ພິທີປາຖະກາຖາ ວັນລັດຖະທຳມະນູນແຫ່ງຊາດ ຄົບຮອບ 26 ປີ ( 15 ສິງຫາ 1991- 15 ສິງຫາ 2017 ) ໄດ້ຈັດຂື້ນໃນເຊົ້າວັນທີ 14 ສິງຫາ 2017 ທີ່ຜ່ານມາ ທີ່ສູນຮ່ວມມືສາກົນ ແລະ ຝຶກອົບຮົມ ( ໄອຊີທີຊີ ) ຫລັກ 5, ນະຄອນຫລວງວຽງຈັນ. ໂດຍໃຫ້ກຽດເປັນປະທານ ປາຖະກາຖາ ຂອງ ທ່ານ ສາດສະດາຈານ, ປະລິນຍາເອກ ຈະເລີນ ເຍຍປາວເຮີ ກຳມະການສູນກາງພັກ, ລັດຖະມົນຕີປະຈຳສຳນັກງານນາຍົກລັດຖະມົນຕີ, ໂຄສົກລັດຖະບານ ເຂົ້າຮ່ວມຮັບຟັງ ມີຄະນະນຳຈາກສະພາແຫ່ງຊາດ, ກຳມາທິການກົດຫມາຍ, ຄະນະກຳມາທິການແຜນການ, ການເງີນ ແລະ ການກວດສອບ ສະພາແຫ່ງຊາດ. ພະນັກງານຫລັກແຫລ່ງ ທີ່ກ່ຽວຂ້ອງຈາກສະພາແຫ່ງຊາດ, ຈາກກະຊວງ. ກົມກອງ ເຂົ້າຮ່ວມ
ດັ່ງທີ່ຮູ້ນຳກັນແລ້ວວ່າ: ລັດຖະທຳມະນູນແມ່ນຫມາກຜົນລວມຍອດ ຂອງການປະຕິວັດຊາດ ປະຊາທິປະໄຕ. ພາຍໃຕ້ການນຳພາຂອງພັກ ປະຊາຊົນ ປະຕິວັດລາວ, ເປັນຫມາກຜົນຂອງການຈັດຕັ້ງປະຕິບັດ ແນວທາງປ່ຽນແປງໃຫມ່ ຢ່າງຮອບດ້ານ ທີ່ມີຫລັກການ ຂອງພັກ, ເຂົ້າສູ່ວຽກງານຕົວຈິງ ຕາມລະບອບ ປະຊາທິປະໄຕ ປະຊາຊົນ. ການທີ່ ສປປ ລາວ ໄດ້ປະກາດລັດຖະທຳມະນູນ ສະບັບທຳອິດ ໃນປີ 1991 ແມ່ນເປັນຂິດຫມາຍ ທີ່ເປັນບາດລ້ຽວໃຫມ່ ຂອງການຄຸ້ມຄອງລັດ ດ້ວຍລັດຖະທຳມະນູນ ແລະ ກົດຫມາຍ; ລັດຖະທຳມະນູນ ໄດ້ກາຍເປັນກົດຫມາຍພື້ນຖານທີ່ສຳຄັນຂອງຊາດ, ລັດຖະທຳມະນູນ ໄດ້ກາຍເປັນຕົວແບບທີ່ສຳຄັນທາງນິຕິກຳ ແລະ ເປັນພື້ນຖານແກ່ການຂະຫຍາຍໃນຂະແຫນງການຕ່າງໆ ຫລື ການສ້າງລະບອບນິຕິກຳ ຂອງ ສປປ ລາວ ໃຫ້ຄ່ອຍໆ ເປັນລະບົບຄົບຊຸດ ຂື້ນເທື່ອລະບາດກ້າວ, ເປັນນິຕິກຳພື້ນຖານ ທີ່ກຳນົດລະບອບການເມືອງ, ເສດຖະກິດ ແລະ ສັງຄົມ, ປ້ອງກັນຊາດ-ປ້ອງກັນຄວາມສະຫງົບ, ການຕ່າງປະເທດ, ສິດ ແລະ ພັນທະພື້ນຸານ ຂອງພົນລະເມືອງ, ລະບົບການຈັດຕັ້ງຂອງລັດ.
ລັດຖະທຳມະນູນ ແຫ່ງ ສປປ ລາວ ໃນດ້ານທາດແທ້ ແມ່ນການສ້າງສະຕິຊາດ ເອກະພາບ ອັນເປັນຫນຶ່ງດຽວ ພາຍໃຕ້ການນຳພາຂອງພັກ, ຮັບຮູ້ ແລະ ປົກປ້ອງ ການດຳລົງຄົງຕົວ ທີ່ຕັດແຍກອອກຈາກກັນບໍ່ໄດ້ ຂອງປະຊາຊົນລາວ ບັນດາເຜົ່າ. ກຳນົດນະໂຍບາຍສາມັກຄີ ແລະ ຄວາມສະເຫມີພາບ ລະຫວ່າງຊົນເຜົ່າຕ່າງໆ, ທຸກຊົນເຜົ່າ ລ້ວນແຕ່ມີການປົກປັກຮັກສາ - ເສີມຂະຫຍາຍຮິດຄອງປະເພນີ ແລະ ວັດທະນະທຳອັນດີງາມ ຂອງຕົນ ແລະ ຂອງຊາດ ພ້ອມທັງສຶສາອົບຮົມປະຊາຊົນບັນດາເຜົ່າ ໃຫ້ຍົກສູງນ້ຳໃຈຮັກຊາດ, ຮັກລະບອບໃຫມ່, ເພີ່ມທະວີຄວາມສາມັກຄີປວງຊົນລາວທັງຊາດ, ເຊີດຊູບົດບາດ ເປັນເຈົ້າການ ໃນການປົກປັກຮັກສາ ແລະ ສ້າງສາປະເທດຊາດ, ເຮັດໃຫ້ປະຊາຊົນຮັ່ງມີຜາສຸກ, ປະເທດຊາດ ມັ້ງຄັ້ງເຂັ້ມແຂງ, ສັງຄົມມີຄວາມສາມັກຄີປອງດອງ, ປະຂາທິປະໄຕ, ຍຸຕິທຳ ແລະ ສິວິໄລ, ສ້າງປະຖົມປັດໄຈ ກ້າວຂື້ນສູ່ສັງຄົມນິຍົມ.
Editor: ກຳປານາດ ລັດຖະເຮົ້າ
