ຄະນະຜູ້ແທນການເມືອງ ຂັ້ນສູງກອງທັບປະຊາຊົນລາວ ນຳໂດຍ ທ່ານ ພົນຕີ ວິໄລ ຫຼ້າ ຄຳຟອງ ເລຂາທິການສູນກາງ ພັກປະຊາຊົນ ປະຕິວັດລາວ, ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ການ ເມືອງກອງທັບ ພ້ອມດ້ວຍຄະນະ ໄດ້ສຳເລັດການຢ້ຽມຢາມ ມິດຕະພາບຢູ່ ສສ ຫວຽດນາມ ຢ່າງເປັນທາງການ ແຕ່ວັນທີ 1-4 ສິງຫາ 2017 ທີ່ຜ່ານນີ້, ຕາມຄຳເຊີນຂອງ ທ່ານ ພົນໂທ ເລືອງ ເກື່ອງ ເລຂາທິການສູນກາງພັກ ກອມມູນິດຫວຽດນາມ, ຫົວໜ້າກົມໃຫຍ່ການເມືອງກອງທັບປະຊາຊົນຫວຽດນາມ. ພາຍຫຼັງສຳເລັດພິທີຕ້ອນ ຮັບຢ່າງເປັນທາງການ ໃນຕອນ ເຊົ້າຂອງວັນທີ 2 ສິງຫາ ທີ່ຜ່ານມາ. ຄະນະຜູ້ແທນການເມືອງຂັ້ນສູງທັງສອງຝ່າຍ ກໍໄດ້ພົບປະຫາລືເຊິ່ງ ກັນ ແລະ ກັນ ທ່ານ ພົນຕີ ວິໄລ ຫຼ້າຄຳຟອງ ໄດ້ສະແດງປິຕິ ຍິນດີເປັນຢ່າງຍິ່ງ ແລະ ເປັນ ກຽດຢ່າງສູງທີ່ໄດ້ເດີນທາງມາ ຢ້ຽມຢາມມິດຕະພາບຢ່າງເປັນ ທາງການຢູ່ ສສ ຫວຽດນາມໃນ ຄັ້ງນີ້ ເຊິ່ງໄດ້ນຳເອົາຄວາມສາມັກຄີຮັກແພງໄມຕີຈິດມິດຕະພາບອັນດູດດື່ມ ພ້ອມທັງສະແດງຄວາມຂອບອົກຂອບໃຈຕໍ່ການ ຕ້ອນ ຮັບອັນອົບອຸ່ນຂອງທ່ານ ພົນໂທ ເລືອງເກື່ອງ ເລຂາທິການສູນກາງພັກກອມມູນິດຫວຽດນາມ, ຫົວໜ້າກົມໃຫຍ່ການ ເມືອງກອງທັບປະຊາຊົນຫວຽດນາມ ພ້ອມຄະນະໃນຄັ້ງນີ້, ພ້ອມທັງສະແດງຄວາມເຊື່ອໝັ້ນວ່າ: ພາຍໃຕ້ການນຳພາອັນສະຫຼາດສ່ອງໃສຂອງພັກກອມມູນິດ ແລະ ປະຊາຊົນຫວຽດນາມ ກໍຄື ກອງທັບປະຊາຊົນຫວຽດ ນາມ ຈະສືບຕໍ່ຍາດໄດ້ຜົນສຳເລັດໃໝ່ໃຫຍ່ຫຼວງກວ່າເກົ່າໃນພາລະກິດ ປົກປັກຮັກສາ ແລະ ສ້າງສາພັດທະ ນາປະເທດຊາດຫວຽດນາມ, ສະແດງຄວາມເພິ່ງພໍໃຈ ແລະ ຕີລາຄາສູງຕໍ່ໝາກຜົນການພົວພັນ ສາມັກຄີພິເສດ ແລະ ການຮ່ວມມື ຮອບດ້ານ ລະຫວ່າງ ສອງພັກ, ສອງລັດ, ສອງກອງທັບ ແລະ ປະຊາຊົນສອງຊາດລາວ-ຫວຽດນາມ ທີ່ນັບມື້ຂະຫຍາຍ ຕົວສູ່ລວງເລິກ ໂດຍສະເພາະ ການຮ່ວມມືຊ່ວຍເຫຼືອເຊິ່ງກັນ ແລະ ກັນ ໃນຂົງເຂດວຽກງານພັກ-ວຽກງານການເມືອງ ແລະ ຂົງເຂດວຽກງານອື່ນໆລະຫວ່າງສອງກົມໃຫຍ່ການເມືອງ ກອງທັບປະຊາຊົນລາວ ແລະ ກົມໃຫຍ່ການເມືອງກອງທັບປະຊາຊົນຫວຽດນາມໃນສົກປີຜ່ານມາໃຫ້ບັນລຸໝາກຜົນໃນຫຼາຍ ດ້ານ. ສຳລັບແຜນການຮ່ວມມືລະຫວ່າງສອງກົມໃຫຍ່ການເມືອງ ກອງທັບປະຊາຊົນລາວ-ຫວຽດນາມ ໃນປີ 2017 ທີ່ສອງຝ່າຍ ໄດ້ຕົກລົງເປັນເອກະພາບຮັບຮອງເອົານັ້ນແມ່ນຢູ່ບົນພື້ນຖານປະຕິບັດຕາມແຜນການຮ່ວມມື ຂອງສອງກະ ຊວງປ້ອງກັນປະເທດລາວ-ຫວຽດນາມ ເຊິ່ງໃນ ຕໍ່ໜ້າທັງສອງຝ່າຍຈະສືບຕໍ່ແລກ ປ່ຽນຂໍ້ມູນຂ່າວສານ ແລະ ໂຄສະນາເຜີຍແຜ່ຜົນສຳເລັດດ້ານ ຕ່າງໆໃນໂອກາດວັນປະຫວັດ ສາດສຳຄັນຂອງຊາດ, ຂອງພັກ, ຂອງກອງທັບ, ສືບຕໍ່ແລກ ປ່ຽນ ຄະນະຜູ້ແທນໄປມາຢ້ຽມຢາມ ຖອດຖອນບົດຮຽນເຊິ່ງກັນ ແລະ ກັນ, ຊ່ວຍບຳລຸງກໍ່ສ້າງພະນັກງານໃຫ້ກັນ ແລະ ກັນ ພ້ອມນີ້ທັງສອງຝ່າຍຈະສືບຕໍ່ຮ່ວມສະເໜີ ຍ້ອງຍໍກົມກອງລວມໝູ່ ແລະ ບຸກຄົນໃຫ້ແຕ່ລະຝ່າຍທີ່ມີຜົນງານດີເດັ່ນໃນການປະກອບສ່ວນຢ່າງຕັ້ງໜ້າໃນວຽກງານ ຊຸກຍູ້ເພີ່ມທະວີສາຍພົວພັນມິດຕະ ພາບຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ, ສອງກອງທັບ ລາວ-ຫວຽດນາມໃນຕໍ່ໜ້າ ແລະ ຍາວນານ. ຄະນະຜູ້ແທນການເມືອງຂັ້ນ ສູງທັງສອງຝ່າຍຢືນຢັນວ່າ: ປີ 2017 ສອງພັກ, ສອງລັດ, ສອງກອງທັບ ລາວ-ຫວຽດນາມ ຈັດຕັ້ງສະເຫຼີມສະຫຼອງວັນປະຫວັດສາດຄື: ວັນເຊັນສົນທິສັນຍາມິດຕະພາບ ລາວ-ຫວຽດນາມ ຄົບ ຮອບ 40 ປີ(18/7/1977-18/7/2017) ແລະ ວັນສ້າງ ຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 50 ປີ(5/9/1962-5/9/2017) ດ້ວຍຫຼາຍກິດຈະກຳ ໂດຍສະ ເພາະແມ່ນຈັດການວາງສະແດງ ສິນຄ້າ, ສະແດງຮູບພາບ ແລະ ງານພົບປະອະດີດນັກສຶກສາ ກອງທັບປະຊາຊົນລາວທີ່ຮຽນ ຈົບຈາກໂຮງຮຽນກອງທັບປະຊາຊົນຫວຽດນາມ ປີ 2017.
Editor: ດາວໄຊ ສີວິໄລ
