ໃນວັນທີ 3 ສິງຫາ ທີ່ຜ່ານມານີ້ ທ່ານ ພົນໂທ ຈັນສະໝອນ ຈັນຍາລາດ, ກໍາມະການກົມການເມືອງສູນກາງພັກ, ລັດຖະມົນຕີ ກະຊວງປ້ອງກັນປະເທດ ໄດ້ຕ້ອນຮັບການເຂົ້າຢ້ຽມຂ່ໍານັບ ຂອງທ່ານ ວັງ ເວີນ ທຽນ, ເອກອັກຄະລັດຖະທູດ ແຫ່ງ ສາທາລະນະລັດ ປະຊາຊົນຈີນ ຄົນໃໝ່ ປະຈຳ ສາທາລະນະລັດ ປະຊາທິປະໄຕ ປະຊາຊົນລາວ
ຊຶ່ງກ່ອນອື່ນທ່ານ ພົນໂທ ຈັນສະໝອນ ຈັນຍາລາດ ກໍ່ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ພ້ອມທັງຕີລາຄາສູງຕໍ່ທ່ານ ວັງ ເວີນ ທຽນ ທີ່ໄດ້ຮັບໜ້າທີ່ຕໍາແໜ່ງເປັນເອກອັກຄະລັດຖະທູດ ປະຈໍາ ສາທາລະນະລັດ ປະຊາທິປະໄຕ ປະຊາຊົນລາວ ໃນຄັ້ງນີ້ ແລະ ຫັວງຢ່າງຍິ່ງວ່າທ່ານຈະສຸມທຸກຄວາມສາມາດ ແລະ ສະຕິປັນຍາ ເພື່ອເສີມຂະຫຍາຍສາຍພົວພັນ ລະຫວ່າງ ສອງປະເທດທີ່ມີມາແຕ່ດົນນານໃຫ້ມີບາດກ້າວຂະຫຍາຍຕົວຂຶ້ນເລື້ອຍໆ
ໃນໂອກາດນີ້ ທ່ານ ວັງ ເວີນ ທຽນ ກໍ່ໄດ້ກ່າວຄວາມຂອບອົກຂອບໃຈຕໍ່ການຕ້ອນຮັບອັນອົບອຸ່ນໃນຄັ້ງນີ້ພ້ອມທັງ ໄດ້ໃຫ້ຄຳໝັ້ນສັນຍາວ່າຈະສຸມທຸກຄວາມສາມາດເຂົ້າໃນການຮ່ວມືຊ່ວຍເຫຼືອເຊິ່ງກັນ ແລະ ກັນ ໃຫ້ກ້າວເຂົ້າສູ່ລວງເລິກ.

Editor: ດາວໄຊ ສີວິໄລ.