ບັ້ນດຳເນີນຊີວິດການເມືອງ ປັບປຸງປົວແປງທົ່ວອົງຄະນະພັກເມືອງວັງວຽງ ແຂວງວຽງຈັນ ໄດ້ເປີດ ຂຶ້ນນັບແຕ່ວັນທີ 19 ກໍລະກົດ ເປັນຕົ້ນມາແລະໄດ້ສຳເລັດລົງໃນວັນທີ 25 ກໍລະກົດ 2017 ຜ່ານມາ, ໂດຍພາຍໃຕ້ການເປັນປະທານຂອງ ທ່ານ ວີດົງ ໄຊຍະສອນ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໆວຽງຈັນ, ມີບັນດາສະຫາຍຄະນະປະຈຳພັກ, ກຳມະການພັກເມືອງ, ເລຂາຄະນະພັກຮາກຖານ, ເລຂາໜ່ວຍພັກ, ຫົວໜ້າຫ້ອງການ, ອົງການ.ກົມກອງ, ພະນັກຫຼັກແຫຼ່ງໃນທົ່ວເມືອງວັງວຽງ ເຂົ້າຮ່ວມຈຳນວນ 210 ສະຫາຍ, ຍິງ 19 ສະຫາຍ.
ໃນວາລະດໍາເນີນ ທ່ານ ຄໍາຜອງ ດວງວິໄລ ກໍາມະການພັກແຂວງເລຂາພັກເມືອງ ເຈົ້າເມືອງໆວັງວຽງ ໄດ້ເປີດກອງປະຊຸມຢ່າງເປັນທາງການພ້ອມທັງເຜີຍແຜ່ເອກະສານເດັດດ່ຽວປົວແປງພັກ ເຊິ່ງມີຄວາມໝາຍຄວາມສຳຄັນທີ່ສຸດເພາະມັນເປັນມູນເຊື້ອ ແລະ ທັງແມ່ນຫຼັກການນຳພາຂອງພັກ ໂດຍມີການໝູນໃຊ້ລັດທິມາກ-ເລນິນເປັນເຂັມຊີ້ທິດເຍືອງທາງ, ທັງແມ່ນຄວາມຮຽກຮ້ອງຕ້ອງການອັນຮີບດ່ວນເພຶ່ອປັບປຸງ,ປົວແປງ ແລະ ເຊີດຊູຄວາມຮັບຜິດຊອບຂອງຄະນະພັກແຕ່ລະຂັ້ນ, ສະມາຊິກພັກແຕ່ລະສະຫາຍ, ທັງແມ່ນຄວາມຈຳເປັນພາວະວິໄສຂອງພັກເຮົາ ໃນພາລະກິດປ່ຽນແປງໃໝ່ ໂດຍສະເພາະແມ່ນການເປີດປະຕູເພື່ອເຊື່ອມໂຍງກັບສາກົນ, ສະນັ້ນເພື່ອເຮັດໃຫ້ບັ້ນດຳເນີນຊີວິດການເມືອງ ປັບປຸງປົວແປງພັກຄັ້ງນີ້ມີເນື້ອໃນເລິກເຊິ່ງເຖິງຖອງ, ແກ້ໄຂຈຸດອ່ອນ, ຂໍ້ບົກຜ່ອງ, ສິ່ງທ້າທາຍພາຍໃນພັກ, ສ້າງພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ, ສືບຕໍ່ນຳພາພາລະກິດປົກປັກຮັກສາ ແລະ ພັດທະນາເມືອງວັງວຽງ ໃຫ້ນັບມື້ນັບເຂັ້ມແຂງ. ຈາກນັ້ນບັນດາສະຫາຍໃນຄະນະບໍລິຫານງານພັກເມືອງຈະໄດ້ຂຽນໃບສຳຫຼວດ, ແບ່ງໜ່ວຍ, ຜ່ານ ແລະ ປະກອບຄຳເຫັນໃສ່ບົດສຳຫຼວດບຸກຄົນ ທາບທາມຫາງສຽງຄວາມໄວ້ວາງໃຈ ຂອງຄະນະບໍລິຫານງານພັກແຂວງ, ຄະນະບໍລິຫານງານພັກເມືອງ.
ຜ່ານບັ້ນດຳເນີນຊີວິດການ ເມືອງປັບປຸງປົວແປງພັກທົ່ວ ອົງຄະນະພັກເມືອງເປັນເວລາ 5 ວັນ ເຫັນວ່າ ແມ່ນໄດ້ຮັບໝາກຜົນສູງ ສາມາດເຫັນໄດ້ເຖິງດ້ານດີດ້ານອ່ອນ ແລະ ຂໍ້ຄົງຄ້າງທີ່ຈະຕ້ອງໄດ້ແກ້ໄຂ ເປັນຕົ້ນແມ່ນດ້ານຄຸນທາດການເມືອງ ສິນທຳປະຕິວັດ, ນ້ຳໃຈເສຍສະຫຼະ ເພື່ອຜົນປະໂຫຍດສ່ວນລວມ ຄວາມຮັບຜິດຊອບດ້ານການເມືອງ ແບບແຜ່ນວິທີການນຳພາ ວິທີການເຮັດວຽກ ແບບແຜນດຳເນີນຊີວິດການເມືອງ ຄວາມເປັນແບບຢ່າງຂອງຄະນະພັກ ຄະນະນຳຈຳນວນໜຶ່ງ. ຜ່ານການດຳເນີນຊີວິດການເມືອງ ສຳຫຼວດຕີລາຄາຈັດປະເພດ ແບບເປີດເຜີຍ ແລະ ປິດລັບສາມາດຈັດປະເພດຂອງຄະນະພັກ, ການນຳຂັ້ນເມືອງ ເປົ້າໝາຍ ຈຳນວນ 35 ສະຫາຍ, ຍິງ 3 ສະຫາຍ ໃນນັ້ນປະເພດແຂງ 69 ສ່ວນຮ້ອຍ ແລະ ປະເພດກາງ 31 ສວນຮ້ອຍ, ເຫດຜົນຍ້ອນການຈັດຕັ້ງປະຕິບັດວຽກງານບາງດ້ານບໍ່ສຳເລັດຜົນ ເປັນຕົ້ນແມ່ນຂົງເຂດເສດຖະກິດ.
ຕອນທ້າຍກອງປະຊຸມ ຍັງໄດ້ຮັບຟັງການໂອ້ລົມ ຂອງສະຫາຍ ບຸນສອນ ເພັດລາວັນ ຄະນະປະຈຳພັກແຂວງ, ຮອງເຈົ້າແຂວງໆວຽງຈັນ ໂດຍສະຫາຍໄດ້ຍົກໃຫ້ເຫັນການຊີ້ນຳໆພາຂອງອົງຄະນະພັກເມືອງວັງວຽງ ໃນໄລຍະຜ່ານມາ ແລະ ເພຶ່ອເປັນທິດທາງ ໃນການຈັດຕັ້ງປະຕິບັດວຽກງານໃນຕໍ່ໜ້າ.
ຂອບໃຈທີມຂ່າວ: ເມືອງວັງວຽງ
Editor: ກຳປານາດ ລັດຖະເຮົ້າ
