ບັ້ນດໍາເນີນຊີວິດການເມືອງ ປັບປຸງປົວແປງພັກ ຂອງໜ່ວຍພັກກອງບັນຊາການທະຫານເມືອງລະຄອນເພັງ ໄດ້ໄຂຂຶ້ນ ໃນວັນທີ 16 ສິງຫາ ທີ່ຜ່ານມາ ຢູ່ທີ່ຫ້ອງປະຊຸມຂອງກອງບັນຊາການທະຫານເມືອງ ໂດຍການເປັນປະທານ ຂອງທ່ານ ພັນຕີ ວົງລັດຕະນະ ແສງຈັນ, ຄະນະປະຈໍາພັກເມືອງ ເລຂາໜ່ວຍພັກກອງບັນຊາການທະຫານເມືອງ ມີຄະນະໜ່ວຍພັກ ພ້ອມດ້ວຍສະມາຊິກພັກພາຍໃນໜ່ວຍ ເຂົ້າຮ່ວມ 34 ທ່ານ, ຍິງ 4 ທ່ານ.
ໃນໂອກາດກ່າວໄຂພິທີທ່ານ ພັນຕີ ວົງລັດຕະນະ ແສງຈັນ, ຄະນະປະຈໍາພັກເມືອງ ເລຂາໜ່ວຍພັກ ກອງບັນຊາການທະຫານເມືອງ ໄດ້ຍົກໃຫ້ເຫັນຄວາມໝາຍ, ຄວາມສໍາຄັນ ແລະ ຄວາມຈໍາເປັນພາວະວິໄສ ໃນການປັບປຸງປົວແປງພັກ ເພື່ອສ້າງພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ, ມີການຫັນປ່ຽນຢ່າງຕັ້ງໜ້າ ແລະ ທັນກັບສະພາບການ. ພ້ອມນີ້, ທ່ານໄດ້ເນັ້ນໃຫ້ຄະນະໜ່ວຍພັກ ແລະ ສະມາຊິກພັກທຸກທ່ານ ຈົ່ງພ້ອມກັນເຊີດຊູ ແລະ ຍົກສູງຄວາມຮັບຜິດຊອບ, ກ້າຕໍານິຕົນເອງ ແລະ ຕິຊົມໝູ່ຄະນະ ດ້ວຍຄວາມເດັດດ່ຽວ ແລະ ຈິງໃຈ, ການຂຽນບົດສໍາຫຼວດ ຕ້ອງກ້າຍົກໃຫ້ເຫັນຂໍ້ຂາດຕົກບົກຜ່ອງ ແລະ ວິທີການປັບປຸງແກ້ໄຂ ຢ່າງຊັດເຈນ ເພື່ອພ້ອມກັນເສີມຂະຫຍາຍອັນດີ ແລະແກ້ໄຂອັນອ່ອນ ໃຫ້ໄດ້ຢ່າງຂາດຕົວ. ສໍາລັບ ບັ້ນດໍາເນີນຊີວິດການເມືອງ ປັບປຸງປົວແປງພັກໃນຄັ້ງນີ້ ຄະນະໜ່ວຍພັກ ແລະ ສະມາຊິກພັກຈະໄດ້ເຊື່ອມຊືມເອກະສານເດັດດ່ຽວປັບປຸງປົວແປງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ, ຮັບຟັງບົດແນະນໍາການຂຽນບົດສໍາຫຼວດຕົນເອງ, ຮັບຟັງ ແລະ ປະກອບຄໍາຄິດເຫັນໃສ່ ບົດຕີລາການນໍາພາ ຂອງໜ່ວຍພັກໃນໄລຍະຜ່ານມາ, ເປີດກວ້າງໃຫ້ຕໍານິສົ່ງຂ່າວ ແລະ ທາບທາມລົງຄະແນນສຽງ ຄວາມເຊື່ອໜັ້ນໄວ້ວາງໃຈ ຕໍ່ຄະນະພັກຄະນະບັນຊາ ແລະ ບຸກ ຄົນສະມາຊິກພັກແບບປິດລັບ ຈາກນັ້ນ, ແຕ່ລະສະຫາຍຈະໄດ້ຜ່ານບົດສໍາຫຼວດຕົນເອງ ແລະ ຮັບເອົາການຊ່ວຍ ເຫຼືອຈາກໝູ່ຄະນະເພື່ອໄປປັບປຸງແກ້ໄຂ ຂໍ້ຂາດຕົງບົກຜ່ອງຂອງແຕ່ລະທ່ານ.
ກອງປະຊຸມແມ່ນຈະໄດ້ດໍາເນີນໄປຮອດ ວັນທີ 19 ສິງຫາ 2017 ຈຶ່ງຈະໄດ້ສຳເລັດ.

Editor: ດາວໄຊ ສີວິໄລ