ພິທີຈັດຝຶກອົບຮົມວຽກງານໂຄສະນາ-ປາຖະກະຖາ ໃຫ້ພະນັກງານຫຼັກແຫຼ່ງ ໄດ້ໄຂຂື້ນຢ່າງເປັນທາງການໃນກາງເດືອນ ສິງຫາ 2017 ຜ່ານມານີ້ ທີ່ຫ້ອງປະຊຸມຫ້ອງການ-ການເງິນ ເມືອງ ທ່າແຕງ, ແຂວງເຊກອງ ໂດຍເປັນປະທານຂອງ ທ່ານ ບຸນສວນ ບຸດບຸນມາ ຄະນະ ປະຈໍາພັກເມືອງ, ປະທານກວດກາພັກ-ລັດເມືອງທ່າແຕງ, ໃຫ້ກຽດເຂົ້າຮ່ວມຂອງ ທ່ານນາງ ພາວອນ ສຸກນະວົງ ຫົວໜ້າກົມໂຄສະນາອົບຮົມສູນກາງ, ມີ ທ່ານ ດາວວີ ສວຍທະລັງສີ ຫົວໜ້າຄະນະອົບຮົມແຂວງເຊກອງ, ພ້ອມດ້ວຍຄະນະພັກຮາກຖານບ້ານ-ນາຍບ້ານ ແຂກຖືກເຊີນເຂົ້າຮ່ວມ.
ໃນພິທີ ທ່ານ ບຸນສວນ ບຸດບຸນມາ ຄະນະປະຈໍາພັກເມືອງ ປະທານກວດກາພັກ - ລັດເມືອງທ່າແຕງ ໄດ້ມີຄໍາເຫັນກ່າວເປີດພິທີວ່າ: ບັ້ນຝຶກອົບຮົມຄັ້ງນີ້ ແມ່ນຢູ່ໃນທ່າມກາງບັນຍາກາດທົ່ວປວງຊົນລາວບັນດາເຜົ່າທົ່ວປະເທດ ພວມອອກແຮງແຂ່ງຂັນ, ສຸ່ມໃສ່ຈັດຕັ້ງຜັນຂະຫຍາຍມະຕິ 10 ຂອງພັກ, ມະຕິ 9 ຂອງອົງຄະນະພັກແຂວງ, ມະຕິ 5 ຂອງເມືອງວາງອອກ ໃຫ້ເຂົ້າສູ່ຊີວິດຕົວຈິງຢ່າງເປັນຂະບວນກວ້າງຂວາງໄປພ້ອມກັບການສ້າງຂະບວນການຕ່າງໆ ເພື່ອສະເຫຼີມສະຫຼອງສອງວັນປະຫວັດສາດ ລາວ-ຫວຽດນາມ ຄື: ວັນສົນທິສັນຍາມິດຕະພາບ-ການຮ່ວມມື ຮອບດ້ານຄົບຮອບ 40 ປີ, ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 55 ປີ,
ຢູ່ເມືອງທ່າແຕງຍັງມີບາງດ້ານຄວາມເຂົ້າໃຈບໍ່ທັນເລິກເຊິ່ງເທົ່າທີ່ຄວນຕໍ່ວຽກງານໂຄສະນາ - ປາຖະກະຖາ, ສະຕິຕື່ນຕົວຂອງປະຊາຊົນບັນດາເຜົ່າຍັງບໍ່ທັນກວ້າງຂວາງ. ສະນັ້ນ ເພື່ອເຮັດໃຫ້ພະນັກງານຫຼັກແຫຼ່ງຂອງເມືອງ ນັບແຕ່ຂັ້ນຮາກຖານຂື້ນມາ ຕ້ອງມີສະຕິຕື່ນຕົວ, ເຂົ້າໃຈກັບວຽກງານ ໂຄສະນາ - ປາຖະກະຖາ ໃຫ້ນັບມື້ນັບໜັກແໜ້ນເຂັ້ມແຂງຂື້ນ ບັນດານັກສໍາມະນາກອນທຸກສະຫາຍຕ້ອງກໍາແໜ້ນໃນເອກະສານ 6 ບົດ ຄື: ບັນຫາພຶື້ນຖານວຽກງານໂຄສະນາ, ຝຶກຝົນຄວາມສາມາດ ໃນການຂຽນເອກະສານ, ຄຸນລັກສະນະ-ສິລະປະໃນການເວົ້າ, ໂຄສະນາເຄື່ອນທີ່, ໂຄສະນາຜ່ານສື່ ແລະ ບັນດານິຕິກໍາ-ບາງບົດຮຽນ ໃນການເຄື່ອນໄຫວໂຄສະນາ-ປາຖະກະຖາ ເພື່ອເຮັດໃຫ້ວຽກງານດັ່ງກ່າວ ໄດ້ຮັບການປັບປຸງແກ້ໄຂ ເປັນຕົ້ນ: ການສຶກສາອົບຮົມການເມືອງແນວຄິດ ຕິດພັນກັບການປຸກລະດົມຊຸກຍູ້ການຈັດຕັ້ງປະຕິບັດ ແນວທາງນະໂຍບາຍຂອງພັກ ໃນໄລຍະຜ່ານມາ ຄະນະພັກຢູ່ບາງຂະແໜ່ງການ-ທ້ອງຖິ່ນ ຍັງໜັກໄປແຕ່ທິດສະດີ-ແນວທາງແບບລວມໆ. ເພື່ອດຶງດູດເອົາມະຫາຊົນເຂົ້າຮ່ວມປະຕິບັດແນວທາງຂອງພັກ ກໍ່ຄື ວຽກງານຈຸດສຸ່ມທີ່ຂະແໜ່ງການຂອງຕົນວາງອອກ ໃຫ້ປະກົດຜົນເປັນຈິງ ແລະ ນໍາເອົາຜົນປະໂຫຍດຕົວຈິງມາໃຫ້ມະຫາຊົນ ການສ້າງບາດກ້າວບຸກທະລຸທາງດ້ານພັດທະນາຊັບພະຍາກອນມະນຸດ,ດ້ານລະບຽບການ, ກົນໄກບໍລິຫານຄຸ້ມຄອງ, ແກ້ໄຂຄວາມທຸກຍາກ ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ, ຍູ້ແຮງວຽກງານ 3 ສ້າງ ແລະ ຂະບວນການຜະລິດເປັນສິນຄ້າຂອງປະຊາຊົນ ໃຫ້ນັບມື້ນັບເພີ່ມຂື້ນກວ່າເກົ່າ ເພື່ອນໍາເອົາປະເທດເຮົາໃຫ້ຫຼຸດພົ້ນຈາກຄວາມດ້ອຍພັດທະນາໃນປີ 2020 ໃຫ້ປະຜົນເປັນຈິງ. ຊຸດອົບຮົມຄັ້ງນີ້ ຈະດໍາເນີນໄປເຖິງວັນທີ 16 ສິງຫາ 2017 ນີ້ ຈິ່ງຈະສໍາເລັດ.
Editor: ກຳປານາດ ລັດຖະເຮົ້າ
