ໃນວັນທີ 9 ສິງຫາ ທີ່ຜ່ານມານີ້ ຫ້ອງການສຶກສາທິການ ແລະ ກິລາ ເມືອງ ລະຄອນເພັງ ໄດ້ຈັດກອງປະຊຸມຜູ້ບໍລິຫານການສຶກສາ ທົ່ວເມືອງ ປະຈໍາປີ 2017 ຢູ່ທີສະໂມສອນເມືອງ ໂດຍການເຂົ້າຮ່ວມເປັນປະທານ ຂອງທ່ານ ໜູໄຊ ຈັນດາວົງ ຮອງເຈົ້າເມືອງໆ ລະຄອນເພັງ ຜູ້ຊີ້ນໍາຂົງເຂດວັດທະນະທໍາ-ສັງຄົມເມືອງ, ເຂົ້າຮ່ວມມີທ່ານ ສົມຈິດ ເພັງສຸວັນນະວົງ ຮອງຫົວໜ້າພະແນກສຶກສາທິຫານ ແລະ ກິລາ ແຂວງ ສາລະວັນ, ທ່ານ ຄໍາຫວັນ ສີສະອາດ ວ່າການຫົວໜ້າຫ້ອງການສຶກສາທິຫານ ແລະ ກິລາ ເມືອງ ພ້ອມດ້ວຍຜູ້ບໍລິຫານການສຶກສາ ທົ່ວເມືອງ ແລະ ພາກສ່ວນກ່ຽວຂ້ອງ 111 ທ່ານ, ຍິງ 20 ທ່ານ.
ທ່ານ ນາງ ອໍລະດາ ແພງສີລິວົງ ຮອງຫົວໜ້າຫ້ອງການສຶກສາທິການ ແລະ ກິລາເມືອງ ໄດ້ຜ່ານບົດສະຫຼຸບການຈັດຕັ້ງປະຕິບັດແຜນພັດທະນາການສຶກສາ ປະຈໍາປີ 2017 ແລະ ທິດທາງແຜນການພັດທະນາການສຶກສາ ປະຈໍາປີ 2018 ໂດຍໃຫ້ຮູ້ວ່າ: ໃນປີ 2017 ທົ່ວເມືອງ ລະຄອນເພັງ ມີໂຮງຮຽນທັງໝົດ 85 ແຫ່ງ (ມີອະນຸບານ 4 ແຫ່ງ,ປະຖົມ 72 ແຫ່ງ, ມັດທະຍົມຕົ້ນ 6 ແຫ່ງ ແລະ ມັດທະຍົມສົມບູນ 3 ແຫ່ງ), ມີບຸກຄະລາກອນການສຶກສາທັງໝົດ 399 ຄົນ, 166 ຄົນ, ມີຄັງເງິນເດືອນ 352 ຄົນ,ຍິງ 147 ຄົນ ແລະ ອາສາສະໝັກ 47 ຄົນ, ຍິງ 21 ຄົນ; ມີນັກຮຽນທັງໝົດ 8.242 ຄົນ, ຍິງ 3.917 ຄົນ (ອະນຸບານ ແລະ ກຽມປະຖົມ 479 ຄົນ, ຍິງ 244 ຄົນ, ເພີ່ມຂຶ້ນ 1,8%, ປະຖົມ 5.144 ຄົນ, ຍິງ 2.536 ຄົນ, ຫຼຸດລົງ 0,10%, ມັດທະຍົມຕົ້ນ 1.841 ຄົນ, ຍິງ 866 ຄົນ, ເພີ່ມຂຶ້ນ 1%, ແລະ ມັດທະຍົມປາຍ 778 ຄົນ, ຍິງ 373 ຄົນ, ເພີ່ມຂຶ້ນ 6,80%); ສະເລ່ຍອັດຄູ ຕໍ່ນັກຮຽນ ( ຊັ້ນປະຖົມຄູ 1 ຄົນຕໍ່ນັກຮຽນ 26 ຄົນ, ມັດທະຍົມຕົ້ນຄູ 1 ຄົນຕໍ່ນັກຮຽນ 16 ຄົນ ແລະ ມັດທະຍົມປາຍຄູ 1 ຕໍ່ນັກຮຽນ 21 ຄົນ); ອັດຕາເຂົ້າຮຽນ ຊັ້ນອະນຸບານ ແລະ ກຽມປະຖົມ 19,10%, ປະຖົມ 99,5%, ມັດທະຍົມຕົ້ນ 58,10% ແລະມັດທະຍົມປາຍ 32,30%; ອັດຕາເລື່ອນຊັ້ນປະຖົມ 95%,ມັດທະຍົມຕົ້ນ 84,8% ແລະ ມັດທະຍົມປາຍ 90,70%... ພ້ອມນີ້ໄດ້ໃຫ້ເຫັນຄາດໝາຍສູ້ຊົນໃນປີ 2018 ໂດຍຈະສູ້ຊົນ: ເພີ່ມອັດຕາເຂົ້າຮຽນຂອງເດັກໃນເກນອາຍຸ 3-5 ປີຈາກ 19,10% ໃຫ້ເປັນ 25,90%; ຫຼຸດອັດຕາຄ້າງຫ້ອງໃນຊັ້ນປະຖົມຈາກ 5% ໃຫ້ເຫຼືອ 3,30%; ຫຼຸດອັດຕາປະລະການຮຽນຂອງນັກ ( ຊັ້ນປະຖົມຈາກ 4,10%ໃຫ້ເຫຼືອ 3,50%, ຊັ້ນມັດທະຍົມຕົ້ນຈາກ 15% ໃຫ້ເຫຼືອ 10,70% ແລະ ມັດທະຍົມປາຍຈາກ 9,2% ໃຫ້ເຫຼືອ 6,8% ຊັ້ນ ແລະອື່ນໆ.
Editor: ດາວໄຊ ສີວິໄລ
