ໂດຍປະຕິບັດຕາມ ຄໍາແນະນໍາ ຂອງຄະນະກໍາມະການອະໄພຍະໂທດລະດັບຊາດ ສະບັບເລກທີ 06/ຄອຊ, ລົງວັນທີ 23/06/2017 ວ່າດ້ວຍ ການຈັດຕັ້ງປະຕິບັດວຽກງານອະໄພຍະໂທດ ປະຈໍາປີ 2017, ສະນັ້ນ, ເພື່ອເຮັດໃຫ້ການຈັດຕັ້ງປະຕິບັດວຽກງານອະໄພຍະໂທດໄດ້ຮັບການຈັດຕັ້ງປະຕິບັດຢ່າງມີຜົນສໍາເລັດນັ້ນ ເນື່ອງໃນໂອກາດສະເຫລີມສະຫລອງວັນຊາດ ທີ 02 ທັນວາ 2017 ຄົບຮອບ 42 ປີ ທີ່ຈະມາເຖິງ ເພື່ອຮັບປະກັນຄວາມຖືກຕ້ອງຍຸຕິທໍາ ແລະ ທັນເວລາ
ດັ່ງນັ້ນ, ໃນວັນທີ 28 ສິງຫາ 2017 ຜ່ານມານີ້ ຢູູ່ທີ່ ຫ້ອງປະຊຸມ ອົງການໄອຍະການປະຊາຊົນ ແຂວງເຊກອງ ໄດ້ດໍາເນີນກອງປະຊຸມຄົ້ນຄວ້າປຶກສາຫາລື ແລະ ສະເຫນີບັນຊີລາຍຊື່ອະໄພຍະໂທດ, ຜ່ອນໂທດ ແລະ ປ່ອຍຕົວ ໃຫ້ແກ່ນັກໂທດຄ້າຍຄຸມຂັງ-ດັດສ້າງ ປກສ ແຂວງເຊກອງ ໂດຍເປັນກຽດເຂົ້າຮ່ວມຂອງ ທ່ານ ສົມນິດ ສີລິບຸ້ນລ້ຽງ ກໍາມະການພັກແຂວງ ຫົວຫນ້າອົງການໄອຍະການປະຊາຊົນແຂວງເຊກອງ, ມີກຳມະການອະໄພຍະໂທດ ຜ່ອນໂທດ ແລະ ປ່ອຍຕົວ ຂັ້ນແຂວງ, ມີ ທ່ານ ພັນໂທ ທອງຂຽວ ອໍລະສິງ ຫົວໜ້າຄ້າຍຄຸມຂັງ-ດັດສ້າງ ປກສ ແຂວງເຊກອງ, ມີສານປະຊາຊົນແຂວງ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.
ກອງປະຊຸມຄັັ້ງນີ້ບັນດາຄະນະກໍາມະການໄດ້ຄົ້ນຄວ້າ ແລະ ປຶກສາຫາລື ກ່ຽວກັບບັນຊີລາຍຊື່ນັກໂທດທີ່ມີເງື່ອນໄຂອະໄພຍະໂທດ, ຜ່ອນໂທດ ແລະ ປ່ອຍຕົວ ຢູ່ຄ້າຍຄຸມຂັງ-ດັດສ້າງ ປກສ ແຂວງເຊກອງ ໃນນີ້, ບັນຊີນັກໂທດທີ່ມີເງື່ອນໄຂອະໄພຍະໂທດ, ຫລຸດຜ່ອນໂທດ ຈຳນວນ 08 ຄົນ, ຍິງ 0 ຄົນ ແລະ ນັກໂທດທີ່ມີເງື່ອນໄຂອະໄພຍະໂທດ ປ່ອຍຕົວ ຈໍານວນ 05 ຄົນ, ຍິງ 01 ຄົນ. ທັງຫມົດນີ້ແມ່ນນັກໂທດທີ່ກະທຳຜິດຂໍ້ຫາ ຄ້າ-ຂາຍ ຢາເສບຕິດ 12 ຄົນ, ຍິງ 01 ຄົນ, ຜິດໃນສະຖານຂໍ້ຫາທົ່ວໄປ ຈຳນວນ 01 ຄົນ, ເຊີ່ງບັນດານັກໂທດທີ່ຈະໄດ້ຮັບການອະໄພຍະໂທດ, ຜ່ອນໂທດ ແລະ ປ່ອຍຕົວໃນຄັ້ງນີີ້ແມ່ນຜູ້ທີ່ມີການປະພຶດເຄື່ອນໄຫວກະທໍາດີ ເຮັດຖືກຕ້ອງຕາມລະບຽບຂອງຄ້າຍຄຸມຂັງ ຈິ່ງສາມາດອະໄພຍະໂທດ, ຜ່ອນໂທດ ແລະ ປ່ອຍຕົວດັ່ງກ່າວ.
ຜົນການຄົ້ນຄວ້າ ແລະ ປຶກສາຫາລືບົນພື້ນຖານຄໍາແນະນໍາຂອງຄະນະກໍາມະການອະໄພຍະໂທດລະດັບຊາດ ເຫັນວ່າມີນັກໂທດ ຈໍານວນ 01 ຄົນ, ທີ່ເປັນເພດຍິງ ບໍ່ສາມາດອະໄພຍະໂທດ ປ່ອຍຕົວໄດ້ເທື່ອ ເນື່ອງຈາກວ່າມາດຖານເງື່ອນໄຂບໍ່ທັນຄົບຖ້ວນສົມບູນເທື່ອ. ຈາກນັ້ນ, ກໍ່ໄດ້ພ້ອມກັນກຳນົດແຜນການຈັດຕັ້ງປະຕິບັດວຽກງານອະໄພຍະໂທດ ພ້ອມທັງສືບຕໍ່ຊີ້ນຳຄະນະກຳມະການອະໄພຍະໂທດຂັ້ນຕ່າງໆ ໃຫ້ຈັດຕັ້ງປະຕິບັດວຽກງານອະໄພຍະໂທດ, ຜ່ອນໂທດ ແລະ ປ່ອຍຕົວນັກໂທດ ທີ່ມີມາດຖານເງື່ອນໄຂ ຈໍານວນ ດັ່ງກ່າວ ຕາມທີ່ໄດ້ຕົກລົງກັນໄວ້ໃຫ້ສຳເລັດຜົນ.
Editor: ກຳປານາດ ລັດຖະເຮົ້າ
