ກອງບັນຊາການທະຫານເມືອງເຊໂປນ ຕີລາຄາ ການຈັດຕັ້ງປະຕິບັດວຽກງານປ້ອງກັນຊາດ ປະຈຳ 06 ເດືອນຕົ້ນປີ ແລະວາງທິດທາງແຜນການ 06 ເດືອນທ້າຍປີ 2017 ຂື້ນ ທີ່ຫ້ອງປະຊຸມກອງບັນຊາການທະຫານເມືອງເຊໂປນ, ແຂວງສະຫວັນນະເຂດ ໂດຍພາຍໃຕ້ການເປັນປະທານຂອງ ທ່ານ ພັນໂທ ຄໍາແພງ ກອນທິສັກ ຫົວໜ້າການເມືອງກອງບັນຊາການທະຫານເມືອງເຊໂປນ, ທ່ານ ພັນຕີ ສົມຫວັງ ຈຳປາແດງ ຫົວໜ້າການທະຫານ, ພ້ອມດ້ວຍອ້າຍນ້ອງທະຫານ ຕະຫຼອດຮອດສະມາຊິກພັກ-ພະນັກງານນັກຮົບກອງບັນຊາການທະຫານເມືອງເຂົ້າຮ່ວມ 70 ກວ່າທ່ານ.
ໃນພິທີ ທ່ານ ຮ້ອຍເອກ ກໍ່າແກ້ວ ອິນທະວົງ ຮອງຫ້ອງການບໍລິຫານທະຫານ ກໍ່ໄດ້ຂື້ນລາຍງານສະຫຼຸບຄືນຜົນການຈັດ ຕັ້ງປະຕິບັດວຽກງານປ້ອງກັນຊາດປະຈຳ 06 ເດືອນຕົ້ນປີ ແລະ ວາງທິດທາງແຜນການ 06 ເດືອນທ້າຍປີໃນທົ່ວກອງບັນຊາການທະຫານເມືອງເຊໂປນ ປະຈໍາ ປີ 2017. ຜ່ານການຈັດຕັ້ງປະຕິບັດຕົວຈິງໃນ 06 ເດືອນຜ່ານມາ ຄະນະພັກ-ຄະນະບັນຊາແຕ່ລະຫ້ອງ, ອົງການ, ກົມກອງກໍ່ໄດ້ເອົາໃຈໃສ່ ຈັດຕັ້ງປະຕິບັດສ້າງຂະບວນການແຂ່ງຂັນຢູ່ກົມກອງຂອງຕົນ ຢ່າງເປັນຂະບວນການຟົດຟື້ນ-ຕໍ່ເນື່ອງ ແລະ ມີຜົນງານຕົວຈິງຫຼາຍດ້ານຄື: ໄດ້ເອົາໃຈໃສ່ສຶກສາອົບຮົມການເມືອງ-ນໍາພາແນວຄິດໃຫ້ພະນັກງານ-ນັກຮົບຢ່າງເປັນປົກກະຕິ, ໄດ້ຈັດຕັ້ງກໍາລັງປະຈໍາການຕະຫຼອດ 24 ຊົວໂມງ, ຈັດຕັ້ງ 7 ລະບອບ 18 ວຽກ, ໄດ້ສ້າງທາງເຂົ້າກອງບັນຊາການທະຫານເມືອງ 01 ຄັ້ງແມ່ນທຶນຂອງເມືອງ, ໄດ້ເຮັດເດີ່ນບານເຕະມູນຄ່າ 12 ລ້ານກີບ ທຶນຂອງເມືອງ, ເຮັດເດີ່ນບານຕີ ມູນຄ່າ 5ລ້ານຫົກແສນກີບ, ສ້ອມແປງຮົ້ວອ້ອມຄ້າຍ 01 ຄັ້ງ, ສ້ອມແປງຫໍພັກໂສດ 01 ຄັ້ງ, ໄດ້ສ້າງເຮືອນຄົວກອງບັນຊາການ 01 ຫຼັງ ແລະ ກຳລັງກໍ່ສ້າງຫ້ອງການກອງບັນຊາການມູນຄ່າ 60 ລ້ານກີບ. ວຽກງານປູກຝັງ-ລ້ຽງສັດ ປະເພດ ງົວ, ແບ້, ໝູ ແລະ ສັດປີກ ໄດ້ເພີ່ມຂື້ນຢ່າງຫຼວງຫຼາຍ ແລະ ປູກພືດປະເພດກ້ວຍໄດ້ 550 ຂຸມ.