ຕົ້ນເດືອນ ສິງຫາ 2017 ນີ້, ຄະນະຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງຄຳ ໄດ້ເປີດກອງປະຊຸມທາບທາມຄະແນນສຽງ ຄະນະຫ້ອງການຂອງຕົນຂື້ນ ໂດຍພາຍໃຕ້ການເປັນປະທານຂອງ ທ່ານ ຄຳປານ ພົມມະວອນ ກຳມະການພັກເມືອງ, ຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງ, ມີທ່ານ ຄຳພາ ໄຊຍະແສງ ຫົວໜ້າຈັດຕັ້ງພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງຊຽງຂວາງ, ມີຄະນະຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງ, ມີອົງການທີ່ກ່ຽວຂ້ອງຂັ້ນເມືອງ ພ້ອມດ້ວຍພະນັກງານລັດຖະກອນຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເຂົ້າຮ່ວມຢ່າງພ້ອມພຽງ.

ທ່ານ ຄຳພາ ໄຊຍະແສງ ຫົວໜ້າຈັດຕັ້ງພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງຊຽງຂວາງ ກໍ່ໄດ້ຂື້ນຊີ້ແຈ້ງເຖິງການປັງປຸງໂຄງລ່າງຂອງຫ້ອງການໃຫ້ຮູ້ວ່າ: ຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງຄຳ ຍັງພົບຄວາມຫຍຸ້ງຍາກໃນການຈັດຕັ້ງປະຕິບັດໜ້າທີ່ວຽກງານຕ່າງໆ ຂອງຫ້ອງການພ້ອມນີ້ຍັງຍົກໃຫ້ເຫັນເຖິງຄວາມໝາຍຄວາມສຳຄັນໃນການປັບປຸງໃນຄັ້ງນີ້ກໍ່ເພື່ອແນໃສ່ການພັດທະນາວຽກງານຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໃຫ້ມີບາດກ້າວຂະຫຍາຍ ຂື້ນເລື່ອຍໆ. ຫຼັງຈາກນັ້ນ ທ່ານ ບົວພອນ ອ່ອນມະນີ ຮອງຫົວໜ້າຫ້ອງການພາຍໃນເມືອງກໍ່ໄດ້ຂື້ນຜ່ານມາດຖານ ເງື່ອນໄຂຂອງຜູ້ເຂົ້າສະໝັກ ແລະ ມີຜູ້ເຂົ້າຮ່ວມ ສະໝັກທັງໝົດ 3 ທ່ານຄື: ທ່ານ ພວງວິໄລ ບຸນຈັນທະລັງສີ, ທ່ານ ຄຳໃບ ແສງຈັນເພັງ ແລະ ທ່ານນາງ ສອນນີ ຂັນທະວົງໄຊ ເຊິ່ງເລືອກເອົາ 1 ທ່ານ ຫຼັງຈາກນັ້ນ, ກໍ່ໄດ້ມີການປ່ອນບັດ ທາບທາມຄະແນນສຽງ ຜ່ານການປ່ອນບັດທາບທາມຄະແນນສຽງເຊິ່ງເຫັນດີເປັນເອກະພາບເອົາ ທ່ານ ຄຳໃບ ແສງຈັນເພັງ ເປັນຄະນະຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງຄຳ.

ຕອນທ້າຍ ທ່ານ ຄຳປານ ພົມມະວອນ ຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ກໍ່ໄດ້ໃຫ້ກຽດຂື້ນໂອ້ລົມໃຫ້ຄຳຄິດຄຳເຫັນກ່ອນອື່ນໝົດທ່ານ ໄດ້ຍົກໃຫ້ເຫັນເຖິງຄວາມ ໝາຍຄວາມສຳຄັນການປັບປຸງໃນຄັ້ງນີ້ ພ້ອມທັງໃຫ້ທິດຊີ້ນຳແກ່ຜູ້ລົງສະໝັກຈົ່ງພ້ອມກັນເຕົ້າໂຮມຄວາມສາມັກຄີຮັກແພງຊ່ວຍເຫຼືອເຊິ່ງກັນ ແລະ ກັນ, ເອົາໃຈໃສ່ປະຕິບັດໜ້າວຽກງານຂອງຕົນທີ່ຂັ້ນເທິງໄດ້ມອບໝາຍໃຫ້ ນັ້ນໄດ້ຮັບຜົນສຳຂື້ນເທື່ອລະກ້າວ.

Editor: ກຳປານາດ ລັດຖະເຮົ້າ