ພິທີປະດັບຫຼຽນໄຊອິດສະຫຼະ ຂອງປະທານປະເທດ ແຫ່ງສາທາລະນະລັດ ສັງຄົມນິຍົມ ຫວຽດນາມ ໃຫ້ບຸກຄົນການນຳຂອງແຂວງ ບໍລິຄຳໄຊ, ສປປ ລາວ ເນື່ອງໃນໂອກາດສອງປະເທດ ລາວ-ຫວຽດນາມ ພ້ອມກັນສະເຫຼີມສະຫຼອງ ວັນເຊັນສົນທິສັນຍາມິດຕະພາບ ແລະ ຮ່ວມມືຮອບດ້ານ ລາວ-ຫວຽດນາມ ຄົບຮອບ 40 ປີ, (18 ກໍລະກົດ 1977 – 18 ກໍລະກົດ 2017) ແລະ ວັນສ້າງຕັ້ງສາຍພົວພັນການຖູດ ລາວ-ຫວຽດນາມ ຄົບຮອບ 55 ປີ, (5 ກັນຍາ 1962- 5 ກັນຍາ 2017 ) ໄດ້ຈັດຂື້ນເມື່ອບໍ່ດົນມານີ້ ຢູ່ທີ່ຫ້ອງປະຊຸມສະໂມສອນແຂວງບໍລິຄຳໄຊ. ໃນພິທີ ທ່ານ ຫງວຽນ ດັກ ວິ່ງ ຮອງເລຂາ ຜູ້ປະຈຳ ການຄະນະພັກແຂວງ, ປະທານຄະນະສະມາຊິກສະພາແຫ່ງຊາດ ປະຈຳແຂວງເຊີນລາ ສສ ຫວຽດນາມ ຕາງໜ້າໃຫ້ແກ່ລັດຖະບານ ສາທາລະນະລັດ ສັງຄົມນິຍົມ ຫວຽດນາມ ປະດັບຫຼຽນໄຊອິດສະຫຼະຊັ້ນ 2 ເຊິ່ງເປັນຫຼຽນກຽດຕິຄຸນອັນສູງສົ່ງຂອງປະທານປະເທດ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ໃຫ້ແກ່ ທ່ານ ປະລິນຍາເອກ ກອງແກ້ວ ໄຊສົງຄາມ ກຳມະການສູນກາງພັກ, ເລຂາພັກແຂວງ ເຈົ້າແຂວງ-ແຂວງບໍລິຄຳໄຊ, ປະດັບຫຼຽນໄຊອິດສະຫຼະ ຊັ້ນ 3 ໃຫ້ແກ່ ທ່ານ ທອງອອນ ຄຳພູບານ ອາດິດຮອງເລຂາພັກແຂວງ, ຮອງເຈົ້າແຂວງບໍລິຄຳໄຊ, ແລະ ທ່ານ ບຸນມາ ບຸຈະເລີນ ຮອງເລຂາພັກແຂວງ ຮອງເຈົ້າແຂວງບໍລິຄຳໄຊ ໂດຍມີຄະນະປະພັກແຂວງ, ກຳມະການພັກແຂວງ, ຫົວໜ້າ ພະແນກການອ້ອມຂ້າງແຂວງບໍລິຄຳໄຊ ເຂົ້າຮ່ວມເປັນສັກຂີພິຍານ
ໂອກາດນີ້ ທ່ານ ຫງວຽນ ດັກ ວິ່ງ ໄດ້ກ່າວສະແດງຄວາມຍີນດີ ແລະ ຊົມເຊີຍຕໍ່ຜົນງານຂອງບັນດາສະຫາຍການນຳຂອງແຂວງບໍລິຄຳໄຊ ທີ່ໄດ້ປະກອບສ່ວນ ຖະນຸບຳລຸງ ແລະ ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ-ລາວ ເວົ້າສະເພາະ ກໍ່ຄືແຂວງບໍລິຄຳໄຊ ສປປລາວ ກັບບັນດາແຂວງ ສສ ຫວຽດນາມ ສຶບຕໍ່ເສີມຂະຫຍາຍຮັກສາມູນເຊື້ອນີ້ໄວ້ ໃຫ້ມີຄວາມໝັ້ນຄົງທະນົງແກ່ນຕະຫຼອດຊົ່ວກາລະນານ
ຂອບໃຈຂ່າວ ທີມຂ່າວ ແຂວງບໍລິຄຳໄຊ
Editor: ກຳປານາດ ລັດຖະເຮົ້າ
