ທ່ານ ເຫຼັກໄຫຼ ສີວິໄລ ຄະນະປະຈໍາພັກແຂວງ ຮອງເຈົ້າແຂວງ ເຊກອງ ຜູ້ຊີ້ນໍາຂົງເຂດເສດຖະກິດ, ຊີ້ນຳໃຫ້ ຄະນະຮັບຜິດຊອບໂຄງການສໍາຫຼວດ ແລະ ສ້າງແຜນພັດທະນາແບບກວມລວມທົ່ວເຂດພູພຽງບໍລິເວນ ໂດຍສະເພາະ ຂະແໜ່ງການກ່ຽວຂ້ອງນັບແຕ່ຂັ້ນກະຊວງ,ຂັ້ນແຂວງ,ຂັ້ນເມືອງ ຕ້ອງເພີ່ມທະວີໃນການຜັນຂະຫຍາຍບັນດາວຽກງານໂຄງການສໍາຫຼວດ ແລະ ສ້າງແຜນພັດທະນາແບບກວມລວມ ທົ່ວເຂດພູພຽງບໍລິເວນ ໃນ 5 ເດືອນທ້າຍປີ 2017, ນັບແຕ່ເດືອນ ສິງຫາ ເຖິງ ເດືອນທັນວາ 2017 ນີ້ ດ້ວຍຄວາມຮັບຜິດຊອບສູງ ເພື່ອເຮັດໃຫ້ບັນດາເນື້ອໃນຈິດໃຈທີ່ໄດ້ຕົກລົງເປັນເອກະພາບໃນກອງປະຊຸມຖອດຖອນບົດຮຽນໃນ 7 ເດືອນຜ່ານມາ ຖືກຈັດຕັ້ງປະຕິບັດຢ່າງມີຜົນສຳເລັດ ຕາມລະດັບຄາດໝາຍ. ເຊິ່ງກອງປະຊຸມຄັ້ງນີ້ ໄດ້ຈັດຂື້ນໃນທ້າຍເດືອນ ກໍລະກົດ ຜ່ານມາ, ທີ່ສະໂມສອນປົກຄອງເມືອງທ່າແຕງ, ແຂວງເຊກອງ, ໂດຍມີບັນດາທ່ານຫົວໜ້າ-ຮອງພະແນກ, ຫົວໜ້າ-ຮອງຫ້ອງການ, ຄະນະຮັບຜິດຊອບຂັ້ນແຂວງ, ຂັ້ນເມືອງ ພ້ອມແຂກຖືກເຊີນເຂົ້າຮ່ວມ.
ໃນພິທີ ທ່ານ ເຫຼັກໄຫຼ ສີວິໄລ ຄະນະປະຈໍາພັກແຂວງ ຮອງເຈົ້າແຂວງເຊກອງ, ຜູ້ຊີ້ນໍາຂົງເຂດເສດຖະກິດ ໄດ້ສະແດງຍ້ອງຍໍຊົມເຊີຍ ແລະ ຊີ້ທິດເຍືອງທາງຕໍ່ກອງປະຊຸມ ການສໍາຫຼວດ ແລະ ສ້າງແຜນພັດທະນາແບບກວມລວມທົ່ວເຂດພູພຽງບໍລິເວນ ຄັ້ງນີ້ ສຸດທີ່ມີຄວາມສຳຄັນ ຈິ່ງໄດ້ຮຽກຮ້ອງໃຫ້ພະນັກງານການນໍາ ຄະນະຮັບຜິດຊອບທຸກສະຫາຍ ຈົ່ງເພີ່ມທະວີຄວາມສາມັກຄີເປັນປຶກແຜ່ນແໜ້ນ ໜາ ພ້ອມກັນສູ້ຊົນປະຕິບັດໜ້າທີ່ປົກປັກຮັກສາ ແລະ ພັດທະນາປະເທດຊາດ, ເອົາໃຈໃສ່ສືບຕໍ່ສັງລວມຂໍ້ມູນ-ເກັບກໍາຂໍ້ມູນ ໃຫ້ພຽງພໍ, ການກໍານົດແຜນຍຸດທະສາດ, ວິທີເຮັດວຽກ, ກໍານົດແຜນງານ,ກໍານົດໂຄງການ, ກິດຈະກໍາ, ແຜນງົບປະມານ ແລະ ມາດຕະການຈັດຕັ້ງປະຕິບັດ ລະຫວ່າງ ຂັ້ນກະຊວງ ກັບ ແຂວງກັບເມືອງ ແຕ່ລະຂະແໜ່ງການໃຫ້ສ້າງແຜນແມ່ບົດໃຫ້ສໍາເລັດ ເພື່ອພັດທະນາວຽກການສໍາຫຼວດ ແລະ ສ້າງແຜນພັດທະນາແບບກວມລວມທົ່ວເຂດພູພຽງບໍລິເວນ ໂດຍສະເພາະ ພັດທະນາກະສິກໍາ ທີ່ສະອາດ, ປອດສານພິດ ຕິດພັນກັບການຂະຫຍາຍເນື້ອທີ່ປູກປ່າໄມ້, ມີແຜນການຜະລິດເປັນສິນຄ້າ, ຫັດຖະກໍາຕໍ່າແຜນ, ການຈັກສານ ທີ່ຕະຫຼາດຮອງຮັບ, ສ້າງກິດຈະກໍາທ່ອງທ່ຽວ ໃຫ້ມີຄວາມຍືນຍົງທັນສະໄໝ, ລວມໄປເຖິງອັດຕາປະລະຂອງນັກຮຽນ ແລະ ຄ້າງຫ້ອງໃຫ້ລຸດລົງ, ການໂພສະນາການ, ການຕອບສະໜອງພະລັງງານ-ການຜະລິດ, ພັດທະນາສີມືແຮງງານ, ການສ້າງຊົນລະປະທານ, ສ້າງໂຄງການກັກກັນນໍ້າ, ຟື້ນຟູອະນຸລັກປ່າໄມ້, ສຸ່ມໃສ່ແຫຼ່ງທ່ອງທ່ຽວທີ່ມີເຂົ້າໃນການພັດທະນາສີມືແຮງງານ, ສ້າງສ່ວນເຕັກນິກວິຊາຊີບຂອງການສຶກສາ, ກວດຄືນຜັງເມືອງ, ກໍານົດເປົ້າ ໝາຍທີ່ຈະຂະຫຍາຍເສັ້ນທາງ, ກໍາໄດ້ໜໍແໜ່ງປະກົດການຫຍໍ້ທໍ້ຕ່າງໆທີ່ອາດຈະເກີດຂື້ນເຊັ່ນ: ຂີ້ລັກງັດແງະ, ບັນຫາຢາເສບຕິດ, ການສວຍໃຊ້ສາດສະໜາອື່ນໆເຫຼົ່ານີ້ເປັນຕົ້ນ.
Editor: ກຳປານາດ ລັດຖະເຮົ້າ
