ກະຊວງແຜນການ ແລະ ການລົງທຶນ ຈັດກອງປະຊຸມສະຫລຸບ ວຽກງານກວດກາ ທົ່ວກະຊວງແຜນການ ແລະ ການລົງທຶນ 5 ປີ (2011-2015) ແລະ ຜັນຂະຫຍາຍເນື້ອ ໃນກອງປະຊຸມວຽກງານ ກວດກາທົ່ວປະເທດ ຄັ້ງທີ III ຂຶ້ນໃນວັນທີ 17 ສິງຫາ ຜ່ານມານີ້, ໂດຍການເປັນປະທານຂອງທ່ານ ຄຳລຽນ ພົນເສນາ, ປະທານກວດກາພັກ, ເປັນກຽດເຂົ້າຮ່ວມໂດຍທ່ານ ສຸພັນ ແກ້ວມີໄຊ, ລັດຖະມົນຕີກະຊວງແຜນການ ແລະ ການລົງທຶນ, ມີຮອງປະທານຄະນະກວດກາສູນກາງພັກ, ພ້ອມດ້ວຍສະມາຊິກເຂົ້າຮ່ວມ.
ທ່ານ ຄຳລຽນ ພົນເສນາ ກ່າວວ່າ: ວຽກງານຕິດຕາມກວດກາແມ່ນວຽກໜຶ່ງ ທີ່ສຳຄັນໃນພາລະບົດບາດການນຳພາຂອງພັກ ແລະ ການຄຸ້ມຄອງບໍລິຫານລັດ ບໍ່ມີການກວດກາ ກໍໝາຍຄວາມວ່າບໍ່ມີການນຳພາ. ວຽກງານຕິດຕາມກວດກາແມ່ນວຽກງານ ທີ່ສອດຫ້ອຍເຂົ້າໃນທຸກຂົງເຂດວຽກງານ ແລະ ເປັນວຽກທີ່ຕ້ອງໄດ້ເຮັດເປັນປົກກະຕິຂາດບໍ່ໄດ້ ເຊິ່ງສະມາຊິກທຸກຄົນຕ້ອງຢູ່ ພາຍໃຕ້ການກວດກາ. ພ້ອມນີ້, ທ່ານຍັງໄດ້ເນັ້ນໃສ່ການຈັດຕັ້ງຜັນຂະຫຍາຍ ເນື້ອໃນກອງປະຊຸມວຽກງານກວດກາ ຄັ້ງທີ່ III ໃຫ້ປະກົດຜົນເປັນຈິງ ແລະ ຈັດຕັ້ງຜັນຂະຫຍາຍມະຕິ, ຄຳສັ່ງ ແລະ ລະບຽບກົດໝາຍຕ່າງໆ ທີ່ພົວພັນເຖິງວຽກງານຕິດຕາມກວດກາ ເພື່ອຜັນຂະຫຍາຍ ບັນດາຫລັກການດັ່ງກ່າວ ມາເປັນແຜນລະອຽດຂອງຄະນະກວດກາພັກ ກໍຄື ກົມກວດກາ ເພື່ອພັດທະນາວຽກງານກວດກາ ໃຫ້ມີຄຸນນະພາບ, ເຂັ້ມແຂງ ແລະ ທັນສະໄໝເປັນກ້າວໆ.
ຜູ້ເຂົ້າຮ່ວມກອງປະຊຸມ, ຍັງໄດ້ຮັບຟັງການສະຫລຸບ ຕີລາຄາການເຄື່ອນໄຫວ ວຽກງານກວດກາ ທົ່ວປະເທດ ຄັ້ງທີ III ແລະ ຮັບຟັງການເຜີຍແຜ່ເອກະສານສຳຄັນ ຈຳນວນໜຶ່ງ ເຊັ່ນ: ບົດຄັດຈ້ອນການ ເຄື່ອນໄຫວວຽກງານກວດ ກາ 5 ປີ (2011-2015) ແລະ ທິດທາງແຜນການ 5 ປີ (2016-2020) ຂອງຄະນະກວດກາສູນກາງພັກ, ບົດໂອ້ລົມຂອງເລຂາທິການໃຫຍ່ ຄະນະບໍລິຫານງານສູນກາງພັກ ຕໍ່ກອງປະຊຸມວຽກງານກວດກາ ທົ່ວປະເທດ. ນອກຈາກນັ້ນ, ຜູ້ເຂົ້າຮ່ວມຍັງໄດ້ປະກອບຄຳຄິດຄຳເຫັນ ຕໍ່ບົດສະຫລຸບວຽກງານກວດກາ 5 ປີຜ່ານມາ ແລະ ທິດທາງແຜນການ ໃນຕໍ່ໜ້າ ເພື່ອເຮັດໃຫ້ບົດສະຫລຸບມີເນື້ອໃນຄົບຖ້ວນ.
ໃນໂອກາດດັ່ງກ່າວທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ ກໍໄດ້ໃຫ້ກຽດໂອ້ລົມຕໍ່ກອງປະຊຸມ. ກ່ອນອື່ນທ່ານໄດ້ສະແດງຄວາມຊົມເຊີຍ ຕໍ່ກອງປະຊຸມວຽກງານກວດກາທົ່ວກະຊວງ ໂດຍສະເພາະ ແມ່ນດ້ານເນື້ອໃນຂອງກອງປະຊຸມ ທີ່ໄດ້ສະຫລຸບລາຍງານ ທີ່ມີລັກສະນະກວມທຸກດ້ານ ຂອງວຽກງານກວດກາພັກ, ກວດກາລັດ, ການຕ້ານການສໍ້ລາດບັງຫລວງ, ຄົ້ນຄວ້າຄຳຮ້ອງ, ຄຳສະເໜີ. ເຊິ່ງການກວດກາແມ່ນແນ່ໃສ່ ຊອກໃຫ້ເຫັນດ້ານດີ, ຜົນສຳເລັດ, ບັນດາປັດໄຈໃໝ່ທີ່ກ້າວໜ້າ ເພື່ອສຸກຍູ້ສົ່ງເສີມ ແລະ ຊອກເຫັນດ້ານອ່ອນຂໍ້ຄົງຄ້າງ ເພື່ອດັດແປງແກ້ໄຂໃຫ້ທັນເວລາ.
Editor: ດາວໄຊ ສີວິໄລ
