ໃນວັນທີ 15 ສິງຫາ 2017 ທີ່ຫ້ອງວ່າການປົກຄອງແຂວງເຊກອງ ສປປ ລາວ, ທ່ານ ຫງວຽນ ດັກ ກວິ່ງ ຮອງເລຂາຜູ້ປະຈຳການພັກແຂວງ, ປະທານຄະນະສະມາຊິກສະພາແຫ່ງຊາດປະຈຳແຂວງເຊິນລາ ສສ ຫວຽດນາມ, ໄດ້ຕາງໜ້າໃຫ້ລັດຖະບານ ສສ ຫວຽດນາມ, ປະດັບຫຼຽນໄຊອິດສະຫລະຊັ້ນ 3 ໃຫ້ແກ່ບຸກຄົນໃນການນໍາແຂວງເຊກອງ ທີ່ມີຜົນງານດີເດັ່ນປະກອບສ່ວນເຂົ້າໃນການເສີມຂະຫຍາຍທາດແທ້ມູນເຊື້ອ ແລະ ສາຍພົວພັນສາມັກຄີມິດຕະພາບແບບພິເສດ ລາວ-ຫວຽດນາມ ໂດຍມີ ທ່ານ ຄຳເຜີຍ ບຸດດາວຽງ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆເຊກອງ ແລະ ພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ.
ທ່ານ ຫງວຽນ ດັກ ກວິ່ງ ໃຫ້ຮູ້ວ່າ: ໂດຍອີງຕາມລັດຖະດຳລັດຂອງປະທານປະເທດ ແຫ່ງສາທາລະນະລັດ ສັງຄົມນິຍົມຫວຽດນາມ ສະບັບເລກທີ 1240 ລົງວັນທີ 3 ກໍລະກົດ 2017 ວ່າດ້ວຍການປະດັບຫຼຽນໄຊອິດສະຫຼະຊັ້ນ III ຂອງ ສສ ຫວຽດນາມໃຫ້ແກ່ໃຫ້ແກ່ບຸກຄົນໃນການນໍາແຂວງເຊກອງຈຳນວນ 4 ທ່ານ ຄື: ທ່ານ ປະລິນຍາເອກ. ຄຳພຽມ ບົວລະພາ ຮອງເລຂາພັກແຂວງເຊກອງ, ທ່ານ ຖາວອນ ພົມມະໄລລຸນ ກໍາມະການປະຈຳພັກແຂວງ, ຮອງເຈົ້າແຂວງເຊກອງ, ທ່ານ ເຫຼັກໄຫຼ ສີວິໄລ ກໍາມະການປະຈຳພັກແຂວງ, ຮອງເຈົ້າແຂວງເຊກອງ ແລະ ທ່ານ ສີດາ ສຸວັນນະສາຍ ຮອງເລຂາພັກແຂວງ, ຮອງເຈົ້າແຂວງເຊກອງ ທີ່ມີຜົນງານດີເດັ່ນໃນການປະກອບສ່ວນຢ່າງຕັ້ງໜ້າເຂົ້າ ໃນການເສີມຂະຫຍາຍທາດແທ້ມູນເຊື້ອສາຍພົວພັນ ສາມັກຄີມິດຕະພາບແບບພິເສດ ລາວ-ຫວຽດນາມ. ແລະ ໃນໂອກາດດັ່ງກ່າວ ທ່ານ ປະລິນຍາເອກ ຄຳພຽມ ບົວລະພາ ກ່າວວ່າ: ການເດີນທາງມາຢ້ຽມຢາມ ແລະ ເຮັດວຽກຢູ່ແຂວງເຊກອງຂອງການນຳຂັ້ນສູງແຂວງເຊີນລາ ໃນຄັ້ງນີ້ ແມ່ນເປັນການປະກອບສ່ວນສຳຄັນ ໃຫ້ແກ່ການຮ່ວມມື, ຄວາມສາມັກຄີຮັກແພງຊ່ວຍເຫຼືອເຊິ່ງກັນ ແລະ ກັນລະຫວ່າງສອງຊາດ ລາວ-ຫວຽດນາມ ທີ່ປະທານໄກສອນ ພົມວິຫານ, ປະທານ ໂຮ່ຈີມິນ ສ້າງໄວ້ເວົ້າລວມ ກໍຄືແຂວງເຊກອງ ແລະ ແຂວງເຊີນລາໃຫ້ນັບມື້ແໜ້ນແຟ້ນ ແລະ ໝັ້ນຄົງທະນົງແກ່ນຍິ່ງໆຂຶ້ນ.
Editor: ກຳປານາດ ລັດຖະເຮົ້າ
