ວັນທີ 15 ສິງຫາ ຜ່ານມານີ້, ສະຫະພັນກຳມະບານ ຄະນະພົວພັນຕ່າງປະເທດ ສູນກາງພັກ ໄດ້ຈັດພິທີເປີດບັ້ນແຂ່ງຂັນ 5 ເປັນເຈົ້າ, ໂດຍມີທ່ານ ບຸນຍອງ ບຸດທະວົງ ປະທານສະຫະພັນກຳມະບານ ຄະນະພົວພັນຕ່າງປະເທດສູນກາງພັກ, ທ່ານ ນາງ ສູນທອນ ໄຊຍະຈັກ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ, ມີບັນດາຜູ້ຕາງໜ້າຈາກສູນກາງສະຫະພັນກຳມະບານລາວ, ພ້ອມດ້ວຍສະມາຊິກກຳມະບານພາຍໃນຄະນະພົວພັນຕ່າງປະເທດ ສູນກາງພັກ ເຂົ້າຮ່ວມ.
ໃນໂອກາດດັ່ງກ່າວ, ທ່ານ ບຸນຍອງ ບຸດທະວົງ ໄດ້ຂຶ້ນຜ່ານບົດສະຫລຸບ ການເຄື່ອນໄຫວຂອງສະຫະພັນກຳມະບານ ຄະນະພົວພັນຕ່າງປະເທດສູນກາງພັກ ໃນໄລຍະ 2 ປີຜ່ານມາພາຍຫລັງທີ່ອົງຄະນະພັກຄະນະພົວ
ພັນຕ່າງປະເທດສູນກາງພັກໄດ້ແຍກເປັນເອກະລາດ ຈາກກະຊວງການຕ່າງປະເທດ ເຊິ່ງໄດ້ເອົາໃຈໃສ່ວຽກງານສຶກສາອົບຮົມການເມືອງ-ແນວຄິດ ໃຫ້ສະມາຊິກກຳມະບານຄະນະພົວພັນຕ່າງປະເທດສູນກາງພັກ, ນຳພາເຄື່ອນໄຫວວຽກງານ ຕາມພາລະບົດບາດ ໃນຂອບເຂດສິດໜ້າທີ່ຂອງຕົນ ໄດ້ເປັນຢ່າງດີ, ມີຄວາມຮັບຜິດຊອບສູງ, ສາມາດຍາດໄດ້ຜົນງານ ແລະ ມີຜົນສຳເລັດດ້ວຍດີຕະຫລອດມາ, ໄດ້ມີການປັບປຸງວຽກງານການຈັດຕັ້ງ ແລະ ຂະຫຍາຍສະມາຊິກກຳມະບານຄະນະພົວພັນຕ່າງປະເທດສູນກາງພັກ ໄດ້ເປັນຢ່າງດີ. ສຳລັບ ທິດທາງແຜນການໃນຕໍ່ໜ້າ ສະຫະພັນກຳມະບານ ຄະນະພົວພັນຕ່າງປະເທດສູນກາງພັກ ໄດ້ວາງຄາດໝາຍສູ້ຊົນ ເພື່ອຈັດຕັ້ງປະຕິບັດຂະບວນການແຂ່ງຂັນ 5 ເປັນເຈົ້າ ທີ່ສູນກາງສະ ຫະພັນກຳມະບານລາວ ວາງອອກໃຫ້ປະກົດຜົນເປັນຈິງ.
ໂອກາດດຽວກັນ, ທ່ານ ນາງ ສູນທອນ ໄຊຍະຈັກ ໄດ້ມີຄຳເຫັນໂອລົມຕໍ່ສະມາຊິກກຳມະບານ ຄະນະພົວພັນຕ່າງປະເທດສູນກາງພັກ ໂດຍຍົກໃຫ້ເຫັນເຖິງ ສິດ ແລະ ໜ້າທີ່ ຂອງກຳມະບານ ເພື່ອໃຫ້ສະມາຊິກກຳມະບານພາຍໃນຄະນະພົວພັນຕ່າງປະເທດສູນກາງພັກ ເຂົ້າໃຈ ກ່ຽວກັບວຽກງານກຳມະບານ ເປັນຕົ້ນ ກ່ຽວກັບຂະບວນການແຂ່ງຂັນ 5 ເປັນເຈົ້າ ຂອງສູນກາງສະຫະພັນກຳມະບານລາວ ວາງອອກ, ພ້ອມທັງ ເນັ້ນໃຫ້ສືບຕໍ່ຄົ້ນຄວ້າ, ກໍາແໜ້ນ ຕໍ່ບັນດາເນື້ອໃນເອກະສານ ກ່ຽວກັບຂໍ້ແຂ່ງຂັນ 5 ເປັນເຈົ້າ ຢ່າງເລິກເຊິ່ງເຖິງຖອງ, ສ້າງຄວາມສາມັກຄີເປັນເອກະພາບ ເພື່ອພ້ອມກັນຈັດຕັ້ງປະຕິບັດຂໍ້ແຂ່ງຂັນດັ່ງກ່າວ ໃຫ້ໄດ້ໃນລະດັບ 80% ຂຶ້ນໄປ, ເວົ້າລວມ ເວົ້າສະເພາະສະມາຊິກກຳມະບານ ທີ່ເປັນພະນັກງານວິຊາການ ຈະໄດ້ເພີ່ມທະວີຄວາມເປັນເຈົ້າການ ໃນການປະຕິບັດແນວທາງນະໂຍບາຍຂອງພັກ, ມະຕິຄຳສັ່ງ ແລະ ກົດໝາຍຂອງລັດ ກໍຄື ໜ້າທີ່ວິຊາສະເພາະຂອງຕົນ ດ້ວຍຄວາມຮັບຜິດຊອບໃຫ້ສູງທີ່ສຸດ ເພື່ອເຮັດໃຫ້ ການເປີດຂະບວນການແຂ່ງຂັນໃນຄັ້ງນີ້ ບັນລຸຜົນສຳເລັດຕາມຄາດໝາຍທີ່ວາງໄວ້.

Editor: ດາວໄຊ ສີວິໄລ