ສູນກາງແນວລາວສ້າງຊາດ ຮ່ວມກັບ ມູນນິທີຊ່ວຍເຫລືອຄົນທຸກຍາກ ແລະ ບັນດາເຫລົ່າສີລະປິນ ຫນູ່ມລາວ ໄດ້ຈັດງານສະແດງດົນຕີ ການກຸສົນ ລະດົມວັດຖຸ-ປັດໄຈ ເພື່ອນຳໄປຊ່ວຍເຫລືອປະຊາຊົນ ທີ່ໄດ້ຮັບຜົນກະທົບ ຈາກໄພພິບັດທາງທຳມະຊາດ, ງານດັ່ງກ່າວແມ່ນໄດ້ຈັດຂື້ນ ໃນຕອນຄ່ຳວັນທີ 19 ສິງຫາ 2017 ທີ່ຜ່ານມາ, ທີ່ຕະຫລາດອີ່ມສຸກ, ບ້ານສາຍລົມ, ເມືອງຈັນທະບູລີ ນະຄອນຫລວງວຽງຈັນ, ເຂົ້າຮ່ວມພາຍໃນງານ ມີ ທ່ານ ຈັນທະວົງ ແສນອາມາດມົນຕີ ຮອງປະທານສູນກາງແນວລາວສ້າງຊາດ, ທ່ານນາງ ຄຳຈັນ ພົມແສງສະຫວັນ ຮອງປະທານສູນກາງແນວລາວສ້າງຊາດ, ມີຫົວຫນ້າກົມ-ຮອງກົມ, ຜູ້ຕາງຫນ້າມູນນິທິຊ່ວຍເຫລືອຄົນທຸກຍາກ ແຫ່ງ ສປປ ລາວ , ບັນດານັກສີລະປິນລາວ ແລະ ສື່ມວນຊົນເຂົ້າຮ່ວມ.

ທ່ານ ຈັນທະວົງ ແສນອາມາດມົນຕີ ກ່າວວ່າ: ແນວລາວສ້າງຊາດ ສຶບທອດ ແລະ ເສີມຂະຫຍາຍມູນເຊື້ອອັນສະຫງ່າລາສີ ຂອງແນວລາວອິດສະຫລະ ແລະ ແນວລາວຮັກຊາດ ໃນການເຕົ້າໂຮມຄວາມສະມັກຄີ ປະຊາຊົນລາວບັນດາເຜົ່າ, ການປະຕິບັດສອງຫນ້າທີ່ຍຸດທະສາດ ຄື ປົກປັກຮັກສາ ແລະ ສ້າງສາພັດທະນາປະເທດຊາດ. ວັນທີ 13 ສິງຫາ ເປັນວັນປະຫວັດສາດອັນສຳຄັນ ຂອງແນວລາວສ້າງຊາດ ເຊິ່ງ ແນວລາວສ້າງຊາດ ໄດ້ຮ່ວມກັບກັບອົງການຈັດຕັງອື່ນໆທີ່ກ່ຽວຂ້ອງ ໃນການຈັດຕັ້ງສະເຫລີມສະຫລອງວັນສ້າງຕັງແນວລາງສ້າງຊາດ ຄົບຮອບ 67 ປີ 13 ສິງຫາ 1950 ເຖິງ 13 ສິງຫາ 2017 ການຈັດຕັ້ງສະເຫລີມສະຫລອງດັ່ງກ່າວ ເຊີ່ງເປັນວັນສາມັກຄີປອງດອງທົ່ວປວງຊົນ ເພື່ອຫວນຕຶນເຖິງປະຫວັດຄວາມເປັນມາ ແລະ ມູນເຊື້ອອັນສະຫງ່າລາສີ, ພ້ອມທັງຜົນງານທີ່ພົ້ນເດັ່ນຂອງຕົນໃນແຕ່ລະໄລຍະ ຄວາມສາມັກຄີ ປອງດອງແມ່ນການສະແດງອອກເຖິງ ການຊ່ວຍເຫລືອເຊີ່ງກັນ ແລະ ກັນ, ການໃຫ້ກຽດເຊິ່ງກັນ ແລະ ກັນ, ຄວາມເຂົ້າອົກເຂົ້າໃຈ, ການຮ່ວມອຸດົມການດຽວກັນ, ເຫັນໃຈກັນ, ຮັກແພງກັນ. ແລະ ໃນປີ 2017 ປະຊາຊົນລາວບັນດາເຜົ່າ ຢູ່ໃນຫລາຍແຂວງທົ່ວປະເທດ ແມ່ນໄດ້ຮັບຜົນກະທົບຈາກໄພພິບັດທຳມະຊາດ ແລະ ໄດ້ຮັບຄວາມເສຍຫາຍທາງດ້ານວັດຖຸ ແລະ ຊັບສິນ ອັນໄດ້ສ້າງຄວາມຫຍຸ້ງຍາກຜຶດເຄືອງ ຕໍ່ການດຳລົງຊີວິດ. ເພື່ອເປັນການລະດົມທຶນ ທາງດ້ານວັດຖຸປັດໄຈ ສູນກາງແນວລາວສ້າງຊາດ ໄດ້ຮ່ວມກັບ ມູນນິທິຊ່ວຍເຫລືອຄົນທຸກຍາກແຫ່ງ ສປປ ລາວ, ບັນດານັກສີລະປິນລາວ ຈັດຕັ້ງງານດັ່ງກ່າວຂື້ນ ເພື່ອນຳເອົາວັດຖຸປັດໄຈ ດັ່ງກ່າວ ໄຳປມອບຊ່ວຍເຫລືອຜູ້ປະສົບໄພ ທຳມະຊາດ.

ສຳລັບສີລະປິນ ທີ່ມາສະແດງ ໃນງານ ຄັ້ງນີ້ ມີ: ວົງ dynamic, ວົງ zuza, ນັກສີລະປິນຫນຸ່ມ ຕີ ອຸດາໄລ, ໂມ ວົງຄຳເຫລົາ, ສັກ ວົງເຊວ, ວົງ 79, ວົງ ເມກ້າແບນ ແລະ ພາກສ່ວນອື່ນໆ.

Editor: ກຳປານາດ ລັດຖະເຮົ້າ