ກອງປະຊຸມໃຫ່ຍຄັ້ງທີ່ 2 ຂອງໜ່ວຍກຳມະບານຮາກຖານ ອົງການໄອຍາການ ປະຊາຊົນແຂວງເຊກອງ ໄດ້ໄຂຂຶ້ນ ແລະ ສຳເລັດລົງ ໃນວັນທີ 10 ສິງຫາ 2017 ຜ່ານມານີ້, ຢູ່ທີ່ຫ້ອງປະຊຸມອົງການດັ່ງກ່າວ, ເປັນກຽດເຂົ້າຮວ່ມຂອງ ທ່ານ ສຸວັນ ວິນາລັດ ຮອງປະທານສະຫະພັນກຳມະບານແຂວງ ເຊກອງ, ທ່ານ ປອ ສົມນິດ ສີລິບຸນລ້ຽງ ກໍາມະການພັກແຂວງ, ເລຂາຄະນະພັກຮາກຖານ ຫົວໜ້າອົງການໄອຍາການປະຊາຊົນແຂວງ ເຊກອງ, ມີອົງການຈັດຕັ້ງມະຫາຊົນ, ໜວ່ຍຮາກຖານກຳມະບານຂົງເຂດປົກປ້ອງກົດໝາຍອ້ອມຂ້າງແຂວງ ພອ້ມດ້ວຍສາມາຊິກກຳມະບານພາຍໃນອົງການດັ່ງກ່າວເຂົ້າຮວ່ມ.
ທ່ານ ແສງມະນີ ຕ່ອງບົວເກືອມ ປະທານໜ່ວຍກຳມະບານຮາກຖານ ໄດ້ລາຍງານການເຄື່ອນໄຫວຊີ້ນໍາ-ນໍາພາ ໜ່ວຍກໍາມະບານຮາກຖານ ອົງການໄອຍະການ ປະຊາຊົນ ແຂວງ ເຊກອງ ໃນໄລຍະ 3 ປີຜ່ານມາວ່າ: ຄະນະໜ່ວຍ ໄດ້ຖືເອົາວຽກງານການເມືອງແນວຄິດເປັນກົກ ເພື່ອສຶກສາອົບຮົມ ແລະ ຕໍານິສົ່ງຂ່າວ ຢ່າງເປັນປົກກະຕິ ເພື່ອເຮັດໃຫ້ສະມາຊິກກໍາມະບານ ກໍາ ແໜ້ນນະໂຍບາຍຂອງພັກ, ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີຈັນຍາບັນທີ່ຖືກຕ້ອງ ແລະ ເປັບແບບຢ່າງໃນການເຄົາລົບປະຕິບັດລະບຽບກົດໝາຍ ດ້ວຍການເອົາບັນດາມະຕິຄໍາສັ່ງ, ຄໍາແນະນໍາ ແລະ ແຈ້ງການ ຕ່າງໆຂອງຂັ້ນເທິງມາເຜີຍແຜ່ ໃຫ້ເຊື່ອມຊຶມ ແລະ ຈັດຕັ້ງປະຕິບັດຢ່າງກວ້າງຂວາງ, ພ້ອມນັ້ນ, ກໍ່ໄດ້ສຸມໃສ່ຈັດຕັ້ງປະຕິບັດຂໍ້ແຂ່ງຂັນ ຂອງອົງການຈັດຕັ້ງກໍາມະບານ ພ້ອມທັງຄັດເລືອກຜົນງານດີເດັ່ນປະຈໍາປີທຸກໆປີໃນກົມກອງ. ນອກນັ້ນ, ຍັງໄດ້ສຸມໃສ່ປະຕິບັດວຽກງານວິຊາສະເພາະ ສາມາດແກ້ໄຂຄະດີຕ່າງໆໃຫ້ບັນລຸ 95 ສ່ວນຮ້ອຍ, ຂຶ້ນໄປ ພ້ອມທັງປັບປຸງແບບແຜນວິທີເຮັດວຽກຂອງຕົນ, ຮັບປະກັນການແກ້ໄຂຄະດີໃຫ້ມີຄວາມວ່ອງໄວໂປ່ງໃສ ແລະ ມີຄວາມຍຸຕິທໍາ ເປັບແບບຢ່າງໃນການປະຕິບັດລະບຽບກົດໝາຍເຊັ່ນ ການຕິດຕາມກວດກາ ແລະ ການສັ່ງຟ້ອງຜູ້ຖືກຫາຂຶນສານ, ໄລຍະ 3 ປີຜ່ານມາ ໄດ້ຮັບສໍານວນຄະດີອາຍາທັງໝົດ 82 ເລື່ອງ ແລະໄດ້ແກ້ໄຂ ຈໍານວນ 81 ເລື່ອງ, ໃນນີ້, ສັ່ງຟ້ອງຂຶ້ນສານ 26 ເລື່ອງ, ຊັດມ້ຽນ 18 ເລື່ອງ, ສົ່ງເຈົ້າໜ້າທີ່ 35 ເລື່ອງ, ອອກຄໍາສັ່ງໂຈະ 2 ເລື່ອງ, ປະຈຸບັນຍັງຄ້າງ 1 ເລື່ອງ. ສໍາລັບຄະດີແພ່ງມີ 3 ເລື່ອງ ເຊິ່ງສາມາດແກ້ໄຂໄດ້ທັງໝົດ.
ໃນໂອກາດດຽວກັນນີ້ ທ່ານ ສຸວັນ ວິນາລັດ ຮອງປະທານສະຫະພັນກຳມະບານ ແຂວງ ເຊກອງ ກໍໄດ້ເນັ້ນໜັກໃຫ້ຄະນະໜ່ວຍຮາກຖານກຳມະບານ ຊຸດໃຫ່ມ ສືບຕໍ່ເອົາໃຈໃສ່ສຶກສາອົບຮົມແນວຄິດ-ການເມືອງ ໃຫ້ສາມາຊິກຂອງຕົນເປັນປົກກະຕິ ແລະ ຊີ້ນຳ-ນຳພາສາມາຊິກ ເອົາໃຈໃສ່ປະຕິບັດຕາມສິດ ແລະ ໜ້າທີ່ຂອງຕົນຢ່າງຕັ້ງໜ້າ, ເພື່ອປົກປອ້ງສິດຜົນປະໂຫຍດອັນຊອບທຳຂອງກຳມະກອນລາວ, ຊາວຜູ້ອອກແຮງງານລາວບັນດາເຜົ່າ ຕິດພັນກັບການປະຕິບັດຂໍ້ແຂ່ງຂັນ 5 ເປັນເຈົ້າ ຂອງສູນກາງກຳມະບານລາວວາງອອກ ໃຫ້ເປັນຂະບວນຟົດຟື້ນ.
Editor: ກຳປານາດ ລັດຖະເຮົ້າ
