ກາງເດືອນ ສິງຫາ 2017 ນີ້, ຢູ່ທີ່ສະໂມສອນແຂວງ, ສະພາປະຊາຊົນແຂວງບໍລິຄຳໄຊ  ໄດ້ຈັດພິທີປະຖະກະຖາວັນສ້າງຕັ້ງລັດຖະທຳມະນູນແຫ່ງ ສປປລາວ ຄົບຮອບ 26 ປີ (15 ສິງຫາ 1991-15 ສິງຫາ 2017) ແລະ ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ 8 ແລະ ສະພາປະຊາຊົນແຂວງບໍລິຄຳໄຊ ຊຸດທີ 1 ໂດຍການປະຖະກະຖາຂອງ ທ່ານ ປະລິນຍາເອກ ສຸວັນນີ ໄຊຊະນະ ຮອງເລຂາພັກແຂວງ, ປະທານສະພາປະຊາຊົນແຂວງ. ທັງນີ້ກໍເພື່ອເຮັດໃຫ້ສະມາຊິກພັກ, ພະນັກງານ-ລັດຖະກອນ, ນາຍ ແລະ ພົນທະຫານ, ນາຍ ແລະ ພົນຕໍາຫຼວດ ຕະຫຼອດຮອດນັກຮຽນ, ນັກສຶກສາພາຍໃນແຂວງ ໄດ້ຮັບຮູ້ແລະເຂົ້າໃຈຢ່າງເລິກເຊິ່ງຕໍ່ກັບວັນສຳຄັນດັ່ງກ່າວ, ທັງເປັນການເພີ່ມທະວີການໂຄສະນາສຶກສາອົບຮົມກົດໝາຍດ້ວຍຫຼາຍຮູບການ; ສ້າງສະຕິກົດໝາຍຢ່າງຖືກຕ້ອງ;ເອົາໃຈໃສ່ຄົ້ນຄວ້າເພື່ອຫັນເນື້ອໃນລັດຖະທໍາມະນູນ ອອກເປັນກົດໝາຍໃນຂົງເຂດຕ່າງໆຂອງຊີວິດສັງຄົມ, ເພື່ອໃຫ້ຖຶກຕ້ອງ ແລະ ສອດຄ່ອງກັບການຫັນເປັນລັດແຫ່ງກົດໝາຍ; ຕ້ອງເຊີດຊູບົດບາດນໍາໜ້າເປັນແບບຢ່າງຂອງພັກໃນການເຄົາລົບ ແລະ ປະຕິບັດກົດໝາຍ; ເພີ່ມທະວີວຽກງານກວດກາການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ, ເພີ່ມທະວີວຽກງານສຶກສາອົບຮົມການເມືຶອງແນວຄິດໃຫ້ພະນັກງານ-ລັດຖະກອນ ຂອງບັນດາອົງການປົກປ້ອງກົດໝາຍໃຫ້ເປັນປົກກະຕິ; ທົ່ວພັກ, ທົ່ວກອງທັບ, ທົ່ວປວງຊົນລາວ ຕ້ອງໄດ້ເພີ່ມທະວີນໍ້າໃຈຮັກຊາດ, ຄວາມສາມັກຄີເປັນເອກະພາບ, ມີນໍ້າໃຈເປັນເຈົ້າຕົນເອງເພິ່ງຕົນເອງ, ສ້າງຄວາມເຂັ້ມແຂງດ້ວຍຕົນເອງ, ຕັ້ງໜ້າປະກອບສ່ວນເຂົ້າໃນການຈັດຕັ້ງປະຕິບັດທິດທາງລວມ ແລະ ຈຸດໝາຍລວມຂອງພັກ ພ້ອມກັນປະຕິບັດລັດຖະທຳມະນູນ ແລະ ລະບຽບກົດໝາຍ ເພື່ອເຮັດໃຫ້ສັງຄົມມີຄວາມສະຫງົບປອດໄພ. ເວົ້າລວມແລ້ວລັດຖະທຳມະນູນ ໄດ້ກຳນົດນະໂຍບາຍຄວາມສາມັກຄີ ແລະ ຄວາມສະເໝີພາບ ລະຫວ່າງ ຊົນເຜົ່າຕ່າງໆ, ທຸກຊົນເຜົ່າລ້ວນແຕ່ມີສິດປົກປັກຮັກສາ, ເສີມຂະຫຍາຍຮີດຄອງປະເພນີ ແລະ ວັດທະນະທຳອັນດີງາມຂອງຕົນ ແລະ ຂອງຊາດ ສຶກສາອົບຮົມປະຊາຊົນລາວບັນດາເຜົ່າໃຫ້ຍົກສູງນ້ຳໃຈຮັກຊາດ, ຮັກລະບອບໃໝ່, ເປັນເຈົ້າການໃນການປົກປັກຮັກສາ ແລະ ສ້າງສາປະເທດຊາດ ເຮັດໃຫ້ປະຊາຊົນຮັ່ງມີຜາສຸກ, ປະເທດຊາດມັ່ງຄັ່ງ-ເຂັ້ມແຂງ, ສັງຄົມມີຄວາມສາມັກຄີປອງດອງ, ປະຊາທິປະໄຕ, ຍຸຕິທຳ ແລະ ປະກອບສ່ວນເຂົ້າໃນການພັດທະນາ ສປປ ລາວ ໃຫ້ກ້າວຂື້ນຢ່າງບໍ່ຢຸດຢັ້ງ.

Editor: ກຳປານາດ ລັດຖະເຮົ້າ