ພິທີປະກາດເລື່ອນຊັ້ນ ໃຫ້ນາຍທະຫານຂັ້ນສູງ ຂອງກະຊວງປ້ອງກັນປະເທດ ຈໍານວນ 2 ທ່ານ ຈາກ ພົນຕີ ຂຶ້ນເປັນ ພົນໂທ ຄື: ທ່ານ ພົນຕີ ວິໄລ ຫລ້າຄໍາຟອງ, ຮອງລັດຖະມົນຕີ ກະຊວງປ້ອງກັນປະເທດ ຫົວໜ້າກົມໃຫຍ່ ການເມືອງກອງທັບ ແລະ ທ່ານ ພົນຕີ ສຸວອນ ເລື່ອງບຸນມີ, ຮອງລັດຖະມົນຕີ ກະຊວງປ້ອງກັນປະເທດ ຫົວໜ້າກົມໃຫຍ່ ເສນາທິການກອງທັບ ເລື່ອນຊັ້ນຂຶ້ນເປັນ ພົນໂທ.
ພິທີໄດ້ຈັດຂຶ້ນ ໃນເມື່ອບໍ່ດົນນີ້ ທີ່ ກະຊວງປ້ອງກັນປະເທດ ໃຫ້ກຽດປະດັບຊັ້ນ ໂດຍທ່ານ ພັນຄໍາ ວິພາວັນ ຮອງປະທານປະເທດ, ມີບັນດາການນໍາກະຊວງປ້ອງກັນປະເທດ, ນາຍ ແລະ ພົນທະຫານ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ໃນໂອກາດດຽວກັນນີ້, ທ່ານ ຮອງປະທານປະເທດ ໄດ້ໃຫ້ກຽດໂອ້ລົມ ຕໍ່ນາຍທະຫານຂັ້ນສູງ ທີ່ໄດ້ຮັບການເລື່ອນຊັ້ນໃໜ່ ແລະ ຜູ້ເຂົ້າຮ່ວມ, ຊຶ່ງການເລື່ອນຊັ້ນໃນຄັ້ງນີ້ ເນື່ອງຈາກເຫັນໄດ້ ພາລະບົດບາດໜ້າທີ່ ແລະ ຄວາມສໍາຄັນ ຂອງວຽກງານປ້ອງກັນຊາດ ໃນຊຸມປີທີ່ຜ່ານມາ ພັກ-ລັດຖະບານ ໄດ້ເອົາໃຈໃສ່ຢ່າງຕັ້ງໜ້າ ໃນການປັບປຸງກໍ່ສ້າງ ກໍາລັງປະກອບອາວຸດ ປ້ອງກັນຊາດ ທັງສາມປະເພດ ໃຫ້ເຂັ້ມແຂງໜັກແໜ້ນ ໂດຍສະເພາະ ໂຄງປະກອບການຈັດຕັ້ງ ແລະ ບຸກຄະລາກອນ ຂອງກອງທັບປະຊາຊົນລາວ ເວົ້າສະເພາະແມ່ນ ພະນັກງານຫລັກແຫລ່ງ ເພື່ອຮັບປະກັນ ການເຮັດໜ້າທີ່ການເມືອງ ຂອງຕົນໃນໄລຍະໃໜ່ ຕໍ່ໜ້າສະພາບເງື່ອນໄຂ ແວດລ້ອມຂອງໂລກ ແລະ ຄວາມຮຽກຮ້ອງຕ້ອງການຂອງສະພາບໃຫມ່ຢູ່ປະເທດເຮົາ.
ກົມການເມືອງສູນກາງພັກ ກໍຄື ລັດຖະມົນຕີ ຈຶ່ງໄດ້ຕົກລົງຍົກລະດັບ ຊັ້ນບຸກຄະລາກອນ ທີ່ເປັນພະນັກງານຫລັກແຫລ່ງຂັ້ນສູງຂອງກອງທັບ ແນ່ໃສ່ເຮັດໃຫ້ການ ຊີ້ນໍາ-ນໍາພາ ຂັ້ນມະຫາພາກ ຂອງກະຊວງປ້ອງກັນປະເທດ ມີຄວາມໜັກແໜ້ນເຂັ້ມແຂງ ຮັບປະກັນເຮັດໃຫ້ກອງທັບ ເຮັດສໍາເລັດໜ້າທີ່ການເມືອງຂອງຕົນ ໃນການປົກປັກຮັກສາປະເທດຊາດ ໄວ້ໃຫ້ໜັ້ນຄົງ ສ້າງເງື່ອນໄຂໃຫ້ແກ່ການພັດທະນາ ເສດຖະກິດ-ສັງຄົມ ແລະ ສືບຕໍ່ສ້າງກອງທັບ ໃຫ້ເປັນກອງທັບ ປະຕິວັດ ມີແບບແຜນການເຮັດວຽກທີ່ດີ ແລະ ທັນສະໄໜຢ່າງບໍ່ຢຸດຢັ້ງ.

Editor: ດາວໄຊ ສີວິໄລ