ເພຶ່ອແນ່ໃສ່ເຮັດໃຫ້ສະມາຊິກພັກ ພະນັກງານ-ລັດຖະກອນ ຢູ່ຕາມສໍານັກງານອົງການຈັດຕັ້ງຂັ້ນຕ່າງໆ ໄດ້ຮັບຮູ້ເຂົ້າໃຈ ຕໍ່ກັບປະຫວັດຄວາມເປັນມາ ຂອງວັນສໍາຄັນຕ່າງໆຂອງຊາດຢ່າງໜັກ ແໜ້ນ-ເລິກເຊິ່ງ. ດັ່ງນັ້ນ ໃນກາງເດືອນສິງຫາ 2017 ນີ້, ຢູ່ທີສະໂມສອນເມືອງປາກຊັນ ໄດ້ຈັດພິທີ ປະຖະກະຖາ ຫວນຄືນ 2 ວັນປະຫວັດສາດ ຂຶ້ນຄື: ວັນສ້າງຕັ້ງແນວລາວສ້າງຊາດ ຄົບຮອບ 67 ປີ ແລະ ວັນສ້າງຕັ້ງ ລັດຖະທໍາມະນູນ ຄົບຮອບ 26 ປີ. ໃຫ້ກຽດ ເຜີຍແຜ່ເອການສານໂດຍ ທ່ານ ລໍາສະໄໝ ວໍລະສານ ຄະນະປະຈໍາພັກແຂວງ, ປະທານແນວລາວສ້າງຊາດແຂວງ. ເຂົ້າຮ່ວມ ໃນພິມີ ທ່ານ ບຸນຍູ້ ພົມມະວົງສາ ກໍາມະການພັກແຂວງ ເລຂາພັກເມືອງ ເຈົ້າເມືອງປາກຊັນ. ມີພະເຖຣາ-ນຸເຖຣະ, ຕ່າງໜ້າຈາກພະແນກການ,ກົມກອງ,ພະນັກງານບຳນານ, ທະຫານ-ຕຳຫລວດ ຕະຫຼອດຮອດ ອົງການຈັດຕັ້ງອ້ອມຂ້າງ, ອໍານາດການປົກຄອງຂັ້ນບ້ານ ເຂົ້າຮ່ວມຮັບຟັງ.
ໂອກາດນີ້ ໄດ້ເລົ່າຄືນມູນເຊື້ອປະຫວັດຄວາມເປັນມາ ແລະ ຜົນງານການກຳເນີດເຕີບໃຫຍ່ ຂະຫຍາຍຕົວຂອງແນວລາວສ້າງຊາດ ນັບແຕ່ສະໄໝຕໍ່ສູ້ກູ້ຊາດ ຕ້ານຈັກກະພັດຜູ້ຮຸກຮານທັງແບບເກົ່າ ແລະ ແບບໃໝ່, ໂດຍໄດ້ປ່ຽນຊື່ເອີ້ນເຖິງ 3 ຄັ້ງ ຕາມຄວາມຮຽກຮ້ອງ ຕ້ອງການຂອງ ໜ້າທີ່ການເມືອງແຕ່ລະໄລຍະ ຄື: ແນວລາວອິດສະຫລະ, ແນວລາວຮັກຊາດ ແລະ ແນວລາວສ້າງຊາດໃນປັດຈຸບັນ. ນັບແຕ່ມື້ໄດ້ຮັບການສ້າງຕັ້ງ ໃນວັນທີ 13 ສິງຫາ 1950 ເປັນຕົ້ນມາ ອົງການແນວລາວສ້າງຊາດ ໄດ້ເປັນຄັນທຸງອັນແຂງ ແກ່ນໃນການເຕົ້າໂຮມ ຄວາມສາມັກຄີ ປະຊາຊົນບັນດາເຜົ່າ, ຊັ້ນຄົນ, ສາສະໜາ, ເພດໄວໄປຕາມແນວທາງ ຂອງພັກ ໃຫ້ເປັນປືກແຜ່ນແໜ້ນໜາ ເພື່ອປະກອບສ່ວນເຂົ້າ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ອັນໄດ້ເຮັດໃຫ້ແນວລາວສ້າງຊາດ ໄດ້ຮັບການຍ້ອງຍໍ ຈາກພັກ-ລັດຖະບານ ຢ່າງສົມກຽດ.
ພ້ອມນີ້, ທ່ານ ຍັງໄດ້ຍົກໃຫ້ເຫັນເຖິງຄວາມໝາຍ, ຄວາມສຳຄັນຂອງວັນ ລັດຖະທຳມະນູນ ແຫ່ງ ສປປ ລາວ ເຊິ່ງລັດຖະທຳມະນູນແຫ່ງ ສປປ ລາວ ໄດ້ຖືກຮັບຮອງ ໃນກອງປະຊຸມຄັ້ງທີ 6 ຂອງສະພາປະຊາຊົນສູງສຸດ ໃນຊຸດທີ 2 ປີ 1991 ແລະ ໄດ້ປະກາດໃຊ້ ໃນວັນທີ 15 ສິງຫາ 1991 ມາຮອດປີ 2003 ກອງປະຊຸມສະພາຊຸດທີ 5 ໄດ້ຮັບຮອງເອົາ ການປັບປຸງລັດຖະທຳມະນູນ ສະບັບດັ່ງກ່າວ ໃຫ້ຄົບຖ້ວນ ແລະ ສົມບູນກວ່າເກົ່າ, ການປະກາດໃຊ້ ລັດຖະທຳມະນູນ ແມ່ນມີຄວາມໝາຍຄວາມສຳຄັນ ຫລາຍຕໍ່ປະເທດຊາດ ເພາະວ່າລັດຖະທຳມະນູນ ແມ່ນກົດໝາຍພື້ນຖານ ສຳຄັນຂອງຊາດ ໃນການຫັນແນວທາງປ່ຽນແປງໃໝ່ ຢ່າງຮອບດ້ານທີ່ມີຫລັກການ ຂອງພັກປະຊາຊົນ ປະຕິວັດລາວ. ການປະກາດໃຊ້ ລັດຖະທຳມະນູນ ເປັນເຫດການ ການເມືອງທີ່ສຳຄັນຂອງຊາດ ທັງເປັນຂີດໝາຍໃໝ່ ໃນການຫັນໄປສູ່ການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ແລະ ສ້າງໃຫ້ເປັນລັດແຫ່ງກົດໝາຍ ເທື່ອລະກ້າວ. ມັນໄດ້ສ່ອງແສງໃຫ້ເຫັນ ເຖິງລັກສະນະທາດແທ້ ແລະ ການເຕີບໃຫຍ່ຂະຫຍາຍຕົວ ຂອງລະບອບປະຊາທິປະໄຕ ປະຊາຊົນລາວ ພາຍໃຕ້ການນຳພາ ອັນຖືກຕ້ອງຂອງ ພັກປະຊາຊົນ ປະຕິວັດລາວ ທັງເປັນການຢືນຢັນຕໍ່ໂລກ ກ່ຽວກັບຄວາມເປັນເອກະລາດ ແລະ ຜືນແຜ່ນດິນອັນຄົບຖ້ວນ ຂອງຊາດລາວ
ທີມຂ່າວ ແຂວງບໍລິຄຳໄຊ
Editor: ກຳປານາດ ລັດຖະເຮົ້າ
