ໃນໂອກາດການສະເຫລີມສະຫລອງ 2 ວັນປະຫວັດສາດ ລາວ-ຫວຽດນາມ ຄື: ວັນສ້າງຕັ້ງສາຍພົວພັນການທູດ ຄົບຮອບ 55 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 40 ປີ, ລັດຖະບານຫວຽດນາມ ໄດ້ປະດັບຫລຽນໄຊອິດສະຫລະ ໃຫ້ແກ່ການນຳແຂວງ ສາລະວັນ ທີ່ມີຜົນງານໃນການປະກອບສ່ວນ ຮັກສາມູນເຊື້ອຄຸນງາມຄວາມດີ, ຜົນງານໃນການປະກອບສ່ວນ ປົກປັກຮັກສາພັດທະນາເສດຖະກິດ-ສັງຄົມ ແລະ ການຮ່ວມມື, ໄມຕີຈິດມິດຕະພາບ ລະຫວ່າງ ສອງປະເທດ ລາວ-ຫວຽດນາມ ໃຫ້ໝັ້ນຄົງ ທະນົງແກ່ນຕະຫລອດໄປ.
ໃນເມື່ອບໍ່ດົນນີ້, ທ່ານ ຫງວຽນ ດັກ ກວິ່ງ, ຮອງເລຂາພັກແຂວງ ຫົວໜ້າຄະນະສະມາຊິກສະພາແຫ່ງຊາດ ປະຈຳແຂວງເຊີນລາ ຕາງໜ້າລັດຖະບານ ສາທາລະນະລັດ ສັງຄົມນິຍົມຫວຽດນາມ ປະດັບຫຼຽນໄຊ ອິດສະຫລະ ຊັ້ນ 2 ໃຫ້ ທ່ານ ສີສຸວັນ ວົງຈອມສີ, ເຈົ້າແຂວງໆ ສາລະວັນ ແລະ ປະຫລຽນໄຊອິດສະຫລະຊັ້ນ 3 ໃຫ້ ທ່ານ ບຸນທຽມ ແກ້ວໄຊຍະວົງ ຮອງເລຂາພັກ ແຂວງ, ຫົວໜ້າຄະນະຈັດຕັ້ງ ແຂວງສາລະວັນ, ທ່ານ ບຸນທຽມ ພົມມະສະຖິດ, ຮອງເລຂາພັກແຂວງ, ທ່ານ ພູທົງ ຄໍາມະນີວົງ, ຮອງເຈົ້າແຂວງສາລະວັນ ແລະ ທ່ານ ວິຊຽນ ນະວິກຸນ, ຮອງເຈົ້າແຂວງສາລະວັນ ໂດຍມີການນຳທັງສອງປະເທດ ລາວ-ຫວຽດນາມ ຄື: ແຂວງ ສາລະວັນ ແລະ ແຂວງ ເຊີນລາ, ສາທາລະນະລັດ ສັງຄົມນິຍົມ ຫວຽດນາມ ເຂົ້າຮ່ວມ.

Editor: ດາວໄຊ ສີວິໄລ