ກອງປະຊຸມ ເຜີຍແຜ່ກົດໝາຍ ວ່າດວ້ຍການແກ້ໄຂຄຳຮອ້ງທຸກ ( ສະບັບປັບປຸງ ) ແລະ ແນະນຳວຽກງານຄົ້ນຄວ້າຄຳຮອ້ງ-ຄຳສະເໜີ ຢູ່ເມືອງທ່າແຕງ ໄດ້ໄຂຂື້ນ ແລະ ອັດລົງ ໃນວັນທີ 29 ສິງຫາ 2017 ຜ່ານມານີ້ ທີ່ສະໂມສອນໃຫ່ຍ ເມືອງທ່າແຕງ, ແຂວງເຊກອງ. ໂດຍການເປັນປະທານຂອງ ທ່ານ ຄຳສອນ ກອນເຍີ ເລຂາພັກເມືອງ ເຈົ້າເມືອງໆ ທ່າແຕງ ໃຫ້ກຽດເຂົ້າຮວ່ມຂອງ ທ່ານ ພູວັນ ສຸກສາຄອນ ຫົວໜ້າຂະແໜງຄຳຮອ້ງ -ຄຳສະເໜີ ພະແນກກວດກາແຂວງ ເຊກອງ, ມີ ທ່ານ ບຸນສວນ ບຸດບຸນມາ ຄະນະປະຈໍາພັກເມືອງ, ປະທານກວດກາພັກ - ລັດ ເມືອງທ່າແຕງ, ມີກໍາມະການພັກເມືອງ, ຫົວໜ້າຫອ້ງການ-ຮອງຫອ້ງການ, ພະນັກງານລັດຖະກອນເຂົ້າຮວ່ມ.
ທ່ານ ພູວັນ ສຸກສາຄອນ ຫົວໜ້າຂະແໜງຄຳຮອ້ງ-ຄຳສະເໜີ ພະແນກກວດກາແຂວງເຊກອງ ໄດ້ໃຫ້ກຽດຜ່ານ ກົດໝ າຍ ວ່າດວ້ຍ ການແກ້ໄຂຄຳຮອ້ງທຸກ( ສະບັບປັບປຸງ ) ເລກທີ 53/ສພຊ ລົງວັນທີ 15 ທັນວາ 2014, ລວມມີ 9 ພາກ 6 ໝວດ ແລະ 64 ມາດຕາ. ກົດໝາຍສະບັບນີ້ ແມ່ນກຳນົດຫຼັກການ,ລະບຽບການ ແລະ ມາດຕະການ ກ່ຽວກັບການດຳເນີນຄຸ້ມຄອງ, ກວດກາແກ້ໄຂຄຳຮອ້ງທຸກຂອງພົນລະເມືອງ ແລະ ການຈັດຕັ້ງ ເພື່ອໃຫ້ວຽກງານດັ່ງກ່າວ ມີຄວາມຖຶກຕອ້ງຕາມກົດໝາຍ ແລະ ລະບຽບການ, ແນໃສ່ເສີມຂະຫຍາຍສິດເປັນເຈົ້າ ຂອງປະຊາຊົນ ແລະ ເພີ່ມທະວີນິຕິກຳ ປົກປັກຮັກສາຜົນປະໂຫຍດຂອງລັດ, ລວມໝູ່, ສິດ ແລະ ຜົນປະໂຫຍດອັນຊອບທຳຂອງພົນລະເມືອງ, ປະກອບສວ່ນເຮັດໃຫ້ສັງຄົມມີຄວາມສະຫງົບ,ເປັນລະບຽບ ຮຽບຮອ້ຍຍຸດຕິທຳ ແລະ ສີວິໄລ. ກອງປະຊຸມກໍ່ໄດ້ແລກປ່ຽນຄຳຄິດເຫັນ ທາງກົດໝາຍ ແລະ ຂໍ້ຂອ້ງໃຈຢ່າງກົງໄປກົງມາ ແລະ ດຳເນີນໄປໃນ ທາງທີ່ສ້າງສັນ. ໂອກາດນີ້ ທ່ານ ຄຳສອນ ກອນເຍີ ເລຂາພັກເມືອງ ເຈົ້າເມືອງ-ເມືອງ ທ່າແຕງ ໄດ້ເນັ້ນ ໃຫ້ຫອ້ງການ- ຂະແໜງການ,ພະນັກງານ ທີ່ກ່ຽວຂອ້ງໂດຍສະເພາະແມ່ນ ຂົງເຂດວຽກງານກວດກາພັກ-ລັດ ຕອ້ງໄດ້ຮັບຮູ້ ແລະ ເຂົ້າໃຈຢ່າງເລິກເຊີ່ງ ກ່ຽວກັບກົດໝາຍ ວ່າດວ້ຍການແກ້ໄຂຄຳຮອ້ງທຸກ. ເພື່ອຮັບປະກັນໃນການແກ້ໄຂ ບັນຫາດ້ານຕ່າງໆ ທີ່ເກີດຂຶ້ນໃນສັງຄົມ ປັດຈຸບັນ ໄປຕາມຂະບວນການຍຸດຕິທຳ ແລະ ຖືກຕອ້ງ ສອດຄອ່ງກັບລະບຽບກົດໝາຍຂອງພັກ-ລັດ ວາງອອກ.
Editor: ກຳປານາດ ລັດຖະເຮົ້າ
