ຄະນະບໍລິຫານງານສະຫະພັນແມ່ຍິງ ແຂວງ ສາລະວັນ ໄດ້ສະຫຼຸບຕີລາຄາການຈັດຕັ້ງປະຕິບັດວຽກງານໄລຍະ 6 ເດືອນຕົ້ນປີ ແລະ ວາງທິດທາງແຜນການໃນຕໍ່ໜ້າ, ເຊີ່ງໄດ້ຈັດຂຶ້ນໃນເມື່ອບໍ່ດົນນີ້ຢູ່ຫ້ອງປະຊຸມຊາວໜຸ່ມແຂວງ, ໂດຍການເປັນປະທານຂອງ ທ່ານ ນາງ ບຸນທະວີ ດວງລາສີ ຄະນະປະຈໍາພັກແຂວງ, ຄະນະບໍລິຫານງານສູນກາງສະຫະ ພັນແມ່ຍິງລາວ ປະທານສະຫະພັນແມ່ຍິງແຂວງ, ມີບັນດາຄະນະບໍລິຫານງານສະຫະພັນແມ່ຍິງແຂວງ ພ້ອມດ້ວຍປະທານສະຫະພັນແມ່ຍິງເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ນາງ ດວງມາລາ ສີສະໜຸດ ຮອງປະທານສະຫະພັນແມ່ຍິງແຂວງ ໄດ້ລາຍງານການຈັດຕັ້ງປະຕິບັດວຽກງານໃນໄລຍະ 6 ເດືອນຕົ້ນປີ 2017 ໂດຍລວມໄດ້ຖືເອົາການສຶກສາອົບຮົມການເມືອງແນວຄິດໃຫ້ພະນັກງານ, ສະມາຊິກສະຫະພັນແມ່ຍິງ ແລະ ເອື້ອຍນ້ອງແມ່ຍິງບັນດາເຜົ່າເປັນປົກກະຕິ, ເອົາໃຈໃສ່ສົ່ງເສີມວຽກງານພັດທະນາຊີວິດການເປັນຢູ່ເພື່ອແກ້ໄຂຄວາມທຸກຍາກໃຫ້ແມ່ຍິງ ແລະ ຄອບຄົວ ໄດ້ປະຕິບັດຕາມແຜນພັດທະນາຍືນຍົງຂອງສະຫະພັນແມ່ ຍິງລາວ 5 ປີ 2016-2020 ເຊີ່ງໄດ້ຫັນເປັນແຜນພັດທະນາຂອງແມ່ຍິງແຂວງສາລະວັນ ເປັນ VII ແຜນງານ, 23 ໂຄງການ ເປັນບ່ອນອີງໃຫ້ກັບການພັດທະນາແມ່ຍິງແຕ່ລະຂັ້ນ ໂດຍສະເພາະໄດ້ຊຸກຍູ້, ສົ່ງເສີມກິດຈະກຳຕ່າງໆຂອງເອື້ອຍນ້ອງແມ່ຍິງ, ຈັດຕັ້ງກຸ່ມການຜະລິດຕ່າງໆຂຶ້ນເຊັ່ນ: ກຸ່ມຫັດຖະກຳຕຳຫູກ, ການຈັກສານ, ການຖັກຟອຍ, ການປູກເຂົ້າ ແລະ ປູກພຶດຕ່າງໆເປັນຕົ້ນ: ໝາກອື, ມັນຕົ້ນ, ໝາກແຕງ ແລະ ພຶດຜັກຊະນິດຕ່າງໆ, ເດັ່ນກວ່າໜູ່ແມ່ນແມ່ຍິງເມືອງຕະໂອ້ຍຕຳແຜ່ນແພ 6 ເດືອນຜ່ານມາ ສາມາດສ້າງລາຍຮັບໄດ້ 10 ລ້ານກວ່າກີບ. ນອກນັ້ນຍັງໄດ້ສົ່ງເສີມແມ່ຍິງຜູ້ດ້ອຍໂອກາດໃນທົ່ວແຂວງເຂົ້າຮ່ວມຝຶກອົບຮົມວິຊາ ຊີບກ່ຽວກັບການຕັດຫຍີບ, ຕຳຫູກ, ປຸງແຕ່ງອາຫານ ແລະ ເສີມສວຍ ສ້າງສີມືແຮງງານໃຫ້ແມ່ຍິງດີຂຶ້ນເທື່ອລະກ້າວ. ນອກນັ້ນຍັງໄດ້ສ້າງຕັ້ງກອງທຶນຂັ້ນບ້ານ, ກອງທຶນຊ່ວຍເຫຼືອເຊີ່ງກັນ ແລະ ກັນ, ສ້າງເສດຖະກິດຄອບຄົວ, ສົ່ງເສີມການສຶກສາ ແລະ ອື່ນໆ ເປັນຕົ້ນທຶນໜູນວຽນເຂົ້າໃນການຜະລິດ ແລະ ສົ່ງເສີມໃນວຽກງານອື່ນໆ ປັດຈຸບັນມີເງິນຝາກກອງທຶນກຸ່ມທ້ອນທັງໝົດ 149 ລ້ານກວ່າກີບ, ມີສະມາຊິກ 45 ຄົນ, ມີກອງທຶນພັດທະນາຂັ້ນບ້ານ ມີທັງໝົດ 31 ບ້ານ ໃນ 4 ຕົວເມືອງ ມີສະມາຊິກ 1.904 ຄົນ, ມີເງິນກອງທຶນທັງໝົດ 521 ລ້ານກວ່າກີບ. ຄຽງຄູ່ກັນນີ້ກໍ່ໄດ້ຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງສະຫະພັນແມ່ຍິງລາວ ເຊີ່ງໄດ້ເປີດຂະບວນການແຂ່ງຂັນ 3 ດີ ໄດ້ທັງໝົດ 124 ຄັ້ງ, ມີ 103 ບ້ານ, ມີ 107 ໜ່ວຍ ແລະ ສາມາດປະເມີນຄັດເລືອກບຸກຄົນດີເດັ່ນໄດ້ 4.900 ຄົນ ແລະ ໜ່ວຍ 3 ດີ ໄດ້ 32 ໜ່ວຍ, ສາມາດສ້າງບ້ານ 3 ດີ ໄດ້ 22 ບ້ານ. ນອກນີ້ຍັງໄດ້ເອົາໃຈໃສ່ເຜີຍແຜ່ວຽກ ງານປົກປ້ອງສິດຜົນປະໂຫຍດຂອງ ແມ່ຍິງ ແລະ ເດັກນ້ອຍ, ການສົ່ງເສີມຄວາມສະເໜີພາບຍິງ-ຊາຍ, ການລືບລ້າງການໃຊ້ ຄວາມຮຸນແຮງຕໍ່ແມ່ຍິງ ແລະ ເດັກ ໃຫ້ທົ່ວເຖີງ ແລະ ທຸກຄົນໃນສັງຄົມໃຫ້ໄດ້ເຊື່ອມຊຶມເຂົ້າໃຈຢ່າງເລີກເຊີ່ງກ່ຽວກັບວຽກ ແມ່ ແລະ ເດັກຢູ່ແຂວງສາລະວັນ ໃຫ້ໄດ້ຮັບການຈັດຕັ້ງປະຕິບັດເທົ່າທຽມກັນ.
Editor: ດາວໄຊ ສີວິໄລ
