ກອງປະຊຸມຜູ້ແທນຂັ້ນສູງ ລະຫວ່າງ ແຂວງບໍລິຄຳໄຊ ສປປ ລາວ ກັບແຂວງເຫງະອານ ສສ ຫວຽດນາມ ໄດ້ຈັດຂື້ນໃນວັນທີ 2 ສິງຫາ 2017 ຜ່ານມາ ຢູ່ທີ່ຫ້ອງປະຊຸມເບີສອງສະໂມສອນແຂວງ ຝ່າຍແຂວງບໍລິຄຳໄຊ ນຳໂດຍທ່ານ ປະລິນຍາເອກ ກອງແກ້ວ ໄຊສົງຄາມ ກຳມະການສູນກາງພັກ, ເລຂາພັກແຂວງເຈົ້າແຂວງບໍລິຄຳໄຊ, ພ້ອມຄະນະ ຝ່າຍແຂວງ ເຫງະອານ ເຊິ່ງນຳໂດຍ ທ່ານ ຮອງສາສະດາຈານ ປະລິນຍາເອກ ຫງວຽນ ດັກ ວິງ ກຳມະການສູນກາງພັກ ກອມມູນິດຫວຽດນາມ ເລຂາພັກ ແຂວງເຫງະອານ, ພ້ອມຄະນະ ມີບັນດາຄະນະຜູ້ແທນທັງສອງຝ່າຍຂົ້າຮ່ວມ.
ບົນເນື້ອໃນຈິດໃຈແຫ່ງຄວາມເຊື່ອໝັ້ນ ຈິງໃຈ ແລະ ຄວາມເຂົ້າອົກເຂົ້າໃຈເຊິ່ງກັນ ແລະ ກັນ ກອງປະຊຸມສອງຝ່າຍໄດ້ລາຍງານໃຫ້ກັນຊາບ ກ່ຽວກັບສະພາບການພັດທະນາເສດຖະກິດ-ສັງຄົມ, ວຽກງານ ປກຊ-ປກສ, ວຽກງານກໍ່ສ້າງພັກ-ພະນັກງານ ແລະ ລະບົບການເມືອງຂອງແຕ່ລະແຂວງ, ພ້ອມທັງຕີລາຄາຄືນໝາກຜົນທີ່ຍາດມາໄດ້ ແລະ ບັນດາຂໍ້ຄົງຄ້າງໃນການຈັດຕັ້ງປະຕິບັດບົດບັນທຶກຜົນການຮ່ວມເຮັດວຽກ ລະຫວ່າງ ຄະນະຜູ້ແທນຂັ້ນສູງສອງແຂວງ ໄດ້ຮ່ວມກັນໃນຄັ້ງວັນທີ 18 ຕຸລາ 2012 ທີ່ ນະຄອນວິງ, ແຂວງເຫງະອານ ພ້ອມກັນນັ້ນສອງຄະນະໄດ້ຍິນດີ ຮັບຮອງເອົາ ຜົນການຮ່ວມມືໃນໄລຍະຜ່ານມາ ເຖິງວ່າຍັງພົບຄວາມຫຍຸ້ງຍາກແຕ່ຄະນະພັກ,ອຳນາດການປົກຄອງ ແລະ ປະຊາຊົນສອງແຂວງ ບໍລິຄຳໄຊ-ເຫງະອານ ກໍ່ໄດ້ສູ້ຊົນບຸກບືນ ແລະ ສາມາດຍາດມາໄດ້ຫຼາຍຜົນງານ ໃນບັນດາຂົງເຂດເສດຖະກີດ-ສັງຄົມ, ປັບປຸງວຽກງານ ປກຊ-ປກສ ປົກປັກຮັກສາເສັ້ນຊາຍແດນ, ວຽກງານກໍ່ສ້າງພັກ-ພະນັກງານ ແລະ ກໍ່ສ້າງລະບົບການເມືອງ, ໄປຄຽງຄູ່ກັນນັ້ນໃນການຮ່ວມມືໃນຕໍ່ໜ້າ ສອງແຂວງໄດ້ສ້າງເງື່ອນໄຂອຳນວຍຄວາມສະດວກໃຫ້ບັນດາພະແນກ, ຂະແໜງການ, ການຈັດຕັ້ງ, ວິສາຫະກິດ ແລະ ກົມກອງອ້ອມຂ້າງສອງແຂວງ ໄດ້ພົບປະແລກປ່ຽນຖອດຖອນບົດຮຽນ ແລະ ຊ່ວຍເຫຼືອເຊິ່ງກັນ ແລະ ກັນ, ເພີ່ມທະວີປະສານສົມທົບແລກປ່ຽນ ແລະ ຮ່ວມມືກັນໃນຂົງເຂດເສດຖະກິດ, ການຄ້າ,ການທ່ອງທ່ຽວ ແລະ ການສຶກສາ ໂດຍສະເພາະແມ່ນຂົງເຂດວຽກງານ ປກຊ-ປກສ, ຈັດຕັ້ງປະຕິບັດຫຼາຍຈິດຈະການ ແລະ ແຜນການໃນການປະສານສົມທົບ ຢູ່ສອງເບື້ອງຊາຍແດນໃຫ້ໄດ້ຮັບຜົນດີ ຕັ້ງໜ້າປະກອບ ສ່ວນຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຢູ່ຕາມບໍລິເວນຊາຍແດນຢ່າງຮອບດ້ານ. ກອງປະຊຸມໃນຄັ້ງນີ້ຜູ້ແທນແຕ່ລະຝ່າຍ ກໍ່ໄດ້ປະກອບຄວາມຄິດ, ຄວາມເຫັນຢ່າງກົງໄປກົງມາ ຕໍ່ບົດລາຍງານຂອງສອງແຂວງ ແລະ ເນື້ອໃນຮ່າງບົດບັນທຶກຮ່ວມມືກັນໃນຕໍ່ໜ້າ ພ້ອມກັນນັນກໍ່ໄດ້ລົງນາມ ໃນບົດບັນທຶກການຮ່ວມມື ເພື່ອເປັນບ່ອນອິງໃຫ້ແກ່ ການຈັດຕັ້ງປະຕິບັດໃນຂັ້ນຕໍ່ໄປ ຝ່າຍແຂວງບໍລິຄຳໄຊ ລົງນາມໂດຍ ທ່ານ ປະລິນຍາເອກ ກອງແກ້ວ ໄຊສົງຄາມ, ຝ່າຍແຂວງເຫງະອານລົງນາມໂດຍ ທ່ານ ຮອງສາສະດາຈານ ປະລິນຍາເອກ ຫງວຽນ ດັກ ວິງ ໂດຍຊ່ອງໜ້າຄະນະຜູ້ແທນທັງສອງຝ່າຍຮ່ວມເປັນສັກຂີພິຍານ.
Editor: ກຳປານາດ ລັດຖະເຮົ້າ
