ບັ້ນດຳເນີນຊີວິດການເມືອງ ປັບປຸງປົວແປງໜ່ວຍພັກເສດຖະກິດ ເມືອງວັງວຽງ ແຂວງວຽງຈັນ ໄດ້ເປີດຂຶ້ນ ໃນລະຫວ່າງ ວັນທີ 1-3 ສິງຫາ 2017 ແລະ ໄດ້ສຳເລັດລົງໃນທິດຜ່ານມານີ້, ໂດຍພາຍໃຕ້ການເປັນປະທານຂອງ ທ່ານ ບຸນຈັນ ມາລາວົງ ຮອງເລຂາພັກເມືອງ ຮອງເຈົ້າເມືອງໆວັງວຽງ ມີບັນດາສະຫາຍສະມາຊິກພັກ ໜ່ວຍພັກເສດຖະກິດ ເຊິ່ງມີ 3 ພາກສ່ວນຄື: ຫ້ອງການ-ການເງິນ, ທະນາຄານສົ່ງເສີ່ມກະສິກຳ, ທະນາຄານການຄ້າ ເຂົ້າຮ່ວມ ຈຳນວນ 23 ທ່ານ, ຍິງ 8 ທ່ານ.

ໃນວາລະດໍາເນີນ ທ່ານ ບຸນຈັນ ມາລາວົງ ຮອງເລຂາພັກເມືອງ ຮອງເຈົ້າເມືອງໆວັງວຽງ ໄດ້ເຜີຍແຜ່ເອກະສານເດັດດ່ຽວປົວແປງພັກ ເຊິ່ງມີຄວາມໝາຍຄວາມສຳຄັນທີ່ສຸດເພາະມັນເປັນມູນເຊື້ອ ແລະ ທັງແມ່ນຫຼັກການນຳພາຂອງພັກ ໂດຍມີການໝູນໃຊ້ລັດທິມາກ-ເລນິນເປັນເຂັມຊີ້ທິດເຍືອງທາງ, ທັງແມ່ນຄວາມຮຽກຮ້ອງຕ້ອງການອັນຮີບດ່ວນເພຶ່ອປັບປຸງ,ປົວແປງ ແລະ ເຊີດຊູຄວາມຮັບຜິດຊອບຂອງຄະນະພັກແຕ່ລະຂັ້ນ, ສະມາຊິກພັກແຕ່ລະສະຫາຍ, ທັງແມ່ນຄວາມຈຳເປັນພາວະວິໄສຂອງພັກເຮົາ ໃນພາລະກິດປ່ຽນແປງໃໝ່ ໂດຍສະເພາະແມ່ນການເປີດປະຕູເພື່ອເຊື່ອມໂຍງກັບສາກົນ, ສະນັ້ນເພື່ອເຮັດໃຫ້ບັ້ນດຳເນີນຊີວິດການເມືອງ ປັບປຸງປົວແປງພັກຄັ້ງນີ້ມີເນື້ອໃນເລິກເຊິ່ງເຖິງຖອງ, ແກ້ໄຂຈຸດອ່ອນ, ຂໍ້ບົກຜ່ອງ, ສິ່ງທ້າທາຍພາຍໃນພັກ, ສ້າງພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ, ສືບຕໍ່ນຳພາພາລະກິດປົກປັກຮັກສາ ແລະ ພັດທະນາ ໜ່ວຍພັກເສດຖະກິດ ໃຫ້ນັບມື້ນັບເຂັ້ມແຂງ.

ຈາກນັ້ນ ບັນດາສະຫາຍໃນໜ່ວຍພັກເສດຖະກິດ ຈະໄດ້ຂຽນໃບສຳຫຼວດ, ແບ່ງໜ່ວຍ, ຜ່ານ ແລະ ປະກອບຄຳເຫັນໃສ່ບົດສຳຫຼວດບຸກຄົນ ທາບທາມຫາງສຽງຄວາມໄວ້ວາງໃຈ ຂອງ ຄະນະບໍລິຫານງານພັກເມືອງ ຄະນະໜ່ວຍພັກ,ຄະນະຫ້ອງການ, ຫົວໜ້າໜ່ວຍງານ.

ຜ່ານການດຳເນີນຊີວິດການເມືອງ ສຳຫຼວດຕີລາຄາຈັດປະເພດ ພາຍໃນໜ່ວຍພັກເສດຖະກິດ ຈຳນວນ 23 ສະຫາຍ, ຍິງ 8 ສະຫາຍ ສາມາດຈັດປະເພດແຂງ 23 ສະຫາຍ ເຫດຜົນຍ້ອນການຈັດຕັ້ງປະຕິບັດ ໜ້າທີ່ມີຄວາມໂປ່ງໃສ ເປັນຕົ້ນແມ່ນວຽກງານເສດຖະກິດ.

ຕອນທ້າຍກອງປະຊຸມ ຍັງໄດ້ຮັບຟັງການໂອ້ລົມ ຂອງ ທ່ານ ບຸນຈັນ ມາລາວົງ ຮອງເລຂາພັກເມືອງ ຮອງເຈົ້າເມືອງໆວັງວຽງ ໂດຍສະຫາຍໄດ້ຍົກໃຫ້ເຫັນການຊີ້ນຳໆພາຂອງອົງຄະນະພັກເມືອງວັງວຽງ ໃນໄລຍະຜ່ານມາ ແລະ ເພຶ່ອເປັນທິດທາງ ໃນການຈັດຕັ້ງປະຕິບັດວຽກງານໃນຕໍ່ໜ້າ.

Editor: ກຳປານາດ ລັດຖະເຮົ້າ