ຈາກນັ້ນ, ທ່ານ ພັຕ ສົມຫວັງ ຈຳປາແດງ ຫົວໜ້າການທະຫານກອງບັນຊາການທະຫານເມືອງເຊໂປນ ກໍ່ໄດ້ຜ່ານທິດທາງແຜນການທ້າຍປີ 2017 ໂດຍອີງຕາມຄໍາສັ່ງແນະນຳຂອງກອງບັນຊາການທະຫານແຂວງ ວ່າດ້ວຍການເປີດຂະບວນການແຂ່ງຂັນໄລຍະສັ້ນ ເພື່ອຄໍານັບຮັບຕ້ອນ ງານບຸນສະເຫຼີມສະຫຼອງ ປີສາມັກຄີມິດຕະພາບ ລາວ-ວຽດນາມ ໃນປີ 2017 ນີ້ໃຫ້ມີຄວາມສະຫງົບປອດໄພ 100% ພ້ອມທັງຊຸກຍູ້ຂະບວນການປັບປຸງ ກໍ່ສ້າງກົມກອງ ທາງດ້ານການກໍ່ສ້າງ ນັກຮົບ ແລະ ກົມກອງວັດທະນະທຳ ຕິດພັນກັບໜ່ວຍພັກແຂງຮູ້ນໍາພາຮອບດ້ານ ແລະ ວຽກງານ 3 ປອດ, ສ້າງໃຫ້ໄດ້ວຽກດີຄົນເດັ່ນ ເຮັດໃຫ້ນາຍ ແລະ ພົນທະຫານທຸກຄົນໃນກົມກອງມີຄວາມບຸກບືນພັດທະນາຕົນເອງໃນດ້ານຕ່າງໆ ໃຫ້ປະກົດຜົນເປັນຈິງຢ່າງຟົດຟື້ນ. ໃນພິທີກໍ່ໄດ້ມີການມອບໃບຍ້ອງຍໍຊົມເຊີຍໃຫ້ແກ່ບຸກຄົນທີ່ມີຜົນງານດີເດັ່ນ ໃຫ້ກຽດມອບໂດຍ ທ່ານ ພັທ ຄຳແພງ ກອນທິສັກ ຫົວໜ້າການເມືອງກອງບັນຊາການທະຫານເມືອງເຊໂປນ, ສຸດທ້າຍທ່ານ ພັຕ ສົມຫວັງ ຈຳປາແດງ ກໍ່ໄດ້ຂຶ້ນໂອ້ລົມເຊິ່ງທ່ານໄດ້ເນັ້ນໜັກໃຫ້ບັນດາຄະນະພັກ-ຄະນະບັນຊາພ້ອມກັນສືບຕໍ່ຊຸກຍູ້ຂະບວນການວຽກງານເຮັດໃຫ້ທົ່ວເມືອງມີຄວາມສະຫງົບ, ຈັດຕັ້ງກຳລັງລົງກໍ່ສ້າງຮາກຖານການເມືອງແບບມູນເຊື້ອບ້ານໃກ້ຄຽງ ແລະ ບ່ອນກົມກອງຕັ້ງທັບໃຫ້ແໜ້ນແຟ້ນເອົາໃຈໃສ່ຕິດຕາມ ແລະ ກຳແໜ້ນສະພາບ, ຕ້ານ ແລະ ສະກັດກັ້ນ ປະກົດການຫຍໍ້ທໍ້ຕ່າງໆ ພ້ອມທັງແກ້ໄຂໜໍ່ແໜງທີ່ຈະພາໃຫ້ເກີດຄວາມບໍ່ສະຫງົບໃຫ້ໄດ້ຢ່າງທັນການ ແລະ ເດັດຂາດ ເອົາໃຈໃສ່ປ້ອງກັນວັນປະຫວັດສາດສໍາຄັນຕ່າງໆ ໃຫ້ປອດໄພມີຄວາມສະຫງົບ 100 ສ່ວນຮ້ອຍ
ທີມຂ່າວ ເມືອງເຊໂປນ
Editor: ກຳປານາດ ລັດຖະເຮົ້າ
