ເມື່ອບໍ່ດົນມານີ້, ຢູ່ທີ່ໂຮງຮຽນ ການເມືອງ-ການປົກຄອງ ແຂວງບໍລິຄຳໄຊ ໄດ້ຈັດກອງປະຊຸມປະເມີນຄຸນນະພາບ ຂອງພະນັກງານທີ່ຮຽນຈົບຈາກສະຖາບັນ ການເມືອງການປົກຄອງແຫ່ງຊາດ ສາຂາຕ່າງໆ ໃນໄລຍະຜ່ານມາ ໂດຍພາຍໃຕ້ການເປັນປະທານຂອງທ່ານນາງ ໃບຊຽ່ນ ມູນຕີວົງ ຫົວໜ້າກົມຈັດຕັ້ງ-ພະນັກງານ ສະຖາບັນການເມືອງການປົກຄອງແຫ່ງຊາດ, ທ່ານ ພູເຂົາເງິນ ອິນທະວົງ ກຳມະການພັກແຂວງ, ອຳນວຍການໂຮງຮຽນການເມືອງ-ການປົກຄອງແຂວງບໍລິຄຳໄຊ, ມີບັນດາເຈົ້າເມືອງອ້ອມຂ້າງ ຫົວໜ້າພະແນການ, ພະນັກງານວິຊາການອ້ອມຂ້າງເຂົ້າຮ່ວມຢ່າງພ້ອມພຽງ

ຈຸດປະສົງ ກໍ່ເພື່ອເກັບກຳຂໍ້ມູນການຝຶກອົບຮົມທິດສະດີການເມືອງ-ການປົກຄອງ ໃຫ້ແກ່ຄະນະພັກເມືອງ ເຈົ້າເມືອງມາປະກອບເຂົ້າໃນໂຄງການຫຼັກສູດ ເພື່ອນຳເອົາຂໍ້ມູນດັ່ງກ່າວ ມາຂຽນເປັນເນື້ອໃນເອກະສານ ຮັບໃຊ້ແກ່ການຝຶກອົບຮົມ ແນໃສ່ເຮັດໃຫ້ການຝຶກອົບຮົມຖືກຕ້ອງ ຕາມຄວາມຮຽກຮ້ອງຕ້ອງການ ແລະ ພຶດຕິກຳຕົວຈິງໃນແຕ່ລະໄລຍະ ເຮັດໃຫ້ໂຮງຮຽນການເມືອງ-ການປົກຄອງແຂວງ, ແລະ ນະຄອນຫຼວງ ສາມາດມີແບບແຜນນຳພາຄຸ້ມຄອງ ໃຫ້ເປັນເອກະພາບທາງດ້ານການເມືອງ-ແນວຄິດ ປະຕິບັດກົດໝາຍລະບຽບການເຂັ້ມງວດ, ໃນການຕິດຕາມກວດກາປະເມີນຜົນການຈັດ ຕັ້ງປະຕິບັດ ຫຼັກສູດການຮຽນການສອນ ແລະ ປັບປຸງແຜນການເຄື່ອນໄຫວແຕ່ລະໄລຍະ ໃຫ້ສອດຄ່ອງທັນກັບສະພາບຕົວຈິງ ເພື່ອປະເມີນຄຸນນະພາບຂອງນັກສຶກສາ ທີ່ຮຽນຈົບ ຈາກສະຖາບັນການເມືອງ-ການປົກຄອງແຫ່ງຊາດ ໃນໄລຍະຜ່ານມາ ທັງເປັນການເກັບກຳຂໍ້ມູນ ຊອກໃຫ້ເຫັນຄຸນນະພາບ ທາງດ້ານໝາກຜົນສໍາເລັດ ແລະ ຕີລາຄາຄືນ ຜົນການບໍາລຸງກໍ່ສ້າງພະນັກງານ ທາງດ້ານທິດສະດີການເມືອງ-ການປົກຄອງ ເພື່ອຈະໄດ້ສືບຕໍ່ສົ່ງເສີມ ແລະ ຜັນຂະຫຍາຍ ທັງຊອກໃຫ້ເຫັນຂໍ້ຄົງຄ້າງ ຫຼືຄວາມຫຍຸ່ງຫຍາກດ້ານຕ່າງໆ ໃນການປັບປຸງແກ້ໄຂໃຫ້ທັນກັບສະພາບການ.

Editor: ກຳປານາດ ລັດຖະເຮົ້າ