ໃນອາທິດຜ່ານມາ ຄະນະໂຄສະນາອົບຮົມເມືອງລະຄອນເພັງ ສົມທົບກັບ ຫ້ອງການຖະແຫຼງຂ່າວ, ວັດທະນະທໍາ ແລະ ທ່ອງທ່ຽວເມືອງ, ຫ້ອງການແນວລາວສ້າງຊາດເມືອງ ແລະ ຫ້ອງການຍຸດຕິທໍາເມືອງ ໄດ້ຈັດຕັ້ງປາຖະກະຖາເລົ່າຄືນມູນເຊື້ອ 4 ວັນສໍາຄັນທາງປະຫວັດສາດ (ວັນຍຶດອໍານາດ 23 ສິງຫາ ຄົບຮອບ 42 ແລະ 72 ປີ, ວັນສ້າງຕັ້ງແນວລາວສ້າງຊາດ, ວັນສື່ມວນຊົນ ແລະ ການພິມຈໍາໜ່າຍ 13 ສິງຫາ ຄົບຮອບ 67 ປີ, ວັນສ້າງຕັ້ງອາຊຽນ 8 ສິງຫາ ຄົບຮອບ 50 ປີ ແລະ ວັນລັດຖະທໍາມະນູນ 15 ສິງຫາ ຄົບຮອບ 26 ປີ).
ເຊິ່ງພິທີປະາຖະກະຖາຄັ້ງນີ້ ໄດ້ຈັດຂຶ້ນຢູ່ທີສະໂມສອນຂອງເມືອງ ໂດຍເປັນກຽດເຂົ້າຮ່ວມ ແລະ ປາຖະກະຖາ ຂອງທ່ານ ພັນຕີ ບຸນທະວີ ພິມມະສານ, ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງ, ມີບັນດາກໍາມະການພັກເມືອງ, ຫົວໜ້າຫ້ອງການ, ພະນັກງານລັດຖະກອນ, ຜູ້ຊົງຄຸນວຸດທິອາວຸໂສບໍານານ, ທະຫານ, ຕໍາຫຼວດ ແລະ ການຈັດຕັ້ງບ້ານອ້ອມຂ້າງເທສະບານເມືອງ ເຂົ້າຮ່ວມ. ທ່ານ ພັນຕີ ບຸນທະວີ ພິມມະສານ, ຮອງເລຂາພັກເມືອງ ໄດ້ເລົ່າຄືນ ວັນຍຶດອໍານາດ 23 ສິງຫາ ໂດຍໄດ້ຍົກໃຫ້ເຫັນປະຫວັດສາດ ແຫ່ງການຕໍ່ສູ້ຂອງປະຊາຊົນລາວບັນດາເຜົ່າ ໃນແຕ່ລະໄລຍະ ເຊິ່ງແມ່ນການຕໍ່ສູ້ປະຕິວັດ ທີ່ຍືດເຍື້ອຍາວນານ, ເຕັມໄປດ້ວຍຄວາມທຸກຍາກລໍາບາກ, ພິລະອາດຫານ ແລະ ການເສຍສະຫຼະຊີວິດ, ເລືອດເນື້ອຂອງປະຊາຊົນລາວ ກ້າວໄປສູ່ການປະກາດຍຶດອໍານາດ ຈາກພວກລ່າເມືອງຂຶ້ນ ແລະ ລູກມືຂາຍຊາດໄດ້ເຖິງ 2 ຄັ້ງ: ຄັ້ງທີໜຶ່ງ ວັນທີ 23 ສິງຫາ 1945 ແລະ ຄັ້ງທີສອງວັນທີ 23 ສິງຫາ 1975. ເຊິ່ງທັງ 2 ຄັ້ງ ແມ່ນເຫດການ ທີ່ສໍາຄັນທາງປະຫວັດສາດຂອງຊາດເຮົາ, ສະແດງໃຫ້ເຫັນມານະຈິດ ແລະ ມູນເຊື້ອແຫ່ງການຕໍ່ສູ້ຂອງຄົນລາວທຸກເຜົ່າ, ທຸກຊັ້ນຄົນທີ່ຮັກຊາດພາຍໃຕ້ການນຳພາຂອງພັກ ເພື່ອຄວາມເປັນເອກະລາດ ແລະ ອິດສະຫຼະພາບ ດ້ວຍຈິດໃຈ "ຍອມຕາຍດີກວ່າຍອມເປັນຂ້ອຍຂ້າຕ່າງຊາດ", ມັນແມ່ນວັນແຫ່ງມະຫາສະມັກຄີ, ວັນແຫ່ງມານະຈິດປະຕິວັດ ແລະ ວັນແຫ່ງໄຊຊະນະຂອງ ປະຊາຊົນລາວ.
Editor: ດາວໄຊ ສີວິໄລ
