ໃນວັນທີ 16 ສິງຫາ 2017 ທີ່ສຳນັກງານນາຍົກລັດຖະມົນຕີ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂ່ຳນັບຂອງ ທ່ານ ໂຢຊິໂອະ ຄີມູຣະ ສະມາຊິກສະພາສູງ ຂອງປະເທດຍີ່ປຸ່ນ, ຮັບຜິດຊອບວຽກງານສະຫວັດດີການສັງຄົມ ພ້ອມດ້ວຍບັນດາສະມາຊິກສະມາຄົມມິດຕະພາບ ແຂວງໂອກີນາວາ-ລາວ ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງ ວັນທີ 15-19 ສິງຫາ 2017.
ໃນໂອກາດນີ້, ທ່ານຮອງນາຍົກລັດຖະມົນຕີ ກໍ່ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ພ້ອມທັງຕີລາຄາສູງ ຕໍ່ການເດີນທາງມາເຮັດວຽກຢູ່ລາວ ຂອງຄະນະຜູ້ແທນສະມາຄົມມິດຕະພາບ ແຂວງໂອກີນາວາ-ລາວ ໃນຄັ້ງນີ້ ໂດຍສະເພາະ ການສືບຕໍ່ການຮ່ວມມືທາງດ້ານການເບິ່ງແຍງຄົນຊະລາ ກໍ່ຄືວຽກງານກ່ຽວກັບສະຖານບຳບັດຄົນຊະລາ ແລະ ສະຫວັດດີການສັງຄົມຕ່າງໆ. ອັນຈະເປັນການເສີມຂະຫຍາຍສາຍພົວພັນຮ່ວມມື ລະຫວ່າງ ລາວ-ຍີ່ປຸ່ນ ກໍ່ຄືປະເທດລາວ ກັບແຂວງໂອກີນາວາ ໃຫ້ນັບມື້ນັບເຕີບໃຫຍ່ຂະຫຍາຍຕົວເປັນກ້າວໆ ເຊິ່ງໃນໄລຍະຜ່ານມາ ສປປ ລາວ ກໍ່ໄດ້ຮັບການຊ່ວຍເຫຼືອໃນຫຼາຍໆດ້ານ ຈາກລັດຖະບານ ແລະ ປະຊາຊົນຍີ່ປຸ່ນ ທັງທາງດ້ານສາທາລະນະສຸກ, ດ້ານການສຶກສາ ແລະ ການຍົກລະດັບຄວາມຮູ້-ຄວາມສາມາດ ໃຫ້ພະນັກງານວິຊາການຂອງລາວ ລວມເຖິງການມາລົງທຶນໃນຫຼາຍຂະແໜງການທີ່ລາວມີທ່າແຮງ ອັນເປັນການປະກອບສ່ວນສຳຄັນເຂົ້າໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດຂອງລາວ ແລະ ເປົ້າໝາຍການພັດທະນາແບບຍືນຍົງ (SDGs). ໄລຍະຜ່ານມາ ສະມາຄົມມິດຕະພາບ ແຂວງໂອກີນາວາ-ລາວ ກໍ່ໄດ້ໃຫ້ການຊ່ວຍເຫຼືອ ດ້ານການຜ່າຕັດສົບແວ່ງ-ເພດານໂວ່ ໃຫ້ແກ່ເດັກນ້ອຍລາວ ມາໂດຍຕະຫຼອດ ແລະ ການຊ່ວຍເຫຼືອດ້ານອື່ນໆ.
Editor: ກຳປານາດ ລັດຖະເຮົ້າ
