ພິທີສະເຫລີມສະຫລອງວັນສື່ມວນຊົນແຫ່ງຊາດ ແລະ ການພິມຈຳໜ່າຍ 13 ສິງຫາ ຄົບຮອບ 67 ປີ ຢູ່ແຂວງວຽງຈັນ ໄດ້ຈັດຂຶ້ນໃນວັນທີ 17 ສິງຫາ 2017 ທີ່ຜ່ານມາ ຢູ່ທີ່ສູນວັດທະນະທຳຂອງແຂວງ, ໂດຍການເປັນປະທານ ຂອງ ທ່ານ ຄຳຟອງ ບົວທອງ ກໍາມະການພັກແຂວງ ຫົວໜ້າພະແນກ ຖະແຫລງຂ່າວ-ວັດທະນະທຳ ແລະ ທ່ອງທ່ຽວ ແຂວງວຽງຈັນ, ມີບັນດາຄະນະພັກ-ຄະນະພະແນກ, ເຈົ້າເມືອງ, ຫົວໜ້າ-ຮອງຫົວໜ້າຫ້ອງການ ຖວທ ເມືອງ, ຂະແໜງການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໃນພິທີຄັ້ງນີ້ ທ່ານ ຈັນຖະໜອມ ກາສີອຸດົມ ຮອງຫົວໜ້າພະແນກ ຖວທ ແຂວງວຽງຈັນ, ທັງເປັນຜູ້ຊີ້ນຳວຽກງານຖະແຫຼງຂ່າວສື່ມວນຊົນ ໄດ້ຜ່ານປະຫວັດການກໍາເນີດ ແລະ ການເຕີບໃຫຍ່ຂະຫຍາຍຕົວຂອງສື່ມວນຊົນແຫ່ງຊາດ ແລະ ການພິມຈໍາໜ່າຍ ຕະຫລອດໄລຍະ 67 ປີ, ຜ່ານມາ ຊຶ່ງທ່ານໄດ້ຍົກໃຫ້ເຫັນ ນັບແຕ່ມື້ສ້າງຕັ້ງອົງການສື່ມວນຊົນລາວ ວັນທີ 13 ສິງຫາ 1950 ມາເຖິງປັດຈຸບັນ, ສື່ມວນຊົນລາວ ຊຶ່ງເປັນເວທີຖະແຫລງຂ່າວ ມີພາລະບົດບາດເປັນກະບອກສຽງຂອງອົງການຈັດຕັ້ງຂອງພັກ-ລັດ ແລະ ສັງຄົມ ໃນການໂຄສະນາສຶກສາອົບຮົມຕາມແນວທາງຂອງພັກ, ລະບຽບກົດໝາຍຂອງລັດ, ປຸກລະດົມນ້ຳໃຈຮັກຊາດ, ສະໜອງຂໍ້ມູນຂ່າວສານທາງດ້ານການເມືອງ,ເສດຖະກິດ-ສັງຄົມ, ວິທະຍາສາດເຕັກໂນໂລຊີ, ສາລະຄະດີຄວາມຮູ້, ສາລະບັນເທິງ ໃຫ້ແກ່ສັງຄົມ,ປະກອບສ່ວນຕ້ານປະກົດການຫຍໍ້ທໍ້ໃນສັງຄົມ, ເປັນເວທີເສີມຂະຫຍາຍ ປະຊາທິປະໄຕ ແລະ ສິດເປັນເຈົ້າປະເທດຊາດ ຂອງປະຊາຊົນບັນດາເຜົ່າ ນັ້ນໄດ້ເຕີບໃຫຍ່ ແລະ ຍາດໄດ້ຜົນງານອັນລໍ້າເລີດ ຜ່ານບາດລ້ຽວປະຫວັດສາດຂອງຊາດລາວ ເປັນຕົ້ນໃນໄລຍະແຫ່ງການຕໍ່ສູ້ປົດປ່ອຍຊາດ ກໍຄືໄລຍະແຫ່ງການປົກປັກຮັກສາ ແລະ ສ້າງສາໄລຍະແຫ່ງການປ່ຽນແປງໃໝ່ຂອງພັກ ເປັນຕົ້ນໜັງສືພິມ, ວາລະສານ, ສື່ເອເລັກໂຕນິກແລະການພິມຈຳໜ່າຍໄດ້ຮັບການຂະຫຍາຍຕົວວ່ອງໄວ. ພ້ອມນີ້ຜົນງານການປະພັນຂອງບັນດານັກຂຽນກໍໄດ້ຮັບການພັດທະນາ ແລະ ເຕີບໃຫຍ່ຂະຫຍາຍຕົວຂຶ້ນເລື້ອຍໆ. ທ່ານ ຮອງຫົວໜ້າພະແນກ ຖວທ ແຂວງ ໄດ້ລາຍງານໃຫ້ຮູ້ຕື່ມອີກວ່າ: ວຽກງານສື່ມວນຊົນແຂວງວຽງຈັນ ປະຈຸບັນກໍ່ມີການຂະຫຍາຍຕົວເຊັ່ນດຽວກັນເປັນຕົ້ນ ໜັງສືພິມແຂວງວຽງຈັນ ໄດ້ຈັດພິມ 2 ຄັ້ງຕໍ່ເດືອນຈຳນວນ 1.360 ສະບັບຕໍ່ເດືອນ, ການຈຳໜ່າຍແຈກຢາຍໜັງສືພິມໄດ້ລົງເຖິງທຸກເມືອງ ແລະ ສູນກາງ ຈຳນວນໜຶ່ງ, ມີສະຖານີວິທະຍຸກະຈາຍສຽງລະບົບເອັບເອມແຮງສົ່ງ 5 ກິໂລວັດ 1 ແຫ່ງ ໃນຄື້ນຄວາມຖີ່ 100 ເມກະເຫິດ, ຄື້ນສັນຍານກວມ 80% ຂອງພື້ນທີ່ ທົ່ວແຂວງ ແລະ ບາງຈຸດຂອງແຂວງອ້ອມຂ້າງ, ມີສອງພາກລວມ 9 ຊົ່ວໂມງ ໃນວັນລັດຖະການ ແລະ 4 ຊົ່ວໂມງເຄິ່ງໃນວັນເສົາ ລວມມີ 24 ລາຍການ, ນອກນີ້, ຍັງມີສະຖານີວິທະຍຸກະຈາຍສຽງລະບົບເອບເອມ (FM) ຂອງເມືອງໝື່ນ ທີ່ມີແຮງສົ່ງ 120 ວັດ 1 ແຫ່ງ ແລະ ໄດ້ຜະລິດລາຍການໂທລະພາບ “ແຂວງວຽງຈັນວັນໃໝ່” ໄປອອກອາກາດຢູ່ໂທລະພາບແຫ່ງຊາດລາວ ຊ່ອງ ທຊລ 1 ຈຳນວນ 1 ລາຍການ ຄວາມຍາວ ( 30 ນາທີ ) ຕໍ່ 1 ອາທິດ ຢ່າງເປັນປົກກະຕິ ແລະ ພາຍຫລັງສຳເລັດປະຊຸມ ໃນວັນດຽວກັນນີ້ຍັງໄດ້ຈັດການແຂ່ງຂັນກິລາເປຕັງ ເພຶ່ອເປັນການສ້າງຂະບວນການສະເຫລີມສະຫລອງ ວັນສື່ມວນຊົນແຫ່ງຊາດ ແລະ ການພິມຈຳໜ່າຍຕື່ມອີກ.
ຂອບໃຈ ທີມຂ່າວ ຖວທ ແຂວງວຽງຈັນ
Editor: ກຳປານາດ ລັດຖະເຮົ້າ
