ຕອນເຊົ້າວັນທີ 15 ສິງຫາ 2017 ນີ້, ຄະນະພັກຮາກຖານ ປກສ ເມືອງທ່າແຕງ, ແຂວງ ເຊກອງ, ປະກອບມີ 3 ໜວ່ຍພັກຄື : ໜວ່ຍພັກ ຍຸຕິທໍາ, ໜວ່ຍພັກ ປກສ ແລະ ໜວ່ຍພັກ ສັນຕິບານ, ໄດ້ເປີດບັ້ນດຳເນີນຊີວິດການເມືອງປັບປຸງປົວແປງພັກ, ຊຶ່ງກອງປະຊຸມດັ່ງກ່າວ ໄດ້ຈັດຂຶ້ນຢູ່ທີ່ ສະໂມສອນໃຫ່ຍ ປກສ ເມືອງທ່າແຕງ, ແຂວງເຊກອງ, ໂດຍການເປັນປະທານຂອງ ທ່ານ ລົດແກ້ວ ເພັງພູນສະຫວັດ ຮອງເຈົ້າເມືອງທ່າແຕງ ຜູ້ຊີ້ນໍາຂົງເຂດອົງການຈັດຕັ້ງມະຫາຊົນ, ມີທ່ານ ພັນໂທ ອອ່ນຕາ ສະສົມບັດ ກໍາມະການພັກເມືອງ ເລຂາຄະນະພັກຮາກຖານ ປກສ ເມືອງ, ມີເລຂາໜວ່ຍພັກ-ຄະນະພັກ, ພາກສວ່ນກ່ຽວຂອ້ງ, ພ້ອມດ້ວຍສະມາຊິກພັກສົມບູນ ແລະ ສຳຮອງພາຍໃນໜ່ວຍ ເຂົ້າຮ່ວມ.
ໃນກອງປະຊຸມບັ້ນດໍາເນີນຊີວິດການເມືອງປັບປຸງປົວແປງພັກ ທົ່ວຄະນະພັກຮາກຖານ ປກສ ເມືອງ ໃນຄັ້ງນີ້, ບັນດາຄະນະໜ່ວຍພັກ, ສະມາຊິກພັກສົມບູນ, ສຳຮອງທີ່ເຂົ້າຮ່ວມ ຈະໄດ້ຮັບຟັງເຊື່ອມຊຶມການບັນຍາຍເອກະສານເດັດດ່ຽວ ປັບປຸງປົວແປງພັກ ໃຫ້ປອດໃສເຂັ້ມແຂງ ແລະ ໜັກແໜ້ນຈາກທ່ານ ພັນໂທ ອອ່ນຕາ ສະສົມບັດ ກໍາມະການພັກເມືອງ ເລຂາຄະນະພັກຮາກຖານ ປກສ ເມືອງ, ເຊິ່ງມີເນື້ອໃນເລັ່ງໃສ່ ການເສີມຂະຫຍາຍມູນເຊື້ອ, ຜົນງານດ້ານດີຂອງຄະນະພັກ, ໜ່ວຍພັກ ແລະ ແກ້ໄຂດ້ານອ່ອນ, ຂໍ້ຄົງຄ້າງ,ສິ່ງທ້າທາຍ ໃນໄລຍະ 2 ປີຜ່ານມາ ທີ່ຈະຕ້ອງພ້ອມກັນຫັນປ່ຽນໃນທາງທີ່ຕັ້ງໜ້າໃຫ້ມີຜົນສຳເລັດດີຂຶ້ນກວ່າເກົ່າ ດ້ວຍຈິດໃຈບຸກທະລຸທັງ 4 ດ້ານ ແລະ ຍົກສູງຄວາມສາມາດ, ການນຳພາ ແລະ ລັກສະນະນຳໜ້າ ຂອງສະມາຊິກພັກ, ພະນັກງານນຳພາ, ພະນັກງານຄຸ້ມຄອງທຸກສະຫາຍ ໃນການຈັດຕັ້ງປະຕິບັດຫລັກການກໍ່ສ້າງພັກ ໃຫ້ປອດໃສ່ເຂັ້ມແຂງໜັກແໜ້ນ, ມີຫລັກການລວມສູນປະຊາທິປະໄຕ, ຫລັກການຕຳນິຕິຊົມຕົນເອງ, ຕິຊົມກໍ່ສ້າງຊ່ວຍເຫຼືອເຊິ່ງກັນ ແລະ ກັນ ເພື່ອເສີມຂະຫຍາຍຈຸດດີ ພ້ອມກັນ ຊອກຫາວິທີແກ້ໄຂຈຸດອ່ອນ ແລະ ຂໍ້ຄົງຄ້າງ ໃຫ້ໄປພ້ອມກັບການແກ້ໄຂປະກົດການຫຍໍ້ທໍ້ຕ່າງໆ ທີ່ອາດຈະເກີດຂື້ນ ຢູ່ໃນສັງຄົມໃຫ້ຫຼຸດໜ້ອຍຖອຍລົງເທື່ອລະກ້າວ.
ທັງນີ້ ກໍ່ເພື່ອເຮັດໃຫ້ພະນັກງານນໍາພາ, ພະນັກງານຄຸ້ມຄອງ ແລະ ສະມາຊິກພັກສົມບູນ-ສຳຮອງ ທຸກສະຫາຍ ມີຄວາມເຂົ້າໃຈແຈ້ງຕໍ່ເນື້ອໃນ ຈຸດປະສົງເປົ້າໜາຍ ທີ່ສຳຄັນຂອງເອກະສານດັ່ງກ່າວ ທີ່ຈະນຳໄປຈັດຕັ້ງປະຕິບັດເຂົ້າໃນໜ້າທີ່ວຽກງານຕົວຈິງ ໃຫ້ມີຜົນສຳເລັດຕາມຈຸດປະສົງ ແລະ ລະດັບຄາດໝາຍ ທີ່ວາງໄວ້. ຊຶ່ງກອງປະຊຸມ ຄັ້ງນີ້ຈະດຳເນີນໄປຈົນເຖິງວັນທີ 18 ສິງຫາ 2017 ຈິ່ງຈະສໍາເລັດ.
Editor: ກຳປານາດ ລັດຖະເຮົ້າ
