ກອງປະຊຸມຮ່ວມ ລະຫວ່າງ ຄະນະປະຈຳ ສະພາແຫ່ງຊາດ ກັບລັດຖະບານ ໄດ້ຈັດຂຶ້ນໃນວັນທີ 15 ສິງຫາ 2017 ນີ້ ຢູ່ນະຄອນຫລວງວຽງຈັນ, ໂດຍການເຂົ້າຮ່ວມຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫງ ສປປ ລາວ , ເພື່ອປຶກສາຫາລື ບາງບັນຫາທີ່ສຳຄັນຂອງຊາດ ແນ່ໃສ່ຮັບປະກັນ ໃຫ້ເສດຖະກິດ-ສັງຄົມ, ສືບຕໍ່ຂະຫຍາຍຕົວຕໍ່ເນື່ອງ, ສັງຄົມມີຄວາມສະຫງົບ ເປັນລະບຽບຮຽບຮ້ອຍ ສ້າງໄດ້ຄວາມໄວ້ວາງໃຈ ແລະ ຄວາມເຊື່ອໝັ້ນ ຂອງປະຊາຊົນ ຕໍ່ກັບການບໍລິຫານຂອງລັດ.
ທ່ານ ນາງ ປານີ ຢ່າທໍ່ຕູ້ ປະທານສະພາແຫ່ງຊາດ ໄດ້ກ່າວວ່າ: ເນື້ອໃນຈຸດສຸມ ໃນກອງປະຊຸມຄັ້ງນີ້, ຈະໄດ້ປຶກສາຫາລືຮ່ວມກັນ ສາມບັນຫາ ຄື ຮັບຟັງການລາຍງານ ການຈັດຕັ້ງປະຕິບັດ ນະໂຍບາຍຊົດເຊີຍຕໍ່ປະຊາຊົນ ທີ່ໄດ້ຮັບຜົນກະທົບ ຈາກໂຄງການລົງທຶນ ພັດທະນາຂອງລັດ ລວມທັງໂຄງການກໍ່ສ້າງ ທາງລົດໄຟ, ໂຄງການລົງທຶນພາຍໃນ ແລະ ຕ່າງປະເທດ ທີ່ພົວພັນເຖິງການຊົດເຊີຍ ແລະ ການຈັດສັນທີ່ຢູ່ອາໃສ, ອາຊີບຄົງທີ່ໃຫ້ແກ່ ປະຊາຊົນທີ່ຖືກຜົນກະທົບ.
ນອກນັ້ນ, ຍັງຮັບຟັງສະພາບການຈັດຕັ້ງປະຕິບັດ ບັນດາຄາດໝາຍໃຫຍ່ ທາງດ້ານເສດຖະກິດ-ສັງຄົມ, ງົບປະມານແຫ່ງລັດ ປີ 2017 ຕາມມະຕິ ກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ວາງອອກ ເພື່ອສືບຕໍ່ຊຸກຍູ້ ແລະ ຊີ້ນຳການຈັດຕັ້ງປະຕິບັດ ແຜນດັ່ງກ່າວ ໃນ 6 ເດືອນທ້າຍປີ ໃຫ້ບັນລຸຕາມຄາດໝາຍ ກໍຄື ປຶກສາຫາລື ກ່ຽວກັບກົນໄກປະສານງານ ແລະ ການຊີ້ນຳຂອງ ຄະນະປະຈຳສະພາແຫ່ງຊາດ ແລະ ລັດຖະບານ ຕໍ່ການຈັດຕັ້ງຜັນຂະຫຍາຍ ມະຕິກອງປະຊຸມ ສະໄໝສາມັນ ເທື່ອທີ 4 ຂອງສະພາແຫ່ງຊາດ ທີ່ຈະມາເຖິງໃນທ້າຍປີນີ້ ກ່ຽວກັບແຜນພັດທະນາ ເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປະຈຳປີ 2018 ຕໍ່ສາຍຕັ້ງຂອງຕົນ ນັບແຕ່ສູນກາງຮອດທ້ອງຖິ່ນ ແນ່ໃສ່ຮັບປະກັນ ຄວາມເປັນເອກະພາບ ໃນການຊີ້ນຳ ແລະ ຈັດຕັ້ງຜັນຂະຫຍາຍແຜນດັ່ງກ່າວ ໃຫ້ທັນຕາມກຳນົດເວລາ ແລະ ມີໝາກຜົນ.
Editor: ກຳປານາດ ລັດຖະເຮົ້າ
