ຫ້ອງການສຶກສາທິການ ແລະ ກິລາເມືອງ ລະຄອນເພັງ ເປີດບັ້ນເຊື່ອມຊືມການເມືອງ-ແນວຄິດ ໃຫ້ແກ່ພະນັກງານຄູ ປະຈໍາປີ 2017 ຊຸດທີ 1 ຂຶ້ນ ແລະ ດໍາເນີນໃນລະຫວ່າງວັນທີ 10-12 ສິງຫາ ທີ່ຜ່ານມານີ້ ຢູ່ທີ ໂຮງຮຽນມັດທະຍົມສົມບູນດ່ານນາເລົາ, ກຸ່ມດ່ານ, ເມືອງ ລະຄອນເພັງ ໂດຍການເປັນປະທານ ແລະ ກ່າວເປີດຂອງ ທ່ານ ຄໍາເພັດ ແສງໃສສຸກ, ຫົວໜ້າຫ້ອງການ ສຶກສາທິການ ແລະ ກິລາເມືອງ ແລະ ເປັນກຽດເຂົ້າຮ່ວມ ຂອງທ່ານ ໜູໄຊ ຈັນດາວົງ, ຮອງເຈົ້າ ເມືອງ ລະຄອນເພັງ ຜູ້ຊີ້ນໍາຂົງເຂດວັດທະນະທໍາ-ສັງຄົມຂັ້ນເມືອງ, ທ່ານ ຄໍາເຟືອງ ອິນທະສອນ, ຫົວໜ້າຂະແໜງກວດກາ ແລະ ປະເມີນຜົນ ພະແນກສຶກສາທິການ ແລະ ກິລາແຂວງ ສາລະວັນ ໂດຍມີພະນັກງານຄູຈາກ 18 ໂຮງຮຽນ ໃນ 4 ກຸ່ມໃຕ້ ຂອງເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນບັ້ນເຊື່ອມຊືມການເມືອງ-ແນວຄິດໃນຄັ້ງນີ້ ຜູ້ເຂົ້າຮ່ວມໄດ້ເຊື່ອມຊືມ ເອກະສານ, ດໍາລັດ ແລະ ກົດ ໝາຍຈໍານວນ 8 ສະບັບ ຄື: ເອກະສານຄຸນທາດການເມືອງ-ຄຸນສົມບັດສິນທໍາປະຕິວັດ, ຈັນຍາບັນຂອງຄູ, ມາດຕະຖານຂອງຄູ, ມາດຖານຄຸນນະພາບຂອງໂຮງຮຽນປະຖົມ ແລະ ມັດທະຍົມ, ຂໍ້ແຂງຂັນຂອງຂະແໜງການສຶກສາ ແລະ ກິລາ, ດໍາລັດເລກທີ 177/ລບ, ກົດໝາຍວ່າດ້ວຍ ການສຶກສາ ແລະ ກົດໝາຍວ່າດ້ວຍຕ້ານການສໍ້ລາດບັງຫຼວງ. ທັງນີ້ ກໍ່ເພື່ອເຮັດໃຫ້ພະນັກງານຄູ ມີຄວາມໜັກແໜ້ນທາງດ້ານຄຸນທາດການເມືອງ-ແນວຄິດ, ມີຄວາມເຂັ້ມແຂງທາງດ້ານການຈັດຕັ້ງ. ນອກຈາກນີ້, ຍັງໄດ້ແບ່ງຈຸໜ່ວຍ ສໍາຫຼວດກວດກາ, ຕີລາຄາຄືນ ການປະຕິບັດໜ້າທີຂອງແຕ່ລະຄົນໃນໄລຍະຜ່ານມາ ເພື່ອພ້ອມກັນເສີມຂະຫຍາຍຈຸດດີ, ຊອກໃຫ້ເຫັນຈຸດອ່ອນ, ຂໍ້ຄົງຄ້າງ ແລະ ວິທີການປັບປຸງແກ້ໄຂໃນຕໍ່ໜ້າ. ຜ່ານບັ້ນເຊີ່ອມຊືມເປັນເວລາ 3 ວັນ ສາມາດປະເມີນຄວາມຮັບຮູ້ ແລະ ເຂົ້າໃຈຂອງຜູ້ເຂົ້າຮ່ວມ ຄື: ມີຄວາມເຂົ້າໃຈດີ 130 ຄົນ ເທົ່າກັບ 93,52%, ແລະ ມີຄວາມເຂົ້າໃຈປານກາງ 9 ຄົນເທົ່າກັບ 6,47% .
ໃນໂອກາດມີຄໍາເຫັນຕໍ່ບັ້ນເຊື່ອມຊືມຄັ້ງນີ້ ທ່ານ ໜູໄຊຈັນດາວົງ ຮອງເຈົ້າເມືອງ ລະຄອນເພັງ ໄດ້ຍົກໃຫ້ເຫັນຄວາມໝາຍສໍາຄັນ ຂອງວຽກງານການເມືອງ-ແນວຄິດ ເພາະແນວຄິດແມ່ນປັດໃຈຕັດສິນການກະທໍາ, ຍົກໃຫ້ເຫັນບົດບາດ ແລະ ຄວາມສໍາຄັນຂອງຄູຕໍ່ການພັດທະນາການສຶກສາ ແລະ ເນັ້ນນັກໃຫ້ເອົາໃຈໃສ່ປັບປຸງຄຸນນະພາບການສຶກສາ, ການຄຸ້ມຄອງໂຮງຮຽນ, ແກ້ໄຂປະກົດການຫຍໍ້ທໍ້ໃນຂົງເຂດການສຶກສາ, ແກ້ໄຂບັນຫາປະລະການຮຽນຂອງນັກຮຽນໃນແຕ່ລະຊັ້ນຮຽນໃຫ້ຫຼຸດລົງ ແລະ ອື່ນໆ
Editor: ດາວໄຊ ສີວິໄລ
