ວັນທີ 29 ສິງຫາ 2017 ນີ້, ທີ່ຫ້ອງປະຊຸມກະຊວງອຸດສາຫະກຳ ແລະ ການຄ້າ ໄດ້ຈັດພິທີປະດັບຫລຽນ ແລະ ມອບໃບຍ້ອງໃຫ້ບຸກ ແລະ ກົມກອງລວມຫມູ່ ທີ່ມີຜົນງານດີເດັ່ນ ໃນການປະກອບສ່ວນວຽກງານ ກະກຽມ ແລະ ເຂົ້າຮ່ວມງານວາງສະແດງໂລກ ມີລາໂນ 2015 ທີ່ຜ່ານມາ ຢູ່ທີ່ປະເທດອິຕາລີ. ໃຫ້ກຽດເຂົ້າຮ່ວມ ມີ ທ່ານນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກຳ ແລະ ການຄ້າ, ພ້ອມນັ້ນ, ຍັງມີຮອງລັດຖະມົນຕີ, ຄະນະກົມ, ຄະນະພະແນກ ແລະ ພາກສ່ວນທີ່ທີ່ກ່ຽວຂ້ອງເຂົ້າຮ່ວມ ຢ່າງພ້ອມພຽງ.
ໃນພິທີ ທ່ານ ສົມຫວັງ ນິນທະວົງ ຫົວຫນ້າກົມການຄ້າ ໄດ້ກ່າວວ່າ: ສປປ ລາວ ໄດ້ເຂົ້າເປັນສະມາຊິກຂອງອົງການ ບີໄອອີ (BIE) ແລະ ເລີ່ມເຂົ້າຮ່ວມງານວາງສະແດງໂລກ ຮາໂນເວີ 2000, ງານວາງສະແດງໂລກ ອາຍຊິ 2005, ງານວາງສະແດງໂລກ ຊຽງໄຮ 2010 ແລະ ງານວາງສະແດງໂລກ ມິລາໂນ 2015 ທີ່ປະເທດ ອິຕະລີ. ຈຸດປະສົງ ຂອງການຈັດງານ ແລະ ເຂົ້າຮ່ວມງານວາງສະແດງໂລກແຕ່ລະຄັ້ງ ແມ່ນເພື່ອເປັນເວທີສຳຄັນ ໃນການໂຄສະນາວັດທະນະທຳ, ບັນດາທ່າແຮງ ແລະ ນະວັດຕະກຳໃຫມ່ ຂອງປະເທດຕົນ ທີ່ຕິດພັນກັບຫົວຂໍ້ງານ, ເປັນເວທີໃນການແລກປ່ຍນຂໍ້ມູນຂ່າວນສານເຊີ່ງກັນ ແລະ ກັນ ລະຫວ່າງປະເທດ ທີ່ເຂົ້າຮ່ວມ ແລະ ແຜນການຮ່ວມມືກັນພັດທະນາດ້ານຕ່າງໆ. ຜ່ານການເຂົ້າຮ່ວມງານວາງສະແດງໂລກ ຫລາຍຄັງຜ່ານມາ ຂອງ ສປປ ລາວ ແມ່ນໄດ້ຮັບບົດຮຽນ ແລະ ຜົນໄດ້ຮັບຫລາຍດ້ານ, ເຊີ່ງອາດຈະບໍ່ໄດ້ຮັບຜົນທາງກົງທາງດ້ານເສດຖະກິດ ແຕ່ໄດ້ຮັບຜົນທາງອ້ອມ ໃນການໂຄສະນາປະເທດລາວ ໃຫ້ເປັນທີ່ຮູ້ຈັກຫລາຍຂື້ນ. ໂດຍສະເພາະ ໄດ້ເສີມສ້າງສາຍພົວພັນຮ່ວມມືກັນ ລະຫວ່າງ ລັດຖະບານ, ເຊີ່ງງານວາງສະແດງໂລກ ເປັນເວທີຫນຶ່ງ ທີ່ສຳຄັນ ໃນການປຶກສາຫາລືກ່ຽວກັບບັນຫາຕ່າງໆ ແລະ ນະໂຍບາຍໃນການຮ່ວມມືສອງຝ່າຍໃຫ້ນັບມື້ ນັບເພີ່ມຂື້ນ. ຕໍ່ກັບຜົນສຳເລັດດັ່ງກ່າວ ເຮັດໃຫ້ບົດບາດ ຂອງ ສປປ ລາວ ໄດ້ຮັບການຍົກສູງ ຂື້ນໃນເວທີພາກພື້ນ ແລະ ສາກົນ ຈາກຜົນສຳເລັດທີ່ພົ້ນເດັ່ນ ກະຊວງອຸດສາຫະກຳ ແລະ ການຄ້າ ໄດ້ນຳສະເຫນີ ຂັ້ນເທິງ ເພື່ອຍ້ອງຍໍສັນລະເສີນ, ບຸກຄົນ ແລະ ກົມກອງ ລວມຫມູ່ ຈາກກະຊວງ ແລະ ພາກສ່ວນທີ່ກ່ຽວຂ້ອງ ເຊີ່ງໄດ້ຮັບການອະນຸມັດປະດັບຫລຍນ ແລະ ຍ້ອງຍໍ ດັ່ງນີ້: ປະດັບຫລຽນໄຊແຮງງານ ຊັ້ນ 2 ໃນຈຳນວນ 7 ທ່ານ, ປະດັບຫລຽນໄຊແຮງງານ ຊັ້ນ 3 ໃນຈຳນວນ 11 ທ່ານ ແລະ 1 ກົມກອງ. ມອບໃບຍ້ອງຍໍລັດຖະບານ ໃຫ້ ຈຳນວນ 3 ທ່ານ ແລະ 9 ກົມກອງ. ເຊິ່ງລວມທັງໝົດ ການຍ້ອງຍໍໃນຄັ້ງນີ້ ມີ ຈຳນວນ 21 ທ່ານ ແລະ 10 ກົມກອງ. ເຊີ່ງໃຫ້ກຽດ ເປັນປະທານປະດັບຫລຽນ ໂດຍແມ່ນທ່ານນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກຳ ແລະ ການຄ້າ.
Editor: ກຳປານາດ ລັດຖະເຮົ້າ
