ໃນເມື່ອບໍ່ດົນນີ້ ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ພ້ອມຄະນະ ໄດ້ຂີ່ເຮືອລົງສໍາຫຼວດຄອງລະບາຍນ້ຳບຶງທາດຫຼວງ ເລີ່ມແຕ່ຂົວຮ່ອງແກ ຫາຂົວບ້ານຈອມສີ ເມືອງໄຊເຊດຖາ ນະຄອນຫຼວງວຽງຈັນ ລວມໄລຍະທາງປະມານ 16 ກິໂລແມັດ ເພື່ອຊຸກຍູ້ວຽກງານການປ້ອງກັນ ແລະ ແກ້ໄຂໄພນ້ຳຖ້ວມໃນເຂດຕົວເມືອງວຽງຈັນ ໂດຍສະເພາະແມ່ນການຮັບມືກັບປະລິມານນ້ຳຝົນ ທີ່ເຫັນວ່າປີນີ້ຝົນມາໄວກວ່າປີຜ່ານມາ ເພື່ອສຳຫຼວດອອກແບບການພັດ ທະນາບຶງທາດຫຼວງໃນອະນາຄົດ ທີ່ຈະໃຊ້ເປັນຄອງນ້ຳວຽງຈັນ ສາມາດຮອງຮັບເປັນບ່ອນເກັບກັກບໍາບັດນໍ້າເປື້ອນຈາກຕົວເມືອງ ແລະ ພັດທະນາເປັນເຂດແຫຼ່ງທ່ອງທ່ຽວທຳມະຊາດ.
ຜ່ານການລົງຕິດຕາມຕົວຈິງ ທ່ານເຈົ້າຄອງນະຄອງຫຼວງ ໄດ້ຊີ້ນຳໃຫ້ຂະແໜງການທີ່ກ່ຽວຂ້ອງ ຈັດຕັ້ງປະຕິບັດຕາມແຜນພັດທະນາຂອງນະຄອນຫຼວງ ໂດຍສະເພາະ ການສ້າງຕົວເມືອງທີ່ໜ້າຢູ່ ແລະ ຍືນຍົງ ການພັດທະນາຄອງລະບາຍນ້ຳໄລຍະ 19 ກິໂລແມັດ ໃຫ້ເປັນແຫຼ່ງກະສິກຳປູກໄມ້ໃຫ້ໝາກ ໂດຍສະເພາະ ປູກຕົ້ນໝາກພ້າວ ແລະ ປູກຫຍ້າສະໜອງໃຫ້ການລ້ຽງສັດເປັນສິນຄ້າ ເຊິ່ງການປູກຫຍ້າແມ່ນໃຫ້ປູກເປັນແລວ ແລະ ເປັນຜັງດຽວກັນ ເນື່ອງຈາກໃນອະນາ ຄົດຂ້າງໜ້າ ນະຄອນຫຼວງມີເປົ້າໝາຍຈະພັດທະນາເຂດຄອງນ້ຳບຶງທາດຫຼວງ ໃຫ້ກາຍເປັນສະຖານທີ່ທ່ອງທ່ຽວທີ່ມີຄວາມສວຍງາມ ແລະ ສະອາດ ເພື່ອຕ້ອນຮັບແຂກພາຍໃນ ແລະ ຕ່າງປະເທດທີ່ມາທ່ອງທ່ຽວຕົວເມືອງນະຄອນຫຼວງວຽງຈັນ ໂດຍສະເພາະແມ່ນການກະກຽມໃສ່ການສະເຫຼີມສະຫຼອງເມືອງວຽງຈັນ ຄົບຮອບ 500 ປີ ໃນປີ 2050.
Editor: ດາວໄຊ ສີວິໄລ
