ກອງປະຊຸມດັ່ງກ່າວ ໄດ້ໄຂຂຶ້ນ ເມື່ອບໍ່ດົນຜ່ານມານີ້ ຢູ່ທີ່ ຫ້ອງປະຊຸມພະແນກແຜນການ ແລະ ການລົງທຶນ ແຂວງວຽງຈັນ ໂດຍພາຍໃຕ້ການເປັນປະທານຂອງ ທ່ານ ວິດົງ ໄຊຍະສອນ ເລຂາພັກແຂວງ ເຈົ້າແຂວງໆວຽງຈັນ ເປັນກຽດເຂົ້າຮ່ວມຂອງ ທ່ານ ປະລິນຍາເອກ ສຸພັນ ແກ້ວມີໄຊ ລັດຖະມົນຕີກະຊວງ ແຜນການ ແລະ ການລົງທຶນ, ມີບັນດາຫົວຫນ້າ, ຮອງຫົວຫນ້າພະແນກການ, ອົງການ ພ້ອມດ້ວຍພະນັກງານຫລັກແຫລ່ງທີ່ກ່ຽວຂ້ອງເຂົ້າຮ່ວມ.
ທ່ານ ສຸກັນ ວິໄລຣັດ ຫົວຫນ້າພະແນກແຜນການ ແລະ ການລົງທຶນ ແຂວງວຽງຈັນ ໄດ້ຂຶ້ນຜ່ານບົດສະຫລຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ວຽກງານ 6 ເດືອນຕົ້ນປີ ຄາດຄະເນ 6 ເດືອນ ທ້າຍປີ 2017 ແລະ ກະກຽມສ້າງແຜນປີ 2018. ໃນ 6 ເດືອນຕົ້ນປີ 2017 ຜ່ານມາ ອັດຕາການເຕີບໃຫຍ່ຂອງລວມຍອດຜະລິດຕະພັນພາຍໃນປະຕິບັດໄດ້7,9 ສ່ວນຮ້ອຍ (ແຜນການປີ 8,3 ສ່ວນຮ້ອຍ) ທຽບໃສ່ໄລຍະດຽວກັນປີຜ່ານມາເພີ່ມຂຶ້ນ 0,1%ສ້າງມູນຄ່າເພີ່ມໄດ້ 5 ຕື້ 374 ລ້ານກີບ ສະເລ່ຍຕໍ່ຫົວຄົນໄດ້ 12 ລ້ານກວ່າກີບ ເທົ່າກັບ 1.497 ໂດລາ (ແຜນການປີ 1.810 ໂດລາ ) ການລະດົມທຶນ 6 ເດືອນຕົ້ນປີ ສາມາດປະຕິບັດໄດ້ 837 ຕື້ 780 ລ້ານກວ່າກີບ, ເທົ່າກັບ 44,97 ສ່ວນຮ້ອຍ ຂອງແຜນການປີ ກວມເອົາ 15 ສ່ວນຮ້ອຍຂອງ GDP ຄາດຄະເນການປະຕິບັດແຜນການ 6 ເດືອນທ້າຍປີ 2017 ຈະສືບຕໍ່ປະຕິບັດບັນດາທິດທາງຄາດຫມາຍທີ່ກຳນົດໄວ້ໃນແຜນການປີ 2017 ທີ່ສະພາປະຊາຊົນ ແຂວງວຽງຈັນ ໄດ້ມີມະຕິຮັບຮອງໂດຍສະເພາະແມ່ນ ສືບຕໍ່ເຮັດໃຫ້ລວມຍອດຜະລິດຕະພັນພາຍໃນ GDP ຫມົດປີ ໃຫ້ໄດ້ໃນລະດັບ 8,3 ສ່ວນຮ້ອຍ, ສະເລ່ຍລວມຍອດ ຜະລິດຕະພັນໃຫ້ບັນລຸໄດ້ 1.810 ໂດລາ ຕໍ່ຄົນ. ພ້ອມນີ້ກໍເອົາໃຈໃສ່ການແກ້ໄຂຫນີ້ສິນການລົງທຶນມາຮອກປະຈຸບັນ ມີຍອດຫນີ້ຍົກມາຈາກສົກປີ 2015-2016 ມີທັງຫມົດ 123 ໂຄງການ, ມູນຄ່າ 204 ຕື້ 750 ລ້ານກວ່າກີບ. ສະເພາະໃນ 6 ເດືອນຕົ້ນປີ 2017 ສາມາດແກ້ໄຂຫນີ້ສິນໄດ້ທັງຫມົດ 25 ຕື້ 180 ລ້ານກວ່າກີບ, ເທົ່ກັບ 12,3 ສ່ວນຮ້ອຍ ຂອງຈຳນວນຫນີ້ສິນທັງຫມົດ. ການສ້າງແຜນການປີ 2018 ໄດ້ສັງລວມ ເຊີ່ງຈະຕ້ອງການງົບປະມານລົງທຶນຂອງລັດ ທີ່ບັນດາພະແນກການ, ອົງການ, ຫ້ອງການ ແລະ ເມືອງສະເຫນີມາມີທັງຫມົດ 222 ໂຄງການ ມູນຄ່າການລົງທຶນ 1 ພັນ 567 ຕື້ 900 ລ້ານກວ່າກີບ. ໃນຕອນທ້າຍ ທ່ານ ປະລິນຍາເອກ ສຸພັນ ແກ້ວມີໄຊ ລັດຖະມົນຕີກະຊວງ ແຜນການ ແລະ ການລົງທຶນ ຍັງໄດ້ລົງຢ້ຽມຢາມບັນດາໂຄງການ ທີ່ກຳລັງຈັດຕັ້ງປະຕິບັດ ຢູ່ພາຍໃນແຂວງຈັນ ຄື: ໂຄງການກໍ່ສ້າງຂົວຂ້າມນ້ຳປົດ ແລະ ໂຮງງານຜະລິດຕະພັນຈາກຢາງປລາ ສະຕິກ ຢູ່ທີ່ເມືອງແກ້ວອຸດົມ.
ຂອບໃຈ ພາບຂ່າວ: ທີມຂ່າວແຂວງວຽງຈັນ
Editor: ກຳປານາດ ລັດຖະເຮົ້າ
