ໃນເມື່ອບໍ່ດົນນີ້ ທີ່ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ໃຫ້ ກຽດຕ້ອນຮັບການເຂົ້າຢ້ຽມຂ່ຳນັບ ຂອງທ່ານ ວັງ ເວິນ ທຽນ (Wang Wentian) ເອກອັກຄະລັດຖະທູດ ແຫ່ງ ສປ ຈີນ ປະຈຳລາວ, ພ້ອມດ້ວຍຄະນະ ໃນໂອກາດດຳລົງຕຳແໜ່ງ ເປັນເອກອັກຄະລັດຖະທູດຄົນໃໝ່ ປະຈຳ ສປປ ລາວ. ພາຍຫລັງທີ່ໄດ້ຢືນສານຕາຕັ້ງຕໍ່ທ່ານ ບຸນຍັງ ວໍລະຈິດ ປະທານປະເທດແຫ່ງ ສປປ ລາວ ເມື່ອ ເດືອນກໍລະກົດ ທີ່ຜ່ານມາ.
ໃນໂອກາດດັ່ງກ່າວ, ທ່ານ ບໍ່ແສງຄຳ ວົງດາລາ ໄດ້ສະແດງຄວາມຍິນດີຕ້ອນຮັບ, ຊົມເຊີຍຕໍ່ ທ່ານທູດ ພ້ອມທັງເຊື້ອໝັ້ນວ່າ ການມາດຳລົງຕຳແໜ່ງຂອງທ່ານທູດ ຈະເປັນການປະກອບສ່ວນສຳຄັນ ເຂົ້າໃນການເສີມຂະຫຍາຍ ສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືແບບຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານ ລະຫວ່າງ ສປປ ລາວ ແລະ ສປ ຈີນ ໃຫ້ມີບາດກ້າວຂະ ຫຍາຍຕົວຍິ່ງໆຂຶ້ນ. ນອກຈາກນີ້, ທັງສອງຝ່າຍ ຍັງໄດ້ແລກປ່ຽນຄຳເຫັນ ກ່ຽວກັບການຮ່ວມມື ຂະແໜງການສື່ມວນຊົນ, ວັດທະນະທຳ ແລະ ທ່ອງທ່ຽວ ເພື່ອດຶງດູດໃຫ້ການທ່ອງທ່ຽວຈີນ ໄດ້ມີໂອກາດ ມາທ່ອງທ່ຽວ ສປປ ລາວ ຫລາຍຂຶ້ນກວ່າເກົ່າ.
ພ້ອມດຽວດັນນີ້, ທ່ານທູດ ກໍໄດ້ສະແດງຄວາມຂອບໃຈ ຕໍ່ທ່ານ ບໍ່ແສງຄຳ ວົງດາລາ ໃນການຕ້ອນຮັບອັນອົບອຸ່ນ, ພ້ອມສະແດງຄວາມຢືນຢັນວ່າ ຈະສຸມທຸກຄວາມພະຍາຍາມ, ເຫື່ອແຮງ ແລະ ສະຕິປັນຍາເພື່ອປະກອບສ່ວນເຂົ້າ ໃນການເສີມຂະຫຍາຍສາຍພົວພັນ ແລະ ການຮ່ວມມື ໃຫ້ຈະເລີນງອກງາມ ຍິ່ງຂຶ້ນ.
Editor: ດາວໄຊ ສີວິໄລ
