ໃນໂອກາດເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຂອງຄະນະກວດກາສູນກາງພັກກອມມູນິດຈີນ ໃນວັນທີ 22 ສິງຫາ ຜ່ານມານີ້, ທ່ານ ຈຸ ກົວ ຊຽນ, ຫົວໜ້າຫ້ອງການ ໂຄສະນາອົບຮົມ ຂອງຄະນະກວດກາ ສູນກາງພັກກອມມູນິດຈີນ ໄດ້ຈັດຕັ້ງປາຖະກະຖາບົດຮຽນ ໃນການຄຸ້ມຄອງພັກ ແລະ ການບໍລິຫານລັດ ໂດຍສະເພາະທັດສະນະໃໜ່, ແນວຄິດໃໜ່ ແລະ ຍຸດທະສາດໃໜ່ ໃນການປົກຄອງລັດບໍລິຫານປະເທດຂອງ ທ່ານ ສີ ຈິນ ຜິງ ແລະ ວິທີການ, ບົດຮຽນ ໃນການຄຸ້ມຄອງພັກຂອງພັກກອມມູນິດຈີນ ໃນການຢຶດໜັ້ນ ແລະ ພັດທະນາສັງຄົມນິຍົມ ທີ່ມີສີສັນພິເສດຂອງຈີນ, ໂດຍມີການນໍາຈາກ ບັນດາກະຊວງອ້ອມຂ້າງສູນກາງ, ອົງການຈັດຕັ້ງ ຂັ້ນສູງກາງ ແລະ ນະ ຄອນຫລວງເຂົ້າຮ່ວມຮັບຟັງ.
ໃນໂອກາດດັ່ງກ່າວ, ທ່ານ ຈຸ ກົວ ຊຽນ ໄດ້ຍົກໃຫ້ເຫັນເຖິງ ຜົນສຳເລັດອັນໃຫຍ່ຫລວງ ແລະ ຮອບດ້ານທີ່ ພັກ-ລັດ ແລະ ປະຊາຊົນຈີນ ຍາດມາໄດ້ຕະຫລອດໄລຍະທີ່ຜ່ານມາ, ໂດຍສະເພາະນັບແຕ່ກອງປະຊຸມໃຫຍ່ ຄັ້ງທີ 18 ຂອງພັກຄອມມູນິດຈີນ ເປັນຕົ້ນມາ ສູນກາງພັກກອມມູນິດຈີນ ທີ່ຖື ທ່ານ ສີ ຈິນ ຜິງ ເປັນແກນກາງນັ້ນ ໄດ້ສະເໜີອອກກ່ຽວກັບການບັນລຸເປົ້າໝາຍ “100 ປີ ສອງເຫດການ” ແລະ ຄວາມຝັນຂອງຈີນ ໃນການຟື້ນຟູຄວາມຈະເລີນຮຸ່ງເຮືອງຂອງເຊື້ອຊາດຈີນ, ໄດ້ກຳນົດຍຸດທະສາດ “4 ຮອບດ້ານ” ຄື: ສ້າງສັງຄົມອິ່ມໜຳສຳລານ ໃຫ້ສຳເລັດຢ່າງຮອບດ້ານ, ລົງເລິກການປະຕິຮູບ ຢ່າງຮອບດ້ານ, ປົກຄອງປະເທດດ້ວຍ ກົດໝາຍຢ່າງຮອບດ້ານ, ຄຸ້ມຄອງພັກ ຢ່າງເຂັ້ມງວດຮອບດ້ານ ເຊິ່ງໄດ້ເປັນການເປີດສັງກາດໃໝ່ ຂອງການປົກຄອງ ລັດບໍລິຫານປະເທດ.
ໃນ 5 ປີ ຜ່ານມາ ສູນກາງພັກກອມມູນິດຈີນ ທີ່ຖື ທ່ານ ສີ ຈິນ ຜິງ ເປັນແກນກາງນັ້ນ, ໄດ້ຊຸກຍູ້ການຄຸ້ມຄອງພັກຢ່າງເຂັ້ມງວດ, ປະຕິບັດວິໄນເຂັ້ມງວດ, ຄຸ້ມຄອງພະນັກງານ ຢ່າງເຂັ້ມງວດ, ມີແບບແຜນທີ່ເຂັ້ມງວດ ແລະ ຕ້ານການສໍ້ລາດບັງຫລວງ ຢ່າງເຂັ້ມງວດ ໂດຍໄດ້ກາຍເປັນທ່າແຮງເດັດຖານ ໃນການຕໍ່ຕ້ານ ການສໍ້ລາດບັງຫລວງ, ຊີວິດການເມືອງພາຍໃນພັກ ໄດ້ມີບັນຍາກາດໃໝ່, ທົ່ວພັກມີອຸດົມການທີ່ໜັກແໜ້ນ, ຄຸນທາດຂອງສະມາຊິກພັກ ມີຄວາມເຂັ້ມແຂງ, ພື້ນຖານໃນການກຳອຳນາດ ແລະ ຄວາມສັດທາ ຂອງປະຊາຊົນຕໍ່ພັກ ໄດ້ມີຄວາມແໜ້ນໜາກວ່າເກົ່າ ເຊິ່ງໄດ້ເປັນສິ່ງຄ້ຳປະກັນ ດ້ານການເມືອງທີ່ເຂັ້ມແຂງ, ໜັກແໜ້ນ ຕໍ່ການພັດທະນາພາລະກິດຕ່າງໆຂອງພັກ ກໍຄື ປະເທດຊາດ.
ພ້ອມດຽວກັນນັ້ນ, ທ່ານ ຈຸ ກົວ ຊຽນ ຍັງຍົກໃຫ້ເຫັນເຖິງທັດສະນະໃໝ່, ແນວຄິດໃໝ່ ແລະ ຍຸດທະສາດໃໝ່ ໃນການປົກຄອງລັດ-ບໍລິຫານປະເທດ ຂອງທ່ານເລຂາທິການໃຫຍ່ ສີ ຈິນ ຜິງ ຕື່ມອີກ.

Editor: ດາວໄຊ ສີວິໄລ