ເມື່ອບໍ່ດົນຜ່ານມານີ້, ຢູ່ທີ່ສະໂມສອນ ຫ້ອງວ່າການປົກຄອງເມືອງເຊໂປນ, ແຂວງສະຫວັນນະເຂດ ໄດ້ຈັດກອງປະຊຸມ ຄົບຄະນະບໍລິຫານງານ ສະຫະພັນແມ່ຍິງ ຄັງທີ 2 ສະໄຫມທີ 8 ຂື້ນ, ໂດຍການໃຫ້ກຽດເປັນປະທານ ຂອງ ທ່ານນາງ ມະນີຈັນ ຈັນທະນາລີ ຄະນະປະຈໍາພັກເມືອງ, ປະທານກວດກາພັກ-ລັດເມືອງ, ທັງເປັນສະມາຊີກສະພາທ້ອງຖິ່ນ ເຂດ 5 ເມືອງເຊໂປນ, ມີ ທ່ານນາງ ພູທອງ ພົມມະຈັນ ກໍາມະການພັກເມືອງ ປະທານສະຫະພັນແມ່ຍິງເມືອງ, ມີບັນດາຄະນະນຳຂັ້ນເມືອງ, ຫົວໜ້າ,ຄະນະຫ້ອງການອ້ອມຂ້າງເມືອງ, ຄະນະສະຫະພັນແມ່ຍິງໜ່ວຍ, ຮາກຖານ ແລະ ບ້ານອ້ອມຂ້າງເຂົ້າຮ່ວມ ຢ່າງພ້ອມພຽງ.
ທ່ານນາງ ກອງສະໄໝ ແວງຈະເລີນ ຄະນະສະຫະພັນແມ່ຍີງເມືອງ ກໍ່ໄດ້ຂື້ນຜ່ານບົດສະຫຼຸບຕີລາຄາການເຄື່ອນໄຫວ 1ປີ ຜ່ານມາ ໄດ້ມີຜົນງານຫລາຍດ້ານ ທີ່ພົ້ນເດັ່ນ ພ້ອມທັງມີຂໍ້ສະດວກ ແລະ ຂໍ້ຫຍຸ້ງຍາກແຕ່ວ່າສະຫະພັນແມ່ຍິງ ກໍ່ໄດ້ພ້ອມກັນເອົາໃຈໃສ່ປະຕິບັດວຽກງານຕາມແຜນການທີ່ວາງໄວ້ ໄດ້ເປັນຢ່າງດີ, ເຕົ້າໂຮມຄວາມສາມັກຄີເອື້ອຍນ້ອງແມ່ຍິງບັນດາເຜົ່າ ໃຫ້ເປັນປຶກແຜ່ນແໜ້ນໜາ, ປັບປຸງ ແລະ ຂະຫຍາຍການຈັດຕັ້ງສະຫະພັນແມ່ຍິງປະຈຸບັນທົ່ວເມືອງ ມີສະມາຊິກສະຫະພັນແມ່ຍິງ 9 ພັນກວ່າຄົນ, ມີ 538 ໜ່ວຍ, 12 ຮາກຖານອ້ອມຂ້າງ ແລະ ທິດທາງແຜນການຕໍ່ໜ້າ 2018, ວຽກງານສຶກສາອົບຮົມການເມືອງແນວຄິດສືບຕໍ່ເຂົ້າຮ່ວມເຊື່ອມຊຶມແນວທາງນະໂຍບາຍຂອງພັກ, ລັດຖະທຳມະນູນ, ລະບຽບກົດໝາຍຂອງລັດ, ວຽກງານປັບປຸງ ແລະ ຂະຫຍາຍການຈັດຕັ້ງສະຫະພັນແມ່ຍິງ ພ້ອມກັນສືບຕໍ່ເອົາໃຈໃສ່ປັບປຸງກົງຈັກການຈັດຕັ້ງແມ່ຍິງແຕ່ລະຂັ້ນ ໃຫ້ມີຄວາມໜັກແໜ້ນ, ເຂັ້ມແຂງທາງດ້ານປະລິມານ ແລະ ຄຸນນະພາບ, ສືບຕໍ່ປັບປຸງບ້ານ, ໜ່ວຍ ແລະ ຮາກຖານໃຫ້ໄດ້ຕາມລະດັບຄາດໝາຍທີ່ວາງໄວ້, ວຽກງານກອງທຶນທະນຸເຄາະຊ່ວຍເຫຼືອເຊິ່ງກັນ ແລະ ກັນ,ປະຈຸບັນ ມີສະມາຊິກກອງທຶນທັງໝົດ 834 ຄົນ, ຍິງ 607ຄົນ, ມີເງິນແຮທັງໝົດ 41 ລ້ານກວ່າກີບ ແລະ ໄດ້ມອບເງິນໃຫ້ຜູ້ເສຍຊີວິດ ທັງໝົດ 48.046.000 ກີິບ (ສີ່ສິບແປດລ້ານ ສີ່ສິບຫົກພັນກີບ).ໄດ້ຂະຫຍາຍສະມາຊິກກອງທຶນໃນປີ 2016-2017 ຂະຫຍາຍໄດ້ 113 ຄົນ, ຍິງ 71 ຄົນ, ແຜນສືບຕໍ່ ຄືເອົາໃຈໃສ່ອົບຮົມ ແລະ ແນະນຳຜູ້ເຮັດວຽກກອງທຶນຂັ້ນເມືອງ, ຂັ້ນຮາກຖານ, ຂັ້ນບ້ານ ແລະ ຂັ້ນໜ່ວຍໃຫ້ເອົາໃຈໃສ່ປະຕິບັດກົດລະບຽບກອງທຶນ, ສືບຕໍ່ປຸກລະດົມຂົນຂວາຍສະມາຊິກແມ່ຍິງທີ່ອາຍຸກະສຽນບໍ່ກາຍ 70 ປີ ເຂົ້າເປັນສະມາຊິກກອງທຶນໃຫ້ໄດ້ຫຼາຍຂື້ນ ແລະ ສືບຕໍ່ຂະຫຍາຍສະມາຊິກກອງທຶນ ໃນສົກປີ 2018 ໃຫ້ໄດ້ 50 ຄົນຂື້ນໄປ. ໃນກອງປະຊຸມບັນດາແຂກເຂົ້າຮ່ວມກໍ່ໄດ້ພັດປ່ຽນກັນຂື້ນປະກອບຄຳຄິດຄຳເຫັນເຈາະຈິ້ມບັນຫາທີ່ຍັງຄົງຄ້າງເຂົ້າໃນບົດສະຫຼຸບຢ່າງກົງໄປກົງມາ.
ຕອນທ້າຍ ທ່ານນາງ ມະນີຈັນ ຈັນທະນາລີ ກໍ່ໄດ້ໃຫ້ກຽດຂື້ນໂອ້ລົມ ແລະ ໃຫ້ທິດເຍືອງທາງກ່ອນອື່ນເພິ່ນກໍ່ຍ້ອງຍໍຊົມເຊີຍ ທີ່ຜົນງານຍາດມາໄດ້ໃນໄລຍະຜ່ານມາ ແລະຮຽກຮ້ອງໃຫ້ຄະນະສະມາຊິກແມ່ຍີງຂັ້ນເມືອງ, ໜ່ວຍ, ຮາກຖານ, ບ້ານເອົາໃຈໃສ່ວຽກງານແນວຄິດການເມືອງ, ສຶກສາອົບຮົມ, ການເຕົ້າໂຮມຊຸມໜຸມວຽກບ້ານການເມືອງໃຫ້ທຸກຄົນເອົາໃຈໃສ່ ແລະ ນຳເອົາໄປຈັດຕັງປະຕິບັດໃຫ້ເກີດດອກອອກຜົນ, ເອົາໃຈໃສ່ໃນການຈັດຕັ້ງ, ກວດກາ, ປັບປຸງແມ່ຍິງໃຫ້ເຂັ້ມແຂງແລະພົ້ນເດັ່ນໃນໜ່ວຍ, ຮາກຖານ,ບ້ານຂອງຕົນ ໃຫ້ກວ້າງຂວາງ
ຂອບໃຈ ທີມຂ່າວ ຫ້ອງການ ຖວທ ເມືອງເຊໂປນ
Editor: ກຳປານາດ ລັດຖະເຮົ້າ
