ໃນວັນທີ 23 ສິງຫາ 2017 ຜ່ານມານີ້, ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 10 ແລະ ສະມາຊິກສະພາປະຊາຊົນ ແຂວງວຽງຈັນ, ໄດ້ຕ້ອນຮັບຄະນະຜູ້ແທນສະພາແຫ່ງຊາດ ຈາກ າທາລະນະລັດ ສັງຄົມນີຍົມ ຫວຽດນາມ, ເຊິ່ງນຳໂດຍ ທ່ານ ຮິ່ງ ແທງ ແກງ ຮອງເລຂາ ຜູ້ປະຈຳການຄະນະພັກແຂວງ ຫົວຫນ້າຄະນະສະມາຊິກສະພາແຫ່ງຊາດ ແຂວງ ບິ່ງຖ້ວນ ສສ ຫວຽດນາມ ພ້ອມຄະນະ ເປັນກຽດຕ້ອນຮັບອັນອົບອຸ່ນຂອງ ທ່ານ ສົມດີ ແກ້ວດາລາວິນ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 10 ຮອງປະທານສະພາປະຊາຊົນ ແຂວງວຽງຈັນ.
ໃນໂອກາດນີ້ທັງສອງຝ່າຍໄດ້ຜັດປ່ຽນກັນລາຍງານສະພາບການເຕີບໃຫຍ່ຂະຫຍາຍຕົວທາງດ້ານເສດຖະກິດ-ສັງຄົມ ໃນໄລຍະຜ່ານມາອັດຕາເຕີບໂຕທາງດ້ານເສດຖະກິດ ແຂວງວຽງຈັນ ລວມຍອດຜະລິດຕະພັນພາຍໃນ GDP ໄດ້ຂະຫຍາຍຕົວໃນລະດັບ 8,17% ໃນນີ້ ໂຄງປະກອບດ້ານເສດຖະກິດ: ຂະແໜງກະສິກໍາ ກວມ 37,67%, ຂະແໜງອຸດສາຫະກໍາ ກວມ 31,05% ແລະ ຂະແໜງບໍລິການ ກວມ 31,28%. ສະເລ່ຍລາຍຮັບຕໍ່ຫົວຄົນ ໄດ້ 13 ລ້ານກວ່າກີບ ຕໍ່ຄົນຕໍ່ປີ.ພ້ອມນີ້ຍັງໄດ້ເປັນເຈົ້າການປະກອບສ່ວນໃນການສ້າງ ແລະ ພິຈາລະນາດ້ານນິຕິກໍາ ເຊິ່ງໄດ້ເຂົ້າຮ່ວມການສຳມະນາ, ທາບທາມຮ່າງກົດໝາຍສ້າງໃໝ່ ແລະ ສະບັບປັບປຸງທີ່ສະພາແຫ່ງຊາດ ຈັດຂຶ້ນ, ໄດ້ເປັນເຈົ້າການເຂົ້າຮ່ວມ ແລະ ປະກອບຄຳຄິດຄຳເຫັນ ເພື່ອຮັບຮອງກົດໝາຍທີ່ນຳເຂົ້າພິຈາລະນາ ໃນກອງປະຊຸມສະໄໝສາມັນຂອງສະພາແຫ່ງຊາດ ໄລຍະຜ່ານມາ ຈຳນວນ 29 ສະບັບ, ໃນນັ້ນກົດໝາຍສ້າງໃໝ່ 8 ສະບັບ, ປັບປຸງ 19 ສະບັບ ແລະ ທາບທາມ 2 ສະບັບ ໄດ້ຮ່ວມກັບສະພາແຂວງພິຈາລະນາແກ້ໄຂຄຳຮ້ອງຂໍຄວາມເປັນທຳຂອງປະຊາຊົນ ແລະ ຄຳສະເໜີຂອງປະຊາຊົນ ໂດຍຜ່ານໂທລະສັບສາຍດ່ວນໃນກອງປະຊຸມສະໄໝສາມັນແຕ່ລະຄັ້ງຂອງສະພາແຫ່ງຊາດ, ສະພາປະຊາຊົນແຂວງ ທັງໝົດ 78 ສະບັບ, ໄດ້ພິຈາລະນາພ້ອມທັງນໍາສົ່ງໃຫ້ພາກສ່ວນກ່ຽວຂ້ອງແກ້ໄຂ 68 ສະບັບ, ໃນນີ້ໄດ້ລາຍງານ ໃຫ້ສະພາແຫ່ງຊາດ 4 ສະບັບ, ກໍາລັງສືບຕໍ່ຄົ້ນຄວ້າ 10 ສະບັບ.ທັງນີ້ກໍເພື່ອແນໃສ່ເຮັດໃຫ້ຄະນະສະມາຊິກສະພາແຫ່ງຊາດປະຈໍາແຂວງວຽງຈັນ ແລະ ຄະນະຜູ້ແທນສະພາແຫ່ງຊາດປະຈຳແຂວງບິ່ງຖ້ວນ ສສ ຫວຽດນາມ ກໍຄື 2 ຊາດ ລາວ-ຫວຽດນາມ ໄດ້ຮັດແຫນ້ຍສາຍພົວພັນຄວາມສາມັກຄີ ທັງເປັນຂີດໝາຍອັນດີເປັນການປະກອບສ່ວນເສີມຂະຫຍາຍການພົວພັນຮ່ວມມືຂອງສອງພັກ, ສອງລັດ, ກໍ່ຄືສອງອົງການນິຕິບັນຍັດ ໃຫ້ແໜ້ນແຟ້ນຍິ່ງຂຶ້ນ.
Editor: ກຳປານາດ ລັດຖະເຮົ້າ
