ບັ້ນດຳເນີນຊີວິດການ ເມືອງ ປັບປຸງປົວແປງໜ່ວຍພັກ ລະບົບສົ່ງໄຟຟ້າ ແລະ ໜ່ວຍພັກ ສູນບໍລິການໄຟຟ້າ ເມືອງວັງວຽງ, ແຂວງວຽງຈັນ ໄດ້ເປີດຂຶ້ນນັບແຕ່ວັນທີ 7 ສິງຫາ ເປັນຕົ້ນມາແລະໄດ້ສຳເລັດລົງໃນວັນທີ 8 ສິງຫາ 2017 ຜ່ານມານີ້, ຢູ່ທີ່ສູນບໍລິການໄຟຟ້າ. ໂດຍພາຍໃຕ້ການເປັນປະທານຂອງ ທ່ານ ບຸນສີ ລັດດາວົງ ກຳມະການພັກເມືອງ, ຫົວໜ້າຫ້ອງການຈັດຕັ້ງເມືອງວັງວຽງ, ມີບັນດາ ສະມາຊິກພັກ ໜ່ວຍພັກສູນບໍລິການໄຟຟ້າ ຈຳນວນ 7 ທ່ານ, ຍິງ 1 ທ່ານ ແລະ ໜ່ວຍພັກ ລະບົບສົ່ງໄຟຟ້າ ຈຳນວນ 12 ທ່ານ, ມີສໍາຮອງ 1 ທ່ານ ເຂົ້າຮ່ວມ.

ໃນວາລະດໍາເນີນ ທ່ານ ບຸນສີ ລັດດາວົງ ກຳມະການພັກເມືອງ, ຫົວໜ້າຫ້ອງການຈັດຕັ້ງເມືອງ ກໍ່ໄດ້ເຜີຍແຜ່ເອກະສານເດັດດ່ຽວປົວແປງພັກ ເຊິ່ງມີຄວາມໝາຍຄວາມສຳຄັນທີ່ສຸດເພາະມັນເປັນມູນເຊື້ອ ແລະ ທັງແມ່ນຫຼັກການນຳພາຂອງພັກ ໂດຍມີການໝູນໃຊ້ລັດທິມາກ-ເລນິນ ເປັນເຂັມຊີ້ທິດເຍືອງທາງ, ທັງແມ່ນຄວາມຮຽກຮ້ອງຕ້ອງການອັນຮີບດ່ວນເພຶ່ອປັບປຸງ,ປົວແປງ ແລະ ເຊີດຊູຄວາມຮັບຜິດຊອບຂອງຄະນະພັກແຕ່ລະຂັ້ນ, ສະມາຊິກພັກແຕ່ລະສະຫາຍ, ທັງແມ່ນຄວາມຈຳເປັນພາວະວິໄສຂອງພັກເຮົາ ໃນພາລະກິດປ່ຽນແປງໃໝ່ ໂດຍສະເພາະແມ່ນການເປີດປະຕູເພື່ອເຊື່ອມໂຍງກັບສາກົນ, ສະນັ້ນເພື່ອເຮັດໃຫ້ບັ້ນດຳເນີນຊີວິດການເມືອງ ປັບປຸງປົວແປງພັກຄັ້ງນີ້ ມີເນື້ອໃນເລິກເຊິ່ງເຖິງຖອງ, ແກ້ໄຂຈຸດອ່ອນ, ຂໍ້ບົກຜ່ອງ, ສິ່ງທ້າທາຍພາຍໃນພັກ, ສ້າງພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ, ສືບຕໍ່ນຳພາພາລະກິດປົກປັກຮັກສາ ແລະ ພັດທະນາ ໜ່ວຍພັກ ລະບົບສົ່ງໄຟຟ້າ ແລະ ໜ່ວຍພັກສູນບໍລິການໄຟຟ້າ ໃຫ້ນັບມື້ນັບເຂັ້ມແຂງ.

ຈາກນັ້ນບັນດາສະມາຊິກໃນໜ່ວຍພັກ ລະບົບສົ່ງໄຟຟ້າ ແລະ ໜ່ວຍພັກ ສູນບໍລິການໄຟຟ້າຈະໄດ້ຂຽນໃບສຳຫຼວດ, ແບ່ງໜ່ວຍ, ຜ່ານ ແລະ ປະກອບຄຳເຫັນໃສ່ບົດສຳຫຼວດບຸກຄົນ ທາບທາມຫາງສຽງຄວາມໄວ້ວາງໃຈ ຂອງ ຄະນະບໍລິຫານງານພັກເມືອງ. ຄະນະໜ່ວຍພັກ,ຄະນະຫ້ອງການ, ຫົວໜ້າໜ່ວຍງານ. ຜ່ານການດຳເນີນຊີວິດການເມືອງ ສຳຫຼວດຕີລາຄາຈັດປະເພດ ພາຍໃນໜ່ວຍພັກສູນບໍລິການໄຟຟ້າ ຈຳນວນ 7 ທ່ານ, ຍິງ 1 ທ່ານ, ສາມາດຈັດປະເພດແຂງ 7 ທ່ານ, ຍິງ 1 ທ່ານ ແລະ ໜ່ວຍພັກ ລະບົບສົ່ງໄຟຟ້າ ຈຳນວນ 12 ທ່ານ, ມີສໍາຮອງ 1 ທ່ານ ສາມາດຈັດປະເພດແຂງ 12 ທ່ານ.

ຕອນທ້າຍກອງປະຊຸມ ຍັງໄດ້ຮັບຟັງການໂອ້ລົມ ຂອງ ທ່ານ ບຸນປັນ ພົມມະວົງ ຮອງເລຂາພັກເມືອງ ປະທານແນວລາວສ້າງຊາດເມືອງວັງວຽງ ທັງເປັນສະມາຊິກສະພາປະຊາຊົນແຂວງວຽງຈັນ ໂດຍທ່ານໄດ້ຍົກໃຫ້ເຫັນການຊີ້ນຳໆພາຂອງອົງຄະນະພັກເມືອງວັງວຽງ ໃນໄລຍະຜ່ານມາ ແລະ ເພຶ່ອເປັນທິດທາງ ໃນການຈັດຕັ້ງປະຕິບັດວຽກງານໃນຕໍ່ໜ້າ.

Editor: ກຳປານາດ ລັດຖະເຮົ້າ