ງານສັບປະດາວັດທະນະທຳມິດຕະພາບ ຫົວພັນ - ແທັງຮ່ວາ ໄດ້ຈັດຂື້ນເມື່ອບໍ່ດົນມານີ້ ຢູ່ທີ່ຫໍວັດທະນະທຳຂອງແຂວງຫົວພັນ, ໂດຍມີບັນດາທ່ານ ການນຳຂັ້ນສູງຂອງສອງແຂວງ ຫົວພັນ - ແທັງຮ່ວາ ແລະ ມວນຊົນເທດສະບານເມືອງຊໍາເໜືອ ເຂົ້າຮ່ວມຢ່າງພ້ອມພຽງ.
ໃນພິທີ ທ່ານ ວັນໄຊ ແພງຊຸມມາ ກຳມະການສູນກາງພັກ ເລຂາພັກແຂວງ ເຈົ້າແຂວງຫົວພັນ ໄດ້ຂື້ນກ່າວບົດປາໄສ ຕໍ່ງານສັບປະດາວັດທະນະທຳມິດຕະພາບ ວ່າ: ສອງຊາດ ລາວ - ຫວຽດນາມ ເປັນສອງຊາດທີ່ມີການພົວພັນຖານອ້າຍນ້ອງເພື່ອນມິດ ບ້ານໃກ້ເຮືອນຄຽງທີ່ດີນຳກັນ ມາແຕ່ບູຮານນະການ, ປະຊາຊົນສອງຊາດໄດ້ດຳລົງຊີວິດ, ທຳມາຫາກິນ ບົນຜືນແຜນດິນທີ່ມີສາຍ ພູຫຼວງຍາວຢຽດ ແລະ ແມ່ນໍ້າຫຼາຍສາຍຕິດຈອດກັນ ແຕ່ເໜືອຫາໃຕ້, ມີຄວາມສາມັກຄີ ຊ່ວຍເຫຼືອເກື່ອກູນກັນ ເໝືອນອ້າຍ-ນ້ອງ ຮ່ວມອຸທອນ ແລະ ໄດ້ຮ່ວມກັນສ້າງປະຫວັດສາດ ອັນອົງອາດກ້າຫານຂອງສອງຊາດ, ນໍ້າໃຈມິດຕະພາບ ຄວາມສາມັກຄີ ລະຫວ່າງ ສອງພັກ, ສອງລັດ ລາວ - ຫວຽດນາມ. ມູນເຊື້ອອັນດີງາມແຫ່ງການພົວພັນສາມັກຄີ ແລະ ການຮ່ວມມືຢ່າງຮອບດ້ານດ້ວຍໄມຕີຈິດອັນບໍລິສຸດ ຜຸດຜ່ອງນັ້ນ ໄດ້ເຮັດໃຫ້ປະຊາຊົນສອງຊາດ ລາວ - ຫວຽດນາມ ເວົ້າສະເພາະ ປະຊາຊົນບັນດາເຜົ່າຊາວແຂວງຫົວພັນ ແລະ ບັນດາແຂວງແຮກສ່ຽວຂອງ ສສ ຫວຽດນາມ ມີຄວາມເຊື່ອໝັ້ນຢ່າງໜັກແໜ້ນຕໍ່ບາດກ້າວຂະຫຍາຍຕົວ ກໍ່ຄື ອະນາຄົດອັນສະຫວ່າງສະໄຫວ ໃນການນຳພາຂອງສອງປະເທດພວກເຮົາ ຕະຫຼອດໄລຍະຜ່ານມາ ບັນດານະຄອນ ແລະ ບັນດາແຂວງແຮກສ່ຽວ ສສ ຫວຽດນາມ, ກໍ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອປະຊາຊົນ ແຂວງຫົວພັນ ສິ່ງພົ້ນເດັ່ນແມ່ນໄລຍະ ປີ 2012 – 2017 ລວມມູນຄ່າການຊ່ວຍເຫຼືອ 14 ລ້ານ 36 ພັນ 644 ໂດລາສະຫະລັດ, ປະກອບມີ ໂຄງການກໍ່ສ້າງໂຮງຮຽນການເມືອງ-ການປົກຄອງແຂວງ ທີ່ເມືອງວຽງໄຊ, ສວນມິດຕະພາບ ຫົວພັນ - ແທັງຮ່ວາ, ກໍ່ກັນເຈື່ອນແຄມນໍ້າຊຳ, ເຮືອນຮັບແຂກພິເສດຂອງແຂວງ, ໂຮງຮຽນອະນຸບານ ນາທອງ, ພັນໄຊ, ນາທົ່ງຈອງ, ໂຮງຮຽນມໍຕົ້ນບ້ານກ້ານ ແລະ ໂຄງການອື່ນໆ ຈຳນວນໜຶ່ງ.
ໂອກາດນີ້ ທ່ານ ໂດ້ມິ່ງຕວ້ນ ຮອງເລຂາພັກແຂວງໆແທັງຮ່ວາ ຕາງໜ້າໃຫ້ຄະພັກອຳນາດການປົກຄອງ ແລະ ປະຊາຊົນແຂວງແທັງຮ່ວາ ກໍ່ໄດ້ກ່າວບົດປາໄສຕໍ່ງານທີ່ມີຄວາມໝາຍຄວາມສຳຄັນນີ້ ວ່າ: ກວ່າເຄິ່ງສະຕະວັດຜ່ານມາ ເຖີງແມ່ນວ່າໃນໄລຍະສົງຄາມ ຈະດຸເດືອດ ຫຼື ສັບສົນ ປ່ຽນແປງຫຼາຍປານໃດກໍ່ຕາມ ແຕ່ສາຍພົວພັນແບບພິເສດ ລາວ - ຫວຽດນາມ, ຫົວພັນ ແລະ ແທັງ ຮ່ວາ ບັນດາການນໍາ ແລະ ປະຊາຊົນສອງແຂວງ ໄດ້ນັບມື້ເພີ່ມພູນຄູນສ້າງ ເປັນມໍລະດົກອັນລໍ້າຄ່າ ໄວ້ໃຫ້ເຍົາວະຊົນ-ຊາວໜຸ່ມຮຸ້ນໃໝ່ ແລະ ປະຊາຊົນສອງແຂວງພວກເຮົາຕະຫຼອດໄປ ແລະ ແຂວງແທັງຮ່ວາ ຍັງຢືນຢັນວ່າ ຈະຄຽງບ່າຄຽງໄຫຼ່ ໃກ້ຊິດຕິດແທດ ກັບຄະນະພັກອຳນາດການປົກຄອງ ແລະ ປະຊາຊົນບັນດາເຜົ່າແຂວງຫົວພັນ ພ້ອມກັນສູ້ຊົນສ້າງສາຍພົວພັນ ລາວ - ຫວຽດນາມ ຫົວພັນ - ແທັງຮ່ວາ ຈົ່ງໝັ້ນຄົງທະນົງແກ່ນ ຕະຫຼອດກາລະນານ.
Editor: ກຳປານາດ ລັດຖະເຮົ້າ
