ທ່ານ ສຸພັນ ແກ້ວມີໄຊ, ລັດຖະມົນຕີ ກະຊວງແຜນການ ແລະ ການລົງທຶນ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບອຳລາຂອງ ທ່ານ ນົບພະດົນ ເທບພິທັກ, ເອກອັກຄະຣາຊະທູດ ແຫ່ງ ຣາຊະອານາຈັກໄທ ປະຈຳ ສປປ ລາວ ໃນວັນທີ 16 ສິງຫານີ້ ທີ່ກະຊວງດັ່ງກ່າວ, ຫລັງຈາກທີ່ໄດ້ສໍາເລັດ ການປະຕິບັດໜ້າທີ່ການທູດ ຢູ່ ສປປ ລາວເປັນເວລາ 3 ປີ.
ໃນໂອກາດດັ່ງກ່າວ, ທ່ານລັດຖະມົນຕີ ກະຊວງແຜນການ ແລະ ການລົງທຶນ ໄດ້ສະແດງຄວາມຊົມເຊີຍ ແລະ ຂອບໃຈຕໍ່ ທ່ານ ນົບພະດົນ ເທບພິທັກ ທີ່ໄດ້ປະກອບສ່ວນສົ່ງເສີມ ແລະ ຊຸກຍູ້ການພົວພັນຮ່ວມມື ລະຫວ່າງ ສປປ ລາວ ແລະ ຣາຊະອານາຈັກໄທ ໃຫ້ນັບມື້ນັບກ້ວາງຂວາງ ໃນໄລຍະການປະຕິບັດໜ້າທີ່ການທູດຢູ່ ສປປ ລາວ. ພ້ອມນີ້, ທ່ານ ຍັງໄດ້ອວຍພອນ ໃຫ້ທ່ານເອກອັກຄະຣາຊະທູດ ຈົ່ງກັບຄືນປະເທດ ດ້ວຍຄວາມສະຫວັດດີພາບ ແລະ ປະສົບຜົນສຳເລັດ ໃນພາລະກິດໃໝ່ຂອງຕົນ.
ໃນໂອກາດດຽວກັນ, ທ່ານ ນົບພະດົນ ເທບພິທັກ ກໍໄດ້ສະແດງ ຄວາມຂອບອົກຂອບໃຈຕໍ່ ທ່ານ ລັດຖະມົນຕີ ກໍຄື ລັດຖະບານລາວ ທີ່ໄດ້ໃຫ້ການສະໜັບສະໜູນ, ຊຸກຍູ້ຊ່ວຍເຫລືອ ໃຫ້ການຮ່ວມມືເປັນຢ່າງດີຕະຫລອດໄລຍະ ທີ່ໄດ້ມາປະຕິບັດໜ້າທີ່ການທູດ ຢູ່ ສປປ ລາວ ຈົນໄດ້ຮັບຜົນສໍາເລັດເປັນຢ່າງດີ.

Editor: ດາວໄຊ ສີວິໄລ