ໃນວັນທີ 21 ສິງຫາ 2017 ຜ່ານມາ, ຄະນະກຳມະການ ອະໄພຍະໂທດລະດັບຊາດ ໄດ້ຈັດກອງປະຊຸມເຜີຍແຜ່ກ່ຽວກັບວຽກງານອະໄພຍະໂທດ ໃຫ້ແກ່ຄະນະກຳມະການອະໄພຍະໂທດ ໃຫ້ບັນດາແຂວງພາກກາງ ເຊິ່ງປະກອບມີ ແຂວງວຽງຈັນ, ຊຽງຂວາງ, ໄຊສົມບູນ, ບໍລິຄຳໄຊ, ຄຳມ່ວນ ແລະ ນະຄອນຫລວງວຽງຈັນ. ຢູ່ທີ່ຫ້ອງວ່າການປົກຄອງ ແຂວງວຽງຈັນ, ໂດຍພາຍໃຕ້ການເປັນປະທານຂອງ ທ່ານ ຄຳພາ ແສງດາລາ ຮອງປະທານສານ ປະຊາຊົນສູງສຸດ, ທັງເປັນຄະນະກຳມະການອະໄພຍະໂທດລະດັບຊາດ. ເປັນກຽດເຂົ້າຮ່ວມຂອງບັນດາຄະນະກຳມະການອະໄພຍະໂທດ ຈາກບັນດາ 6 ແຂວງ ພາກກາງ ຈຳນວນ 45 ທ່ານ.
ໃນກອງປະຊຸມຄັ້ງນີ້ ໄດ້ແນະນຳວິທີການຈັດຕັ້ງປະຕິບັດ ຄຳແນະນຳເລກທີ 06/ຄອຊ ລົງວັນທີ 23 / 6 / 2017 ວ່າດ້ວຍ ການຈັດຕັ້ງປະຕິບັດວຽກງານອະໄພຍະໂທດ ປະຈຳປີ 2017 ໂດຍສະເພາະແມ່ນເນັ້ນຫນັກ ວິທີການຄົ້ນຄ້ວາ, ຄັດເລືອກນັກໂທດຜູ້ທີ່ມີຄວາມກ້າວຫນ້າໃນການຝຶກຝົນຫລໍ່ຫລອມຕົນເອງ ໃນການປະຕິບັດລະບຽບໃນ ຄ້າຍຄຸມຂັງ-ດັດສ້າງ ເປັນຕົ້ນ ແມ່ນການອອກແຮງງານດີ, ມີການປ່ຽນແປງທາງດ້ານທັດສະນະແນວຄິດ, ຮູ້ສຶກກິນແຫນງແຄງໃຈຕໍ່ການກະທຳຜິດ ຂອງຕົນໃນໄລຍະຜ່ານມາ ໃຫ້ມີຄວາມຖືກຕ້ອງຕາມຫລັກການ, ເງື່ອນໄຂ,ວິທີການຄັດເລືອກປະເພດນັກໂທດ ແລະ ການປະກອບເອກະສານຢັ້ງຢືນຕ່າງໆເພື່ອຮັບປະກັນໃຫ້ແກ່ນັກໂທດຜູ້ທີ່ມີຄວາມກ້າວຫນ້າໃການຝຶກຝົນຫລໍ່ຫລອມຕົນເອງ ໃນໄລຍະການປະຕິບັດໂທດ ເພື່ອແນໃສ່ເຮັດໃຫ້ການຈັດຕັ້ງປະຕິບັດແນວທາງນະໂຍບາຍມະນຸດສະທຳ ຂອງພັກ-ລັດ ຕໍ່ວຽກງານອະໄພຍະໂທດ ໄດ້ຮັບປະສິດຕິຜົນຕາມລະດັບຄາດຫມາຍທີ່ວາງໄວ້, ເນື່ອງໃນວັນທີ 2 ທັນວາ 2017 ເຊິ່ງເປັນວັນສະຖາປານາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 42 ປີ, ທີ່ຈະໄດ້ຫມູນວຽນມາເຖິງອີກບໍ່ດົນ ໃຫ້ເປັນຂະບວນການຟົດຟື້ນ ແລະ ທັງເປັນການສ້າງຄວາມເອກະພາບ ແລະ ຄວາມຖືກຕ້ອງໃນການຈັດຕັ້ງປະຕິບັດວຽກງານດັ່ງກ່າວ ໃຫ້ຖືກຕ້ອງສອດຄ່ອງທັນຕາມເວລາ ທີ່ກຳນົດໄວ້.
ທີມຂ່າວ ຈາກແຂວງວຽງຈັນ
Editor: ກຳປານາດ ລັດຖະເຮົ້າ
