືອງວຽງທອງ. ເຂົ້າຮ່ວມພິທີມີ ທ່ານ ປະລິນຍາເອກ ກອງແກ້ວ ໄຊສົງຄາມ ກໍາມະການສູນກາງພັກ ເລຂາພັກແຂວງ-ເຈົ້າແຂວງບໍລິຄໍາໄຊ. ມີບັນດາຫົວໜ້າກົມ-ຄະນະກະຊວງ ພ້ອມດ້ວຍພະນັກງານຫ້ອງການກະສິກໍາ-ປ່າໄມ້ເມືອງວຽງທອງ ເຂົ້າຮ່ວມ.
ໃນພິທີ ທ່ານ ຄໍາພູ ພັນດານຸວົງ ຫົວໜ້າຫ້ອງການກະສິກໍາ-ປ່າໄມ້ເມືອງວຽງທອງ. ໄດ້ຂຶ້ນລາຍງານຫຍໍ້ ໃນການຈັດຕັ້ງປະຕິບັດ ການພັດທະນາກະສິກໍາ-ປ່າໄມ້ ພາຍໃນເມືອງວຽງທອງ ປະຈໍາສົກປີ 2017. ຫ້ອງການກະສິກໍາ-ປ່າໄມ້ເມືອງວຽງທອງ ມີພະນັກງານທັງໝົດ ຈໍານວນ 36 ທ່ານ, ຍິງ 9 ທ່ານ, ມີໂຄງປະກອບສ້າງ ຮັບຜິດຊອບ 10 ໜ່ວຍງານ ແບບກວມລວມ ແລະ ຄຸ້ມຄອງພາລະບົດບາດໜ້າທີ ຂອງໃຜລາວ. ການສົ່ງເສີມການຜະລິດເຂົ້າປີ 2017. ມີເນື້ອທີທັງໝົດ 3 ພັນ 5 ຮ້ອຍກວ່າເຮັກຕ່າ. ຄາດຄະເນຜົນຜະລິດເຂົ້າເປືອກໄດ້ທັງໝົດ 11 ພັນ 7 ຮ້ອຍກວ່າໂຕ່ນ. ສະເລຍເຂົ້າກິນໄດ້ 400 ກິໂລ/ຄົນ/ປີ. ມີເນື້ອທີເຂົ້ານາປີ 2 ພັນ ກວ່າເຮັກຕາ ຜົນຜະລິດໄດ້ 10 ພັນກວ່າໂຕ່ນ, ສະມັດຕະພາບ 4 ໂຕ່ນ/ເຮັກຕ່າ, ປະຈຸບັນປັກດໍາເຂົ້ານາປີໄດ້ 100 ສ່ວນຮ້ອຍ. ຂອງເນື້ອທີທັງໝົດ ມີເນຶ້ອທີ່ໄຮ່ຄົງທີ ແລະ ໄຮ່ໝູນວຽນ 1 ພັນກວ່າເຮັກຕ່າ. ຜົນຜະລິດໄດ້ 1 ພັນ 500 ກວ່າໂຕ່ນ. ສະມັດຕະພາບ ໄດ້ 1,5 ໂຕ່ນ/ເຮັກຕາ. ໄດ້ຊຸກຍູ້ສົ່ງເສີມໃຫ້ປະຊາຊົນປູກພຶດສະບຽງອາຫານ ແລະ ເປັນສິນຄ້າທັງແລ້ງ ແລະ ຝົນ. ເຊິງມີເນື້ອທີລວມທັງໝົດ 1 ພັນ 600 ກວ່າເຮັກຕ່າ. ຜົນຜະລິດທັງໝົດ 15 ພັນ 500 ກວ່າໂຕນ. ນອກນັ້ນ, ຍັງໄດ້ປູກພຶດເປັນສິນຄ້າເຊັ່ນ ປູກມັນຕົ້ນໃນເນື້ອທີ່ 520 ເຮັກຕ່າ. ຜົນຜະລິດໄດ້ 890 ໂຕ່ນ, ຖົ່ວດິນເນື້ອທີ 70 ເຮັກຕ່າ ຜົນຜະລິດໄດ້ 210 ໂຕ່ນ. ໝາກເຜັດ 35 ເຮັກຕ່າ ຜົນຜະລິດໄດ້ 100 ກວ່າໂຕ່ນ.ແລະ ປູກພຶດຊະນິດອື່ນໆຕື່ມອີກ.
ໂອກາດນີ້ ທ່ານ ລັດຖະມົນຕີກະຊ່ວງກະສິກໍາ-ປ່າໄມ ຍັງໄດ້ໂອ້ລົມ ໃຫ້ທິດຊີ້ນໍາວຽກງານຫຼາຍດ້ານ ເພຶ່ອເຮັດໃຫ້ວຽກງານໃນຕໍ່ໜ້າໄດ້ມີບາດກ້າວຂະຫຍາຍຕົວ ຕາມແນວທາງຂອງຂັ້ນເທິງວາງອອກ ແລະ ປະກົດຜົນເປັນຈິງ. ພ້ອມດຽວກັນ ທ່ານ ຍັງໄດ້ນໍາເອົາ ຄອມພິວເຕີ ຈໍານວນ 1 ຊຸດ ພ້ອມດ້ວຍເງິນສົດ ຈໍານວນ 35 ລ້ານກີບ. ມາມອບໃຫ້ຫ້ອງການກະສິກໍາ-ປ່າໄມ້ເມືອງວຽງທອງ ຕື່ມອີກ. ເຊິ່ງເປັນກຽດຮັບໂດຍ ທ່ານ ຄໍາພູ ພັນດານຸວົງ ຫົວໜ້າຫ້ອງການກະສິກໍາ-ປ່າໄມ້ເມືອງ ວຽງທອງ. ຫຼັງຈາກນັ້ນ ທ່ານ ລັດຖະມົນຕີ ພ້ອມດ້ວຍຄະນະຍັງໄດ້ລົງສໍາຫຼວດເບິ່ງ ການລ້ຽງສັດ ແລະ ປູກພຶດກະສິກໍາ ຕື່ມອີກ.
Editor: ກຳປານາດ ລັດຖະເຮົ້າ
